Read Oshindonga-Ombiimbeli Ondjapuki 2008 Romans 2 Bible Online

Romans 2 - Oshindonga-Ombiimbeli Ondjapuki 2008 bible

Romans 2

¹Kuume kandje, ngele oho pangula yakweni, ito vulu okwiipopila, nando ou kale ongoye lye. Oshoka ngele oho pangula yalwe, ihe nani mbyoka to ya pele uusama oyo ho ningi, nena oto ipangula ngoye mwene.

²Tse otu shi shi kutya Kalunga oku li mondjila, uuna ta pangula aantu mboka haa yono omayono ga tya ngeyi.

³Ihe ngoye, kuume kandje, gwanitha mwene shoka ho pele yakweni uusama. Oto dhiladhila kutya oto fadhuka po epangulo lyaKalunga?

⁴Pamwe owa dhini uuwanawa we waa shi kuyelekwa, eidhidhimiko nontalanteni ye? Ino tseya nani, uuwanawa waKalunga ou lile po oku ku hila, wi itedhulule?

⁵Ihe molweikukutiko nokwaavulika kwoye oto igongelele egeelo mesiku ndyoka, uuna ondjahi yaKalunga nepangulo eyuuki tayi ka hololwa.

⁶Oshoka Kalunga ota ka futa omuntu kehe ngaashi i ilongela.

⁷Aantu mboka taa dhiginine okulonga uuwanawa, otaa lalakanene eadhimo, esimano nokukalamwenyo itaaku hulu; Kalunga ote ke ya pa omwenyo gwaaluhe.

⁸Aantu mboka yi ihole, ohaa tindi oshili e taa landula shoka sha puka. Onkee ondjahi negeelo lyaKalunga otayi ya kombanda yawo.

⁹Uudhigu nuuwehame otau adha ayehe mboka haa longo uulunde, tango Aajuda nosho wo aapagani.

¹⁰Ihe Kalunga ota ka gandja eadhimo, esimano nombili kwaayehe mboka haa longo uuwanawa, tango Aajuda nosho wo aapagani.

¹¹Oshoka Kalunga oha ningile aantu ayehe shi thike pamwe.

¹²Aapagani sho yaa na ompango yaMoses, otaa yono e taa ka kana yaa na ompango. Aajuda oye na ompango; oyo otaa yono e taa pangulwa pampango.

¹³Oshoka aantu itaa ningi aayuuki koshipala shaKalunga molwokuuva ompango, ihe omolwokugwanitha shoka tashi pulwa kompango.

¹⁴Aapagani kaye na ompango, ihe uuna taa gwanitha shoka tashi pulwa kompango pandunge dhawo, nena oyo ompango kuyo yene, nando kaye na ompango.

¹⁵Nena omikalo dhawo otadhi holola kutya shoka tashi pulwa kompango, osha nyolelwa momitima dhawo. Omaiyuvo gawo otaga koleke wo oshili ndjika, oshoka omadhiladhilo tage ya tamaneke nenge tage ya popile.

¹⁶Palaka etoye ndyoka tandi li uvitha, Kalunga ota ka ninga Jesus Kristus omupanguli gwiiholekwa ayihe yomomitima dhaantu.

¹⁷Ongiini kombinga yoye? Ngoye oho iti Omujuda, owi inekela ompango noho itanga kutya ngoye omuntu gwaKalunga.

¹⁸Ngoye owa tseya ehalo lyaKalunga nowi ilonga mompango okuyoolola shoka shi li mondjila.

¹⁹Owi ishi kutya ongoye omukwatiketi gwaaposi, uuyelele waamboka ye li momilema,

²⁰omuputudhi gwaagoya nomulongi gwaanona, ngoka u na mompango ehuku lyuunongo nolyoshili.

²¹Ngoye oho longo yalwe, ihe omolwashike ihoo ilongo ngoye mwene? Oho uvithile aantu yaa yake, ngoye iho yaka?

²²Ngoye oho indike aantu yaa hondele, ngoye iho hondele? Ou tonde iikalunga, ngoye iho yaka mootempeli?

²³Oho itanga, sho u na ompango yaKalunga, ihe iho shekitha Kalunga, sho ho yono ompango ye?

²⁴Oshoka okwa nyolwa kutya omolwAajuda aapagani otaa sheke edhina lyaKalunga.

²⁵Efukaleko otali ku kwatha owala, ngele to vulika kompango. Ihe ngele iho vulika kompango, nena owa faathana naanguka inaa fukalekwa, nando ngoye owa fukalekwa.

²⁶Ngele omupagani ngoka inaa fukalekwa ta vulika komalombwelo gompango, Kalunga ite mu tala nani ongo a fukalekwa?

²⁷Ne Aajuda otamu ka pewa uusama kaapagani. Oshoka ohamu yono ompango, nonando omu yi na ya nyolwa, nane yene omwa fukalekwa, manga aapagani haa vulika kompango, nonando inaa fukalekwa panyama.

²⁸Omujuda gwashili ke shi ngoka ta monika kombanda, nefukaleko lyashili kali shi ndyoka tali ningwa kombanda panyama.

²⁹Ihe Omujuda gwashili oye ngoka Omujuda meni lye, a fukalekwa momutima gwe. Shika kashi shi oshilonga shompango, ihe oshilonga shOmbepo yaKalunga. Omuntu a tya ngaaka ota pewa esimano kuKalunga, hakaantu.