Read Oshindonga-Ombiimbeli Ondjapuki 2008 Romans 6 Bible Online

Romans 6 - Oshindonga-Ombiimbeli Ondjapuki 2008 bible

Romans 6

¹Otatu ti ngiini ano? Otu na okukala muulunde, opo esilohenda lyaKalunga li ninge olindji?

²Aawe, itashi vulika! Tse sho twa kwatunuka mo muulunde, otashi vulika ngiini, tu kale mo natango?

³One omu shi shi nawa kutya uuna ndoka twa shashwa, otwa yi muukumwe naJesus Kristus notwa yi wo muukumwe naye meso.

⁴Mokushashwa kwetu otwa si notwa fumvikwa pamwe naye. Ihe ngaashi Kristus a yumudhwa kuusi koonkondo dheadhimo lyaHe, osho natse wo otatu vulu okweenda mokukalamwenyo okupe.

⁵Oshoka ngele twa faathana naye mokusa kwa fa kwe, osho wo otatu ka faathana naye mokuyumudhwa kuusi ngaashi ye.

⁶Tse otu shi shi kutya omuntu gwetu omukulu okwa si pamwe naKristus komushigakano, opo oonkondo dhomuntu guulunde dhi hanagulwe po, twaa kale we aapika yuulunde.

⁷Oshoka omuntu ngele okwa sa, nena okwa mangululwa moonkondo dhuulunde.

⁸Ngele otwa si pamwe naKristus, nena otwi itaala wo kutya otatu ka kala tu na omwenyo pamwe naye.

⁹Oshoka otu shi shi kutya Kristus okwa yumudhwa kuusi, ita si we. Eso kali na we oonkondo oku mu pangela.

¹⁰Kristus sho a si, okwa si moluulunde lumwe aluke; ihe sho a kala e na omwenyo, okwa kalele Kalunga.

¹¹Osho nane wo omu na okudhiladhila kutya omwa kwatunuka mo muulunde, ihe omu na omwenyo, mu longele Kalunga muukumwe naJesus Kristus.

¹²Uulunde kau na okupangela we momalutu geni omasi, mu vulike ando kuuhalu womuntu guulunde.

¹³Ne inamu gandja iilyo yomalutu geni muulunde, yi longithwe miilonga iiwinayi. Ihe igandjeni ne yene kuKalunga, mu kale mwa yumudhwa kuusi, ne mu pe Kalunga uuntu weni auhe, u longithwe miilonga iiwanawa.

¹⁴Uulunde kau na oku mu pangela, oshoka kamu li kohi yompango, ihe okohi yesilohenda lyaKalunga.

¹⁵Ongiini ano, otu na okukala muulunde, oshoka katu li kohi yompango, ihe okohi yesilohenda lyaKalunga? Aawe, itashi vulika!

¹⁶Oshoka omu shi shi nawa kutya uuna tamu igandja komuntu gwontumba, nena one aapika yaangoka tamu vulika kuye. Ngele tamu igandja okulonga uulunde, nena ehulilo olyo eso. Ihe ngele tamu vulika kuKalunga, evuliko ndyoka otali mu ningi aayuuki koshipala shaKalunga.

¹⁷Kalunga na hambelelwe! Nale omwa li aapika yuulunde, ihe ngashingeyi ohamu vulika nomwenyo aguhe koshili tayi zi melongo ndyoka mwe li longwa.

¹⁸One omwa mangululwa muulunde, mu ninge aapika yiilonga iiwanawa.

¹⁹Otandi popi pantu omoluunkundi wuuntu weni. Nale omwa li mwi igandja okulonga iilonga yuupika, yoonyata noyuukolokoshi, mbyoka tayi kondjitha ehalo lyaKalunga. Ano osho tuu wo ngashingeyi igandjeni, mu ninge aapika yiilonga iiwanawa, opo mu ninge aayapuki.

²⁰Nale sho mwa li aapika yuulunde, omwa li mwa manguluka mwaa na sha nuuyuuki.

²¹Ano omwa mono mo uuwanawa washike mokulonga mbyoka mwe yi sa ohoni ngashingeyi? Ehulilo lyiilonga mbyoka olyo eso.

²²Ihe ngashingeyi omwa mangululwa muulunde nomwa ningi aapika yokulongela Kalunga, nokutya okukalamwenyo kweni akuhe oku li meutho lye, nopehulilo otamu ka mona omwenyo gwaaluhe.

²³Oshoka eso olyo ondjambi yuulunde, ihe omwenyo gwaaluhe ogwo omagano gesilohenda lyaKalunga muukumwe naJesus Kristus, Omuwa gwetu.