Read Oshindonga-Ombiimbeli Ondjapuki 2008 Romans 14 Bible Online

Romans 14 - Oshindonga-Ombiimbeli Ondjapuki 2008 bible

Romans 14

¹Taambeni mokati keni omuntu ngoka omunkundi meitaalo, ne inamu mu ludhikitha kombinga yomadhiladhilo ge.

²Omuntu gumwe eitaalo lye otali mu pitika, a lye shaa shoka, ihe omuntu ngoka omunkundi meitaalo ota li owala iikwamboga.

³Omuntu ngoka ha li shaa shoka, ina dhina mukwawo ngoka ihee shi ningi. Osho tuu wo ngoka ha li owala iikwamboga, ina pangula mukwawo ngoka ha li shaa shoka, oshoka Kalunga okwa taamba omuntu ngoka.

⁴One oolye, mu vule okupangula omuyakuli gwomuntu gulwe? Mwene gwe oye mwene ta tokola, ngele omuntu ngoka ota ka mona elago nenge omupya. Oye ota ka mona elago, oshoka Omuwa ota vulu oku mu kwatha, e li mone.

⁵Omuntu gumwe ota dhiladhila kutya esiku lyontumba olya simana li vule omakwawo, manga mukwawo ta dhiladhila kutya omasiku agehe oge thike pamwe. Kehe gumwe na kale a kola momadhiladhilo ge.

⁶Ngoka ha dhiladhila esiku lyontumba li vule omakwawo, ne shi ninge nokusimaneka Omuwa. Ngoka ha li shaa shoka, ne shi ninge okusimaneka Omuwa, sho ta pandula Kalunga omolwiikulya. Ngoka ta tindi okulya iikulya yontumba, ne shi ninge nokusimaneka Omuwa, sho ta pandula Kalunga.

⁷Oshoka kaku na nando ogumwe gwomutse e li po owala polwe mwene, nokaku na nando ogumwe gwomutse ta si owala polwe mwene. Ngele tatu kala tu na omwenyo, otatu kalele Omuwa,

⁸nongele tatu si, otatu sile koshipala shOmuwa. Onkee ano, ngele otu na omwenyo nenge otatu si, otse oyOmuwa.

⁹Oshoka Kristus okwa si e ta yumuka kuusi, opo a kale Omuwa gwaasi nogwaanamwenyo.

¹⁰Nenge ngoye, omolwashike to pangula mukweni? Nenge ngoye, omolwashike to dhini mukweni? Oshoka tse aantu atuhe otatu ka thikama koshipala shaKalunga, tu pangulwe kuye.

¹¹Oshoka enyolo otali ti: “Ngaashi ndi na omwenyo, kehe omuntu ota ka tsa oongolo koshipala shandje, Omuwa osho ta ti. Kehe omuntu ota ka hempulula kutya ongame Kalunga.”

¹²Ano kehe gumwe gwomutse ote ki ihokolola koshipala shaKalunga polwe mwene.

¹³Ano inatu pangulathaneni. Ihe kaleni mu na etokolo, mwaa pundukithe mukweni nenge oku mu undulila muulunde.

¹⁴Ngame sho ndi na uukumwe nOmuwa Jesus, ondi shi shi nawa kutya kaku na oshinima sha nyata musho shene. Ihe ngele omuntu i itaala kutya oshinima shontumba osha nyata, nena otashi nyata.

¹⁵Ngele oto yono po mukweni naashoka to shi li, nena ino landula we ompango yohole. Ino etha iikulya mbyoka to yi li, yi yone po omuntu ngoka Kristus e mu sile.

¹⁶Ino etha shoka to shi tala oshiwanawa, shi mone edhina ewinayi.

¹⁷Oshoka Oshilongo shaKalunga kashi shi oshinima shokulya nokunwa, ihe oshuuyuuki nombili nenyanyu, naambika otayi zi mOmbepo Ondjapuki.

¹⁸Naangoka ta longele Kristus pamukalo nguka, oye okwo opalela Kalunga nokwa hokiwa kaantu.

¹⁹Onkee ano otu na okulalakanena aluhe mbyoka tayi tu kaleke tu na ombili nooyakwetu, naambyoka tayi tungu okukalathana kwetu.

²⁰Ino hanagula po oshilonga shaKalunga omolwiikulya. Iikulya ayihe, otashi vulika, yi liwe, ihe osha puka, ngele to li iikulya mbyoka tayi undulile mukweni muulunde.

²¹Oshinima shoka oshiwanawa okuninga, okukala ihoo li onyama noihoo nu omaviinu nenge okuninga kehe tuu shoka tashi pundukitha mukweni.

²²Kala mushoka ngoye mwene we shi tala shu uka koshipala shaKalunga. Omunelago oye ngoka eiyuvo lye itaali mu pe uusama mumbyoka ta tala kutya iiwanawa.

²³Ihe ngele oku na omalimbililo kombinga yaashoka te shi li, nena Kalunga ote mu pe uusama, oshoka okulya kwe inaku za keitaalo. Ano kehe tuu shoka inaashi za keitaalo, osho oondjo.