Read Oshindonga-Ombiimbeli Ondjapuki 2008 John 7 Bible Online

John 7 - Oshindonga-Ombiimbeli Ondjapuki 2008 bible

John 7

¹Konima yaambika Jesus okwe ende muGalilea. Oye okwa li inaa hala okweenda muJudea, oshoka Aajuda yaankoka oya li ya hala oku mu dhipaga.

²Oshituthi shAajuda, oshituthi shomatsali giihwali, osha li popepi.

³Aamwayina yaJesus aalumentu oye mu lombwele ihe ya ti: “Za po mpaka, u ye kuJudea, aalongwa yoye opo ya mone iilonga mbyoka yi longo.

⁴Oshoka kape na ando omuntu ta longo sha meholamo, ngele okwa hala a tseyike. Onkee ano i ihololela uuyuni.”

⁵Oshoka naamwayina aalumentu wo oya li inaaye mu itaala.

⁶Jesus okwa ti kuyo: “Ethimbo ndyoka lyo opalela ndje inali thika natango. Ihe ne omu na aluhe ethimbo ndyoka lye mu opalela.

⁷Ne uuyuni itau mu tondo, ihe ngame ou tonde ndje, oshoka otandi u hololele kutya iilonga yawo iiwinayi.

⁸Ne indeni mpeyaka koshituthi. Ngame itandi yi ko koshituthi shika, oshoka ethimbo lyandje inali thika natango.”

⁹Oye okwe ya lombwele oohapu ndhika nokwa kala natango muGalilea.

¹⁰Hugunina aamwayina aalumentu sho ya yi koshituthi, Jesus naye wo okwa yi ko. Ye ina ya ko puuyelele, ihe okwa yi ko meholamo.

¹¹Aajuda oya kala taye mu kongo moshituthi noya pulathana ya ti: “Oye oku li peni?”

¹²Mongundu yaantu omwa kala enongono olindji omolwe. Aantu yamwe oya ti: “Oye omulumentu omwaanawa.” Ihe yamwe oya ti: “Aawe, ota pukitha aantu.”

¹³Ihe kakwa li nando omuntu ngoka e mu popi puuyelele, oshoka oya li ya tila Aajuda.

¹⁴Metifa lyoshituthi Jesus okwa yi motempeli nokwa tameke okulonga aantu.

¹⁵Aajuda oya kumwa noonkondo noya ti: “Omulumentu nguka okwa tseya ngiini Omanyolo, nando ina longwa?”

¹⁶Jesus okwe ya yamukula a ti: “Elongo ndika tandi li longo, kali shi lyandje mwene, ihe olya za kuKalunga, ngoka a tuma ndje.

¹⁷Kehe ngoka a hala okuvulika kehalo lyaKalunga, ota ka dhimbulula elongo ndika tandi longo, ngele olya zi kuKalunga, nenge ote popi ashike mungame mwene.

¹⁸Omuntu ngoka ta popi muye mwene, ota kambadhala okwiikongela esimano. Ihe ngoka ta kongo esimano lyaanguka e mu tuma, oye omunashili ye ke na nando iifundja yasha meni lye.

¹⁹Moses ine mu pa ompango? Ihe kape na nando ogumwe gwomune ta vulika kompango. Omolwashike mwa hala okudhipaga ndje?”

²⁰Aantu oye mu yamukula ya ti: “Shila ou niwe kompwidhuli. Olye a hala oku ku dhipaga?”

²¹Jesus okwe ya yamukula a ti: “Oshilonga shimwe ashike nda longo, ne amuhe nomwa kumwa.

²²Molwaashoka Moses okwe mu pe oshipango, mu fukaleke aana yeni aamati, (nonando haMoses e shi gandja, ihe ooho oyo ye shi tameke), ne ohamu ya fukaleke nomEsabati.

²³“Ngele okufukaleka omuntu mEsabati itaku yono ompango yaMoses, omolwashike mwa geele ndje, sho nda aludha omuntu mEsabati?

²⁴Inamu pangula ngaashi tamu tala nomeho, ihe panguleni epangulo lyu uka.”

²⁵Nena aantu yamwe yomuJerusalem oya ti: “Nguka haye nani ngoka aakuluntu yetu Aajuda ya hala oku mu dhipaga?

²⁶Tala, ota popi montaneho yawo, ihe kape na nando ngoka ta ti sha kuye. Nenge aakuluntu oya dhimbulula kutya omulumentu nguka oye Kristus?

²⁷Tse otwa tseya omulumentu nguka nkoka a za, ihe Kristus ngele te ya, kape na ngoka e shi nkoka ta zi.”

²⁸Jesus okwa popi mokule motempeli ta longo aantu e ta ti: “Omu shi ndje tuu nomu shi ko tuu nkoka nda za? Ngame inandi ya molwandje mwene. Ngoka a tumu ndje, oye omunashili. Ne nokamu mu shi.

²⁹Ngame ondi mu shi, oshoka onda zi kuye, noye a tuma ndje.”

³⁰Oyo oya li ya hala oku mu kwata, ihe molwaashoka ethimbo lye olya li inaali thika natango, kape na nando ogumwe e mu tula iikaha.

³¹Ihe aantu oyendji yomongundu oye mu itaale noya ti: “Kristus nge te ya, ota ka longa tuu iikumithalonga iinene yi vule mbika tayi longwa komulumentu nguno?”

³²Aafarisayi oyu uvu enongono lyongundu ndjoka yaantu taa popi iinima mbika kombinga yaJesus. Nena yo pamwe naayambi aakuluntu oya tumu aalangeli, ya ka kwate Jesus.

³³Jesus okwe ya lombwele: “Ngame ondi li pune okathimbo okafupi natango, opo ihe otandi yi kungoka a tuma ndje.

³⁴Ne otamu ka kala nokukonga ndje, ihe itamu ka mona ndje, oshoka nkoka tandi ka kala, kamu vulu okuya ko.”

³⁵Aajuda oya pulathana ya ti: “Omulumentu nguka ota yi peni ando, mpo itaatu mu mono we? Otayi kiilando yAagreka nkoka kwa kala Aajuda, a ka longe Aagreka?

³⁶Oye okwa hala okutya ngiini, sho a ti: Ne otamu kala nokukonga ndje ne itamu ka mona ndje; naankoka tandi yi, itamu vulu okuya ko.”

³⁷Esiku lyahugunina lyoshituthi olya li lya simana unene. Esiku olyo tuu ndyoka Jesus okwa thikama nokwiigidha a ti: “Kehe ngoka a sa enota, ne ye kungame, a nwe.

³⁸Ngaashi kwa nyolwa taku ti: ‘Kehe ngoka i itaala ndje, meni lye otamu ka tondoka omilonga dhomeya omanamwenyo.’ ”

³⁹Jesus okwa popi ta dhiladhila Ombepo ngoka ta ka pewa mboka ye mu itaala. Pethimbo ndyoka Ombepo okwa li inaa gandjwa natango, oshoka Jesus okwa li inaa adhimithwa natango.

⁴⁰Yamwe yomongundu sho yu uvu oohapu ndhika, oya ti: “Kapu na omalimbililo, omulumentu nguka oye omuhunganeki.”

⁴¹Ooyakwawo oya ti: “Oye Kristus.” Ihe yamwe ishewe oya ti: “Kristus ita zi ndishi muGalilea?

⁴²Enyolo otali ti kutya Kristus ota zi moluvalo lwaDavid nota valelwa muBetlehem, moshilando moka David a li a kala.”

⁴³Osho ngeyi omaludhi oga tameke mokati kaantu omolwe.

⁴⁴Yamwe oya li ya hala okukwata Jesus, ihe kapwa li nando ogumwe e mu gumu.

⁴⁵Aalangeli oya shuna kaayambi aakuluntu nokaafarisayi, mboka ye ya pula: “Omolwashike inaamu mu eta huka?”

⁴⁶Aalangeli oye ya yamukula: “Noshitonale inaku monika omuntu ta popi ngashika omulumentu ngwiyaka.”

⁴⁷Aafarisayi oye ya pula ya ti: “Nane wo omwa hongololwa?

⁴⁸Ope na tuu nando ogumwe gwomaakuluntu yetu nenge gwomaafarisayi e mu itaala?

⁴⁹Aantu mbaka inaa tseya ompango yaMoses, onkee oye li kohi yethingo lyaKalunga.”

⁵⁰Nikodemus, ngoka a yile nale kuJesus uusiku, okwa li gumwe gwawo. Okwa ti:

⁵¹“Pampango yetu tse itatu vulu okupangula nando omuntu, manga inaa pulakenwa tango, opo ku monike shoka a ningi.”

⁵²Yo oye mu yamukula ya ti: “Nangoye wo owa za kuGalilea nani? Konakona Omanyolo, nena oto ka dhimbulula kutya muGalilea inamu za nando onale omuhunganeki.” [

⁵³Nokonima kehe gumwe okwa yi kaandjawo.