Read Oshindonga-Ombiimbeli Ondjapuki 2008 Romans 7 Bible Online

Romans 7 - Oshindonga-Ombiimbeli Ondjapuki 2008 bible

Romans 7

¹Aamwameme, one omu uvite ko shoka nda hala okutya, oshoka ompango omu yi shi. Ompango otayi pangele owala omuntu, manga e na omwenyo.

²Omukiintu ngoka e li moondjokana, ompango otayi mu mangele owala komulumentu gwe, manga omulumentu e na omwenyo. Ihe omulumentu ngele a si, nena omukiintu okwa manguluka mompango ya tya ngaaka.

³Onkee ngele omukiintu ota kala nomulumentu gulwe, manga omulumentu gwe e na omwenyo, nena oti ithanwa ohonda. Ihe ngele omulumentu gwe okwa si, nena omukiintu ngoka okwa manguluka pampango noita talwa we ta hondele, ngele ta hokanwa komulumentu gulwe.

⁴Osho nane wo aamwameme, omwa kwatunuka mo mompango, oshoka one iilyo yolutu lwaKristus. Ngashingeyi otse oyaanguka a yumudhwa kuusi, opo tu kale tu na okukalamwenyo kwo opalela Kalunga.

⁵Oshoka manga twa li tatu landula omadhiladhilo getu yene, uuhalu wuulunde wa penduthwa kompango owa kala tau longo mutse. Okukala kwa tya ngeyi otaku fala meso.

⁶Ihe ngashingeyi otwa manguluka mompango notwa kwatunuka mo mushoka sha li she tu ninga oonkwatwa. Onkee ihatu longo we pamukalo omukulu gwompango ndjoka ya nyolwa, ihe ohatu longele Kalunga muupe wOmbepo.

⁷Otatu ti ngiini ano? Ompango yo yene oyi na uulunde? Aawe, itashi vulika! Ihe ompango oya tseyithile ndje kutya uulunde oshike. Oshoka ando inandi tseya kutya okuhaluka oshike, ngele ompango inayi tya: “Ino haluka.”

⁸Uulunde owa mono ihe ompito mokulongitha oshipango nowa pendutha uuhalu wi ili nowi ili mungame. Oshoka uulunde otau kala wa sa, ngele kaku na ompango.

⁹Mokukala kwandje nale onda li inaandi tseya ompango, ihe oshipango sho she ya, uulunde owa ningi omwenyo,

¹⁰ngame e tandi si. Ano oshipango shoka sha li shi na okupa ndje omwenyo, oshe etele ndje eso.

¹¹Onkee ano uulunde owa mono ihe ompito okufundja ndje mokulongitha oshipango e tau dhipagitha ndje oshipango.

¹²Ompango yo yene oyo ondjapuki niipango yamo oyo iiyapuki, yi li mondjila niiwanawa.

¹³Ano shoka oshiwanawa oshe etele ndje eso? Aawe, itashi vulika! Eso olye etwa kuulunde. Uulunde owa longitha shoka oshiwanawa nowe etele ndje eso, opo u holoke puuyelele kutya owo uulunde. Ano mokulongitha oshipango uulunde owa holola kutya owo uulundelela.

¹⁴Otse otu shi shi kutya ompango oyopambepo, ihe ngame omuntu tandi ka sa, nda landithwa po ndi kale omupika guulunde.

¹⁵Kandi shi shi shoka tandi shi longo, oshoka ihandi longo shoka nda hala oku shi longa, ihe ohandi longo shoka ndi tonde.

¹⁶Ngele ano ohandi longo shoka inaandi shi hala, nena otandi zimine kutya ompango oyi li mondjila.

¹⁷Ano hangame we handi longo ngeyi, ihe uulunde mbuka wa kala mungame.

¹⁸Oshoka ondi shi shi kutya mungame, nokutya muuntu wandje kamu na nando uuwanawa washa. Oshoka nonando mungame omu na ehalo okulonga uuwanawa, itandi shi vulu.

¹⁹Uuwanawa mboka nda hala oku u ninga, ihandi u longo, ihe uuwinayi mboka inaandi u hala, owo he longo.

²⁰Ngele ohe longo shoka inaandi shi hala, nena otashi ti kutya hangame we handi shi longo, ihe uulunde mbuka wa kala mungame.

²¹Onkee ano mokukala kwandje ondi wete ompango ndjika kutya nando ndi kale nda hala okulonga uuwanawa, uuwinayi auke he longo.

²²Meni lyandje onda hokwa ompango yaKalunga.

²³Ihe ondi wete ompango onkwawo yi li molutu lwandje tayi kondjitha ndjoka ya ziminwa komadhiladhilo gandje. Oyo oya kwata ndje, ndi kale omupika gwompango yuulunde yi li molutu lwandje.

²⁴Ongame omuntu omukweyi! Olye ta mangulula ndje molutu nduka talu etele ndje eso?

²⁵Kalunga na hambelelwe omolwaJesus Kristus, Omuwa gwetu! Onkee ano ngame mwene ohandi longo owala pampango yaKalunga nomadhiladhilo gandje, ihe nuuntu wandje ohandi longo pampango yuulunde.