Read Oshindonga-Ombiimbeli Ondjapuki 2008 1 Corinthians 10 Bible Online

1 Corinthians 10 - Oshindonga-Ombiimbeli Ondjapuki 2008 bible

1 Corinthians 10

¹Onkee ano aamwameme, onda hala oku mu dhimbulutha shoka sha li sha ningilwa ootate, sho ya li ya landula Moses. Ayehe oya li megameno lyoshikogo noinaa mona oshiponga mokutokola Efuta etiligane.

²Ayehe oya shashelwa moshikogo nomefuta mokulandula Moses.

³Oyo oya lile ayehe oshikwiila shimwe shopambepo

⁴noya nwine okunwa kumwe kwopambepo; oshoka oya nu momeya ga zi memanya lyopambepo ndyoka lye ende pamwe nayo; nemanya ndyoka oKristus.

⁵Onkene tuu oyendji yomuyo Kalunga ine ya hokwa, ihe omidhimba dhawo odha halakanene nombuga ayihe.

⁶Ano iinima ayihe ya tya ngeyi oyo iiholelwa yoku tu londodha, twaa longe iilonga iiwinayi, ngaashi yo ya ningile.

⁷Inatu simaneka iikalunga, ngaashi yamwe yomuyo ye shi ningi, nongaashi enyolo tali ti: “Aantu oya kuutumba e taa li yo taa nu noya tutula uudhano.”

⁸Inatu hondeleni, ngaashi yamwe yomuyo ya ningi; onkee oya yonwa po omayuvi omilongo mbali nagatatu mesiku limwe.

⁹Inatu hindeni Omuwa, ngaashi yamwe yomuyo ye shi ningi e taa dhipagwa komayoka.

¹⁰Inamu ngungutula, ngaashi yamwe yomuyo ye shi ningi e taa yonwa po komuyengeli gweso.

¹¹Iinima ayihe mbika oye ya adha, yi gune aantu yalwe noya nyolwa, yi tu londodhe. Oshoka otu li methimbo, uuna ehulilo li li popepi.

¹²Ngoka ta dhiladhila kutya okwa thikama, na kotoke, kaa gwile po.

¹³Emakelo ndyoka lye mu adha, olyo tuu ndyoka hali adha aantu ayehe, Kalunga oku shi kwiinekelwa. Onkee ite mu ethele memakelo li vule oonkondo dheni. Ihe ngele ta pitika, mu makelwe, ote mu pe ompito okuza mo mulyo noonkondo dhoku li humbata.

¹⁴Onkee ano, ookuume aaholike, inamu simaneka iikalunga.

¹⁵Otandi popi, ngaashi tandi lombwele aantu aanandunge; tokoleni ne yene okupopya kwandje.

¹⁶Oshitenga shomayambeko shono hatu hambelelele Kalunga nohatu shi nu nokupaathana, ihatu nu nani ombinzi yaKristus? Noshikwiila shono hatu topola, ihatu topolelathana nani olutu lwaKristus, uuna tatu shi li?

¹⁷Sho hatu li oshikwiila shimwe ashike, nonando otu li oyendji, otashi ulike kutya otse olutu lumwe, oshoka ohatu li oshikwiila shimwe.

¹⁸Ipuleni, Aaisraeli mboka ya pitikwa okulya momayambo ngoka taga etelwa Kalunga, oye na ekwatathano neyambelo.

¹⁹Onda hala okutya shike? Oshikalunga shoshene niikulya mbyoka tashi etelwa, otayi tu kwatha tuu sha?

²⁰Aawe, itayi kwatha sha. Onda hala okutya: omayambo ngoka taga yambelwa pomayambelo gopashipagani, itaga pewa Kalunga, ihe otaga pewa oombepo dhoompwidhuli. Ihe ngame inandi hala, mu kale mu na uukumwe noompwidhuli.

²¹Itashi vulika, mu nwe moshitenga shOmuwa e tamu ka nwa ishewe moshitenga shoompwidhuli. Nenge mu lye koshililo shOmuwa e tamu ka lya ishewe koshililo shoompwidhuli.

²²Nenge otwa hala okugeyitha Omuwa? Otu na tuu oonkondo dhi vule dhe?

²³Aantu yamwe otaa dhiladhila kutya oya pitikwa okuninga shaa shoka ye shi hala. Eeno osho, ihe haayihe iiwanawa. Ayihe otayi vulika okuningwa, ihe haayihe tayi kwatha.

²⁴Inaku kala nando omuntu ta longo owala shoka she mu opalela, ihe na tale wo shoka tashi opalele mukwawo.

²⁵Ne omwa pitikwa okulya ashihe tashi landithwa puutomeno, itamu pumbwa okupula sha omolweiyuvo lyeni.

²⁶Oshoka nenyolo wo otali ti: “Evi alihe olyOmuwa nakehe shoka shi li mo.”

²⁷Omuntu kee shi omwiitaali ngele te ku ithana, u lye koshililo pamwe naye, nowa tokola oku shi ninga, lya ashihe shoka to pewa. Ito pumbwa okupula sha omolweiyuvo lyoye.

²⁸Ihe uuna to lombwelwa taku tiwa: “Iikulya mbika oya yambelwa iikalunga,” ino lya iikulya ya tya ngaaka omolweiyuvo lyaangoka e ku lombwele nolyoye mwene.

²⁹Shoka shi na oshilonga mpaka, kashi shi eiyuvo lyoye mwene, ihe olyamukweni. Omuntu gumwe ota vulu okupula ta ti: “Omolwashike okukala kwandje ku na okupangelwa keiyuvo lyamukwetu?

³⁰Ngele ohandi hambelele Kalunga molwiikulya yandje, omolwashike ndi na okupewa uusama molwiikulya handi yi hambelelele Kalunga?”

³¹Onkee ano mwaashihe shoka tamu ningi, ngele tamu li nenge tamu nu, longeni ayihe nokusimanekitha Kalunga.

³²Kotokeni, mwaa pukithe Aajuda naapagani nenge egongalo lyaKalunga.

³³Holelii ndje. Ngame itandi landula nando shoka sho opalela ndje, ihe ooshoka sho opalela yakwetu ayehe, ya hupithwe.