Read Oshindonga-Ombiimbeli Ondjapuki 2008 Romans 11 Bible Online

Romans 11 - Oshindonga-Ombiimbeli Ondjapuki 2008 bible

Romans 11

¹Ihe otandi pula: Kalunga okwe ekelahi aantu ye? Aawe, hasho! Ngame mwene Omuisraeli, gwomoluvalo lwaAbraham nomunezimo lyaBenjamin.

²Kalunga ine ekelahi aantu ye, mboka e ya hogolola okuza petameko. Omwa lesha ndishi ehokololo moka Elia ta tamaneke Aaisraeli koshipala shaKalunga ta ti:

³“Omuwa, oyo ya dhipaga po aahunganeki yoye noya hanagula po iiyambelo yoye. Ongame awike nda hupu po, ihe otaa kongo ndje, ya dhipage ndje wo.”

⁴Eyamukulo ndyoka Kalunga e mu yamukula otali ti ngiini? Otali ti: “Ondi na po natango aalumentu omayuvi gaheyali, mboka inaaya galikana oshikalunga Baal.”

⁵Ano osho naanaa shi li ngashingeyi. Opu na omwaalu omushona gwowala gwaamboka Kalunga e ya hogolola molwesilohenda lye.

⁶Ehogololo ndika olyopasilohenda lyaKalunga kali na sha niilonga yawo. Oshoka ando okwa li ehogololo lyaKalunga lya li lyi ikwatelela kushoka aantu ye shi longa, ando esilohenda lye kali shi we esilohenda lyashili.

⁷Ihe ongiini ano? Aaisraeli inaa mona shoka ya li taye shi lalakanene, ihe osha monika kokangundu okashona hoka Kalunga e ka hogolola. Mbeyaka yalwe oya thitike omakutsi, yaa uve eithano lyaKalunga.

⁸Ngaashi enyolo tali ti: “Kalunga okwa kukutike omitima nomadhiladhilo gawo, onkee sigo onena omeho gawo kage wete ko nomakutsi gawo kagu uvite ko.”

⁹David kombinga ye ota ti: “Iililo yawo nayi ya ningile omwigo gwoku ya kwata noku ya yula. Naa punduke e taa geelwa.

¹⁰Omeho gawo naga tsike, yaa vule okumona ko. Naa kale aluhe ya thindilwa pevi komaudhigu.”

¹¹Nena otandi pula: Aajuda oya pundukilile? Aawe, itashi vulika! Ihe sho ya yono, ehupitho olye ya kaapagani, opo Aajuda ye ya sile efupa.

¹²Onkee ano okuyona kwAajuda okwe etele uuyuni omayambeko ogendji, noluhepo lwawo lwopambepo olwe etele aapagani omayambeko ogendji. Ano omayambeko otaga ka kala ge thike peni, uuna omwaalu gwAajuda ayehe tagu ke ya mo!

¹³Ngashingeyi otandi popi kombinga yeni aapagani. Sho ndi li po omutumwa mokati kaapagani, otandi isimanekele oshilonga shandje.

¹⁴Pamwe otashi vulika, aantu yomoshigwana shandje taa ka sila aapagani efupa, opo ndi vule ihe okuhupitha nando oyamwe yomuyo.

¹⁵Oshoka sho ya li ye ekelwahi, nena uuyuni owa hanganithwa naKalunga. Otashi ka kala ano ngiini, uuna taa ka taambwa? Otashi ka kala ongotaa yumudhwa kuusi.

¹⁶Ngele okapambu kotango koshikwiila taka pewa Kalunga, nena oshikwiila ashihe oshe wo. Omidhi dhomuti ngele odha pewa Kalunga, nena iitayi oye wo.

¹⁷Iitayi yimwe yolumono ndoka lwa helelwa, oya teywa ko, e taku tsikwa ihe oshitayi sholumono lwomiihwa. Ne aapagani omwa fa naanaa olumono ndoka lwomiihwa, ihe ngashingeyi otamu yamu mekota lyolumono lwa helelwa iikulya iitoye.

¹⁸Onkee ano ino inenepeka, u dhine iitayi mbyoka ya teywa ko. Ngoye oshitayi showala, hangoye wa humbata ekota, ihe ekota olyo lye ku humbata.

¹⁹Ihe pamwe oto ti: “Eeno osho, ihe iitayi mbyoka oya teywa ko, opo ndi tsikwe ko.”

²⁰Shika oshoshili. Oyo oya teywa ko, oshoka inaa itaala, manga ngoye owa tulwa peha lyawo, oshoka owi itaala. Ihe ino shi inenepekela, shila kala wa tila.

²¹Oshoka Kalunga ngele ina hupitha Aajuda mboka iitayi yopanshitwe, nangoye wo ite ku hupitha.

²²Mpaka otatu mono uuwanawa nuugeyi waKalunga mpoka u thike. Oye ota geele mboka ya shuna monima. Kungoye oye omwaanawa, ngele oto u kwata nawa; ihe ngele hasho, nena nangoye wo oto ka tetwa mo.

²³Aajuda wo ngele taa etha okwaaitaala kwawo, nena otaa shunwa pehala mpoka ya li. Kalunga ota vulu oku ya shuna po natango.

²⁴Ne aapagani omwa fa oshitayi sholumono lwomiihwa shoka sha teywa ko e tashi tsikwa nuunkulungu kolumono lwa helelwa. Aajuda oya fa olumono ndoka, onkee kombinga yaKalunga oshipu okutsika ko natango iitayi mbyoka ya li ya tewa ko kolumono tuu ndoka.

²⁵Aamwameme, opo mwaa kale tamu landula oondunge dheni yene, onda hala oku mu tseyithila oshiholekwa shika kutya kombinga yimwe Aaisraeli oya adhika keikukutiko tali kala sigo omwaalu gwa gwana gwaapagani gwe ya kuKalunga.

²⁶Ano Aaisraeli ayehe otaa ka hupithwa, ngaashi enyolo tali ti: “Omuhupithi ota zi muSion, oye ota kombo mo okudhina Kalunga moluvalo lwaJakob.

²⁷Otandi dhike ehangano nayo, sho tandi kutha po oondjo dhawo.”

²⁸Aajuda oya ningi aatondi yaKalunga omolweni aapagani, oshoka oya tindi elaka etoye. Ihe molwehogololo lyaKalunga oyo aaholike omolwoohekulu.

²⁹Oshoka Kalunga iha lundulula omadhiladhilo ge kutya ota hogolola lye nota yambeke lye.

³⁰Ne aapagani omwa li nale inaamu vulika kuKalunga, ihe ngashingeyi Kalunga okwe mu sile ohenda omolwokwaavulika kwAajuda.

³¹Osho tuu wo ne sho mwa silwa ohenda, Aajuda oya tindi okuvulika kuKalunga, opo nayo wo ya vule okutaamba esilohenda lyaKalunga ngashingeyi.

³²Oshoka Kalunga okwe ethele ayehe mokwaavulika, opo e ya sile ohenda ayehe.

³³Ano uuwindji wuuyamba waKalunga ou thike peni! Uunongo noondunge dhe odha hulila peni! Olye ta vulu okufatulula omatokolo ge? Olye ta vulu okuuva ko oondjila dhe?

³⁴Ngaashi enyolo tali ti: “Olye a tseya omadhiladhilo gOmuwa? Olye ta vulu oku mu tsa omayele?

³⁵Olye e mu pele sha tango, ye e shi mu galulile?”

³⁶Oshoka ayihe oya shitwa kuye, omolwe ayihe yi li po notayi shuna kuye. Kalunga na simanekwe aluheluhe! Amen.