Read Oshindonga-Ombiimbeli Ondjapuki 2008 John 6 Bible Online

John 6 - Oshindonga-Ombiimbeli Ondjapuki 2008 bible

John 6

¹Konima yaambika Jesus okwa yi handiyaka yefuta lyaGalilea kokutya lyaTiberias.

²Ongundu onene yaantu oye mu landula, oya mono iikumithalonga mbyoka a longo, sho a aludha aavu.

³Jesus okwa londo kondundu nokwa kuutumba nkoka pamwe naalongwa ye.

⁴Ihe Opaasa, oshituthi shAajuda, osha li popepi.

⁵Jesus sho a yelutha omeho ge koombinga noombinga, okwa mono ongundu onene yaantu taye ya kuye, nokwa ti kuFilippus: “Otatu ka landa peni iikulya ya gwana okupalutha aantu mboka ayehe?”

⁶Shika okwe shi ti, a yeleke Filippus, oshoka ye mwene okwa li e shi shoka a hala okuninga.

⁷Filippus okwe mu yamukula a ti: “Iikwiila yiimaliwa omathele gaali itayi ya gwanene, opo kehe gumwe a pewe nando okapambu okashona kowala.”

⁸Gumwe gwomaalongwa ye, Andreas, omumwayina gwaSimon Petrus, okwa ti:

⁹“Mpaka ope na okamati ke na iikwiila itano yiilya noohi mbali. Ihe mbika otayi kwatha shike aantu oyendji ye thike mpoka?”

¹⁰Jesus okwe ya lombwele a ti: “Kuutumbikeni aantu.” Opwa li pu na omwiidhi ogwindji pehala ndyoka. Aantu ayehe oya kuutumba ihe. Ko okwa li ku na aalumentu ye thike pomayuvi gatano.

¹¹Jesus okwa kutha ihe iikwiila, a hambelele nokwe yi topolele aantu mboka ya kuutumba. Osho wo a ningi kombinga yoohi. Ayehe oya mono iikulya ya gwana.

¹²Aantu ayehe sho ya kuta, Jesus okwa lombwele aalongwa ye a ti: “Gongeleni iipambu ayihe mbyoka ya hupu ko, opo pwaa hepe nando osha.”

¹³Yo oye yi gongele ihe, noyu udha oontungwa omulongo nambali niipambu yiikwiila itano yiilya mbyoka ya hupu kumboka ya lya.

¹⁴Aantu mboka ya mono oshikumithalonga shika Jesus a ningi, oya ti: “Nguka oye naanaa omuhunganeki ngoka a li e na okuya muuyuni.”

¹⁵Jesus okwa li e shi shi kutya aantu oya hala okuya, ye mu kwate noye mu ninge omukwaniilwa koonkondo; onkee okwa shuna kondundu oye awike.

¹⁶Ongulohi sho ye ya, aalongwa ye oya yi komunkulo gwefuta.

¹⁷Oya yi mowato noya kambadhala okutaaguluka efuta, ya ye kuKapernaum. Okwa li kwa luudha nale nokuli, ihe Jesus okwa li inee ya natango kuyo.

¹⁸Pethimbo tuu ndyoka ombepo onene oya tameke okupepa noya tukulutha efuta.

¹⁹Sho ya dhugu oshikako shi thike pookilometa ntano nenge hamano, oya mono Jesus te ende kombanda yomeya u uka kowato, oyo noya haluka.

²⁰Ihe Jesus okwa ti kuyo: “Inamu tila, ongame!”

²¹Oya li ya hala oku mu taamba mowato, ihe ohaluka yowala owato oya thiki kevi kehala nkoka taa yi.

²²Esiku lya landula aantu mboka natango ya li handiyaka yefuta, oya mono kutya owato yimwe ayike ya thigwa hwiyaka. Oya li wo ye shi shi kutya Jesus ina ya mowato pamwe naalongwa ye, ihe aalongwa oya yi oyo ayeke.

²³Ihe oowato oonkwawo dha zi kuTiberias, odhe ya komunkulo popepi nehala ndyoka aantu ya li ya lile po iikwiila, Omuwa sho a li a hambelele.

²⁴Aantu sho ya mono Jesus kee ko nkoka nosho wo aalongwa ye, oya yi moowato noya taagulukile kuKapernaum, ye ke mu konge.

²⁵Aantu oya adha Jesus handiyaka yefuta noya ti kuye: “Muhongi, owe ya po uunake mpano?”

²⁶Jesus okwe ya yamukula a ti: “Ngame otandi mu lombwele oshili: Ne itamu kongo ndje molwaasho mwa mono iikumithalonga mbyoka nda longo, ihe omolwaashoka mwa li iikwiila mbiyaka nomwa kuta.

²⁷Inamu konga iikulya mbyoka tayi hulu po, ihe kongeni iikulya mbyoka tayi kalelele sigo omomwenyo gwaaluhe. Iikulya mbyoka oyo mbyoka Omuna gwOmuntu te ke yi mu pa, oshoka oye tuu ngoka He Kalunga e mu tula oshihako she.”

²⁸Oyo oya ti kuye: “Otu na okuninga shike, opo tu longe iilonga yaKalunga?”

²⁹Jesus okwe ya yamukula nokwa ti kuyo: “Iilonga mbyoka Kalunga a hala, mu longe, oyo mbika: Itaaleni ngoka a tumwa kuye.”

³⁰Oyo oya ti kuye: “Oshikumithalonga oshini po to shi longo, tu shi mone, tse tu ku itaale? Oto ningi shike?

³¹Ootatekulu oya lile omanna mombuga, ngashika naanaa kwa nyolwa: ‘Oye okwe ya pe oshikwiila shomegulu, ya lye!’ ”

³²Jesus okwe ya lombwele a ti: “Ngame otandi mu lombwele oshili: Moses haye e mu pele oshikwiila shomegulu, ihe Tate oye te mu pe oshikwiila shashili tashi zi megulu.

³³Oshoka oshikwiila shoka Kalunga te shi gandja, osho Omwana, ngoka a kuluka megulu nota pe uuyuni omwenyo.”

³⁴Oyo oya ti kuye: “Omuwa, tu pa aluhe oshikwiila shoka.”

³⁵Jesus okwe ya lombwele a ti: “Ongame oshikwiila shomwenyo. Ngoka te ya kungame, ita ka sa we ondjala, naangoka ti itaale ndje, ita ka sa we enota.

³⁶Ngashingeyi otandi mu lombwele kutya nonando omwa mono ndje, natango tuu inamu itaala.

³⁷Aantu ayehe mboka Tate a pa ndje, otaa ya kungame. Ngame noitandi tidha po nando ogumwe ngoka te ya kungame,

³⁸oshoka ngame onda za megulu; inandi ya okugwanitha ehalo lyandje mwene, ihe olyaanguka a tuma ndje.

³⁹Ehalo lyaanguka a tuma ndje, olyo ndika kutya ndaa kanithe po nando ogumwe gwaayehe mboka Tate e ya pa ndje, ihe ndi ke ya yumudhe ayehe mesiku lyahugunina.

⁴⁰Oshoka ehalo lyaTate olyo ndika: Kehe ngoka ta mono Omwana note mu itaale, oku na omwenyo gwaaluhe; ngame otandi ke mu yumudha mesiku lyahugunina.”

⁴¹Aajuda oya tameke okungungutula, Jesus sho a ti: “Ongame oshikwiila shoka sha kuluka megulu.”

⁴²Oyo noya ti: “Nguno ke shi nani Jesus, omuna gwaJosef? He nayina otu ya shi. Ongiini ano ngashingeyi, sho ta ti kutya okwa za megulu?”

⁴³Jesus okwe ya yamukula a ti: “Inamu ngungutula.

⁴⁴Kaku na nando omuntu ta vulu okuya kungame, okuninga Tate, nguka a tuma ndje, te mu eta kungame; nangame otandi ke mu yumudha mesiku lyahugunina.

⁴⁵Aahunganeki oya nyola ya ti: ‘Aantu ayehe otaa ka kala ya longwa kuKalunga.’ Kehe ngoka tu uvu shoka Tate ta popi notashi mu longo, ote ya kungame.

⁴⁶Shika itashi ti kutya oku na ando omuntu a mono Tate, aawe, ihe Omwana ngoka a zi kuKalunga, oye awike a mono Tate.

⁴⁷Ngame otandi mu lombwele oshili: ngoka i itaala, oku na omwenyo gwaaluhe.

⁴⁸Ongame oshikwiila shomwenyo.

⁴⁹Oohokulu oya lile omanna mombuga, ihe oya sa.

⁵⁰Ihe oshikwiila shika sha kuluka megulu oshi li ngeyi kutya kehe ngoka te shi li, ita si.

⁵¹Ongame oshikwiila shomwenyo shoka sha kuluka megulu. Kehe ngoka ta li oshikwiila shika, ota kala e na omwenyo sigo aluhe. Oshikwiila shoka tandi mu pe, osho onyama yandje, ndjoka tandi yi gandja, yi ninge omwenyo guuyuni.”

⁵²Shika oshe eta oontamanana oonene mokati kAajuda. Oyo oya pulathana ya ti: “Omulumentu nguno ota vulu ngiini oku tu pa onyama ye, tu yi lye?”

⁵³Jesus okwe ya yamukula a ti: “Ngame otandi mu lombwele oshili: Ngele itamu li onyama yOmuna gwOmuntu ne itamu nu ombinzi ye, itamu kala mu na omwenyo meni lyeni.

⁵⁴Ngoka ta li onyama yandje nota nu ombinzi yandje, oye oku na omwenyo gwaaluhe, nangame otandi ke mu yumudha mesiku lyahugunina.

⁵⁵Oshoka onyama yandje oyo okulya kwashili nombinzi yandje oyo okunwa kwashili.

⁵⁶Ngoka ta li onyama yandje nota nu ombinzi yandje, ota kala mungame, nangame otandi kala muye.

⁵⁷Ngashika naanaa Tate, ngoka a tuma ndje, e na omwenyo, osho nangame wo ndi na omwenyo omolwe. Onkee kehe ngoka ta li onyama yandje, ota ka kala e na omwenyo omolwandje.

⁵⁸Oshikwiila osho shika sha kuluka megulu. Sho inashi fa oshikwiila shoka sha lilwe koohokulu e taa si. Ngoka ta li oshikwiila shika, ota kala e na omwenyo sigo aluhe.”

⁵⁹Oohapu ndhika Jesus okwe dhi popi mosinagoga muKapernaum, sho a li ta longo aantu.

⁶⁰Oyendji yomaalongwa ye mboka yu uvu oohapu ndhika, oya ti: “Elongo ndika ekukutu unene, olye ta vulu oku li pulakena?”

⁶¹Jesus sho e shi dhimbulula mwene kutya aalongwa ye otaa ngungutula molwoohapu ndhoka a popi, okwa ti kuyo: “Omwe etha eitaalo omolwoohapu ndhika?

⁶²Ongiini ano, ngele tamu ka mona Omuna gwOmuntu ta londo ta shuna nkoka a li shito?

⁶³Ombepo oyo tayi tula omwenyo, onyama kayi na shoka tayi kwatha. Oohapu ndhoka nde mu lombwele odho Ombepo nomwenyo.

⁶⁴Ihe natango tuu mokati keni omu na yamwe mboka inayi itaala.” Oshoka okuza petamekolela Jesus okwa kala e shi shi kutya oolye mboka inaaye mu itaala naangoka te ke mu gwaaleka kutya olye.

⁶⁵Oye kwa gwedha ko a ti: “Osho tuu shoka nde mu lombwele kutya kaku na nando omuntu ta vulu okuya kungame, okuninga Tate te shi mu pitikile.”

⁶⁶Okuza kesiku ndyoka oyendji yomaalongwa ye oya shuna monima yo inaa enda we pamwe naye.

⁶⁷Jesus okwa lombwele ihe aalongwa ye mboka omulongo nayaali a ti: “Ne inamu hala okuya?”

⁶⁸Simon Petrus okwe mu yamukula: “Omuwa, otatu yi kulye? Ngoye ou na oohapu ndhoka tadhi gandja omwenyo gwaaluhe.

⁶⁹Ngashingeyi tse otwi itaala notu shi shi kutya ngoye Omuyapuki ngoka wa za kuKalunga.”

⁷⁰Jesus okwe ya yamukula a ti: “Inandi mu hogolola mu li omulongo nayaali? Ihe nando ongaaka, gumwe oye omuhindadhi.”

⁷¹Oshinima shika okwe shi popi omolwaJudas yaSimon Iskariot. Oshoka Judas nando okwa li gumwe gwaamboka omulongo nayaali, oye a li te ke mu gwaaleka.