Read Oshindonga-Ombiimbeli Ondjapuki 2008 Romans 12 Bible Online

Romans 12 - Oshindonga-Ombiimbeli Ondjapuki 2008 bible

Romans 12

¹Onkee ano, one aamwameme, otandi mu kumagidha, mu dhimbulule esilohenda lyaKalunga kutseni mpoka li thike: Igandjeni ne yene kuKalunga eyambo li na omwenyo, mu kale mwe mu iyapulila, ne mu kale mwe mu opalela. Ndika olyo elongelokalunga lyeni lyashili.

²Inamu faathana nonkalo yuuyuni mbuka, aawe, Kalunga ne mu shitulule meni lyeni nomomadhiladhilo geni. Nena otamu vulu ihe okutseya ehalo lyaKalunga naashoka oshiwanawa, she mu opalela nosha gwana.

³Omolwomagano gesilohenda lyaKalunga ngoka nde ga pewa, onda hala oku mu lombwela one amuhe: Inamu idhiladhilila pehala mpoka inaamu adha, ihe dhiladhileni pandjele. Kehe gumwe gwomune ni iyeleke pamuthika gweitaalo ndyoka Kalunga e li mu pa.

⁴Otse otu na iilyo oyindji molutu lumwe, nakehe shimwe shomiilyo mbika oshi na oshilonga shasho shi ili.

⁵Osho wo, nonando tse otu li po oyendji, otse olutu lumwe muukumwe naKristus notwa kwatelwa kumwe ongiilyo yolutu lumwe.

⁶Onkee ano otu na okulongitha omagano getu gi ili nogi ili pasilohenda ndyoka twe li pewa kuKalunga. Ngele otu na omagano gokuuvitha oohapu dhaKalunga, natu shi ninge paitaalo lyetu.

⁷Ngele okuyakula, natu yakule. Ngele okulonga aantu, natu longe.

⁸Ngele okutsa yakwetu omukumo, natu shi ninge. Ngoka ta pe yakwawo sha, na gandje nomwenyo aguhe. Ngoka e na oonkondo dhokupangela aantu, ne shi ninge noondunge. Ngoka ta kwatha mboka ye li moluhepo, ne shi ninge nenyanyu.

⁹Ohole nayi kale yashili. Tondeni shaa shoka oshiwinayi, ne mu dhiginine shoka oshiwanawa.

¹⁰Kaleni mu na ohole yaamwayinathana, ne mu lalakanene okusimanekathana.

¹¹Longeni nuupenda, inamu kala aanye. Longeleni Omuwa nomwenyo aguhe.

¹²Etegameno nali mu nyanyudhe, idhidhimikeni muudhigu, dhiginineni okugalikana.

¹³Kwatheni yakweni mboka ye na oluhepo, ne mu yakule oondjendi momagumbo geni.

¹⁴Galikaneni Kalunga, a yambeke mboka taye mu tidhagana; eeno, ya galikaneni, e ya yambeke, kee ya thinge.

¹⁵Nyanyukweni pamwe naamboka ya nyanyukwa, lileni pamwe naamboka taa lili.

¹⁶Inamu kala mu hole komeho, ihe pangeni uukuume naamboka aafupi. Inamu itala kutya one aanandunge.

¹⁷Ngele ku na ngoka te mu ningile uuwinayi, inamu mu shunithila uuwinayi. Kambadhaleni okuninga shoka aantu ayehe taye shi tala kutya oshiwanawa.

¹⁸Ne yene kombinga yeni ningeni ashihe tamu shi vulu, mu kale nombili naantu ayehe.

¹⁹Aaholike, inamu shunithila omuntu uuwinayi, ihe etheni, ondjahi yaKalunga yi shi ninge. Oshoka enyolo otali ti: “Egeelo olyandje, ongame mwene tandi ka geela, Omuwa osho ta ti.”

²⁰Onkee ano ninga, ngaashi enyolo tali ti: “Omutondi gwoye ngele okwa sa ondjala, mu pa a lye. Ngele okwa sa enota, mu pa a nwe, oshoka moku shi ninga oto gongele omakala ga tema komutse gwe.”

²¹Inamu sindwa kuuwinayi, ihe sindeni uuwinayi nuuwanawa.