Read Oshindonga-Ombiimbeli Ondjapuki 2008 Romans 8 Bible Online

Romans 8 - Oshindonga-Ombiimbeli Ondjapuki 2008 bible

Romans 8

¹Ano ngashingeyi kaku na we epangulo lyokukanitha mboka ye li muukumwe naJesus Kristus.

²Oshoka otandi pangelwa kOmbepo ndjoka hayi gandja omwenyo kwaamboka ye li muukumwe naJesus Kristus. Oyo oya mangulula ndje mepangelo lyuulunde nolyeso.

³Kalunga okwa ningi shoka sha nyenge ompango moluunkundi womuntu. Oye okwa pangula uulunde momuntu, sho a tumu Omwana, ngoka e ya molupe lwomuntu omulunde, a kuthe po oondjo.

⁴Ngashingeyi otatu vulu okuvulika kushoka shu uka tashi pulwa kompango, oshoka ihatu endithwa kuuntu wetu, ihe okOmbepo yaKalunga.

⁵Mboka haa kala pahalo lyuuntu wawo, ohaa dhiladhila ngaashi uuntu wawo wa hala. Ihe mboka haa kala ngaashi Ombepo te ya lombwele, ohaa dhiladhila ngaashi Ombepo e shi hala.

⁶Okukala pamadhiladhilo guuntu otashi eta eso, ihe okukala mewiliko lyOmbepo otashi eta omwenyo nombili.

⁷Omuntu ngoka e na omadhiladhilo taga wilikwa kuuntu, oku tonde Kalunga, oshoka iha vulika kompango yaKalunga ye ita vulu okuvulika kuyo.

⁸Mboka haa vulika kuuntu wawo, itaa vulu okwoopalela Kalunga.

⁹Ihe ne itamu pangelwa kuuntu weni, ihe otamu pangelwa kOmbepo, ngele Ombepo yaKalunga oku li mune. Oshoka kehe ngoka kee na Ombepo yaKristus, ke shi wo gwaKristus.

¹⁰Ihe ngele Kristus oku li mune, Ombepo ote mu pe omwenyo, nonando olutu olwa sa moluulunde, oshoka omwa ningwa aayuuki koshipala shaKalunga.

¹¹Ngele Ombepo yaKalunga, ngoka a yumudha Jesus kuusi, tayi kala mune, nena oongoka a yumudha Kristus kuusi ota ka yumudha wo omalutu geni omasi koonkondo dhOmbepo tuu ngoka.

¹²Onkee ano, aamwameme, katu na okukala pahalo lyuuntu wetu.

¹³Oshoka ngele otamu kala pahalo lyuuntu weni, otashi mu etele eso. Ihe ngele otamu dhipaga iilonga yuulunde nOmbepo, nena otamu kala mu na omwenyo.

¹⁴Ayehe mboka haa endithwa kOmbepo yaKalunga, oyo aana yaKalunga.

¹⁵Ombepo ngoka mwe mu pewa kuKalunga, ke shi gwoku mu ninga aapika, mu kale muumbanda. Ombepo ote mu ningi aana yaKalunga, nokoonkondo dhe otatu igidha kuKalunga tatu ti: “Tate! Tate!”

¹⁶Ombepo yaKalunga oye mwene ta kwatathana noombepo dhetu mokuhempulula kutya otse aana yaKalunga.

¹⁷Ano ngele otse oyana, nena otatu ka pewa ashihe shoka Kalunga te ke shi pa aantu ye. Otatu ka pewa wo pamwe naKristus ashihe shoka e shi mu pungulila. Oshoka ngele twa faathana naKristus mokuhepekwa, otatu ka faathana wo naye meadhimo.

¹⁸Otandi tala kutya omahepeko ngoka tu ga na ngashingeyi, kage shi okuyelekwa neadhimo ndyoka tatu ke li hololelwa.

¹⁹Kehe shoka shomeshito otashi tegelele nondjuulukwe onene eholoko lyaana yaKalunga.

²⁰Oshoka kehe shimwe shomeshito osha gandjwa monkalo yaa na ekwatho, hakehalo lyasho shene, ihe oKalunga e shi utha. Ihe nando ongaaka, okwa kala etegameno,

²¹kutya oku na esiku ndyoka, uuna eshito alihe tali ka manguluka muupika weyonuuko, li ye memanguluko nomeadhimo lyaana yaKalunga.

²²Oshoka otu shi shi kutya sigo ongashingeyi kehe shimwe shomeshito otashi fudhagana kuuwehame wa fa mboka wopevalo lyokanona.

²³Ihe hayo ayike, ndele natse wo mboka tu na uutango womagano gOmbepo yaKalunga, otatu fudhagana meni lyetu twa tegelela, Kalunga e tu ninge oyana ye e tu hupithe.

²⁴Mokutegamena omo twa hupithilwa, oshoka ngele otu wete shoka twe shi tegamena, nena kashi shi we etegameno. Oshoka olye ta tegamene shoka e shi wete?

²⁵Ihe ngele tatu tegamene shoka kaatu shi wete, nena otatu shi tegamene neidhidhimiko.

²⁶Osho wo Ombepo ote tu kwatha muunkundi wetu. Oshoka katu shi nkene tu na okwiindila, ihe Ombepo oye mwene te tu galikanene nomifudho kaadhi shi kutumbulwa.

²⁷Ihe Kalunga ngoka ha mono muule womitima dhaantu, oku shi omadhiladhilo gOmbepo. Oshoka Ombepo sho ta galikanene aantu koshipala shaKalunga, ote shi ningi wo pahalo lyaKalunga.

²⁸Otse otu shi shi kutya Kalunga otu ukitha iinima ayihe, yi etele uuwanawa mboka ye mu hole. Oyo mboka Kalunga e ya ithana pamadhiladhilo ge.

²⁹Oshoka mboka e ya hogolola, okwe ya utha nale, ya ninge ya fa Omwana, opo Omwana a ninge omutango mokati kaamwayina oyendji.

³⁰Osho wo Kalunga okwi ithana mboka e ya hogolola. Oye ine ya ithana owala, ihe okwe ya ningi wo aayuuki koshipala she. Niishewe, ine ya ninga owala aayuuki, ihe okwe ya adhimitha wo.

³¹Otatu ti ngiini ano kombinga yaambika ayihe? Kalunga ngele oku li kombinga yetu, olye ta tsu ondumbo natse?

³²Oye ngoka ini ihupithila Omwana, ihe okwe mu gandja molwetu atuhe, oye ite tu pe ando iinima ayihe omagano?

³³Olye ta tamaneke aahogololwa yaKalunga? Kalunga oye mwene te ya mangulula.

³⁴Olye ta vulu oku ya pa oondjo? Jesus Kristus oye tuu nguka a si e ta yumudhwa nongashingeyi oku li kolulyo lwaKalunga te tu galikanene.

³⁵Olye ano te tu topola ko kohole yaKristus? Uudhigu ando tau shi ningi, nenge oothina nenge etidhagano, ondjala nenge oluhepo, oshiponga nenge eso?

³⁶Ongaashi enyolo tali ti: “Esiku alihe otse otu li popepi nokusa omolwoye, otse otwa ningwa ngaashi oonzi tadhi ka dhipagwa.”

³⁷Ihe mumbika ayihe otatu sindi nokusindilila omolwaangoka e tu hole.

³⁸Oshoka ondi shi shili kutya kaku na nando oshinima shimwe tashi vulu oku tu topola ko kohole yaKalunga: haeso nenge omwenyo, haayengeli nenge aapangeli naanankondo yomegulu, haambyoka yongashingeyi nenge mbyoka tayi ke ya,

³⁹hauyuni wokombanda nenge wokohi. Meshito kamu na sha tashi vulu oku tu topola ko kohole yaKalunga yi li muJesus Kristus, Omuwa gwetu.