Read Oshindonga-Ombiimbeli Ondjapuki 2008 1 Corinthians 12 Bible Online

1 Corinthians 12 - Oshindonga-Ombiimbeli Ondjapuki 2008 bible

1 Corinthians 12

¹Ano ngashingeyi otandi popi kombinga yomagano ngoka Ombepo Ondjapuki te ga gandja. Aamwameme, onda hala, mu tseye oshili ayihe kombinga yago.

²Ne omu shi shi kutya, sho mwa li aapagani, omwa li hamu pangelwa kiikalunga ya sa e tayi mu pukitha.

³Ne omu na okutseya kutya kaku na nando omuntu ta wilikwa kOmbepo yaKalunga, ta vulu okutya: “Jesus na kale a thingwa!” No kaku na omuntu ta vulu okuhempulula: “Jesus oye Omuwa,” ngele ita wilikwa kOmbepo Ondjapuki.

⁴Omagano gopambepo oge li po ogendji gi ili nogi ili, ihe Ombepo gumwe awike te ga gandja.

⁵Oku na oompito dhomayakulo dhi ili nodhi ili, ihe Omuwa ngoka ta yakulwa, gumwe awike.

⁶Oku na omaunkulungu gi ili nogi ili gokuyakula, ihe Kalunga gumwe awike ngoka ta pe kehe gumwe uunkulungu momayakulo agehe.

⁷Eholoko lyOmbepo momuntu kehe oli ili, ihe ayihe otayi ningi ekwatho lyaayehe.

⁸Omuntu gumwe ota pewa kOmbepo okupopya nuunongo, manga mukwawo ta pewa okutseya kOmbepo tuu ngoka.

⁹Omuntu gumwe ota pewa eitaalo kOmbepo, manga mukwawo ta pewa oonkondo dhokwaaludha aavu kOmbepo tuu ngoka.

¹⁰Omuntu gumwe ota pewa omagano gokulonga iikumithalonga, gumwe ishewe ota pewa omagano gokupopya elaka lyaKalunga nagumwe ota pewa omagano gokumona eyooloko pokati komagano ga za mOmbepo Ondjapuki naangoka inaaga za mOmbepo Ondjapuki. Omuntu gumwe ota pewa omagano gokupopya omalaka gaa shiwike, nagumwe ota pewa omagano goku ga fatulula.

¹¹Ihe ombepo oye tuu ngoka gumwe, ngoka ta longo ayihe mbika, oye ta gandja omagano gi ili kukehe gumwe pahalo lye mwene.

¹²Oshoka Kristus okwa fa olutu lu na iilyo oyindji, ihe lumwe aluke, nonando olwa tungwa miilyo yi ili noyi ili.

¹³Osho tuu wo tseni atuheni, Aajuda naapagani, aapika naavalwa, otwa shashelwa molutu lumwe kOmbepo tuu ngoka notwa nwethwa Ombepo tuu ngoka gumwe.

¹⁴Oshoka olutu inalu tungwa noshilyo shimwe, ihe olwa tungwa niilyo oyindji.

¹⁵Ompadhi ando tayi ti: “Ngame kandi shi gwomolutu, oshoka kandi shi oshikaha,” shika itashi yi ningi, yi kale yaa shi yomolutu.

¹⁶Nongele okutsi taku ti: “Ngame kandi shi gwomolutu, oshoka kandi shi eho,” shika itashi ku ningi, ku kale kwaa shi kwomolutu.

¹⁷Ngele ando olutu aluhe olwa li eho, otalu vulu ngiini okuuva? Nongele ando olwa li okutsi, otalu vulu tuu okunika?

¹⁸Onkee ano Kalunga oye a tula iilyo yi ili noyi ili molutu pahalo lye mwene.

¹⁹Oshilyo shimwe itashi vulu okuninga olutu.

²⁰Onkee ano olutu olwo lumwe niilyo oyindji.

²¹Onkee ano eho itali vulu okulombwela oshikaha kutya inali shi pumbwa. Nomutse itagu vulu okulombwela oompadhi kutya inagu dhi pumbwa.

²²Itashi vulika! Iilyo mbyoka tatu yi tala ya fa iinkundi, olutu olwe yi pumbwa unene.

²³Naambyoka tatu tala ya fa yaa na esimano, oyo ohatu yi sile oshimpwiyu. Naambyoka twa sa ohoni, ohatu yi siikile nawa

²⁴shi vulithe iilyo yetu mbiyaka yo opala. Kalunga mwene okwa tula kumwe omalutu getu pamukalo gwa tya ngeyi kutya okwa gandja esimano kiilyo mbyoka yaa li na.

²⁵Onkee ano kamu na etopoko molutu, ihe iilyo yalwo yi ili noyi ili ohayi silathana oshimpwiyu.

²⁶Oshilyo shimwe shomolutu ngele tashi ehama, nena iilyo ayihe otayi ehama pamwe nasho. Nongele shimwe otashi simanekwa, nena iilyo ayihe otayi nyanyukwa pamwe nasho.

²⁷One olutu lwaKristus, nakehe gumwe oye oshilyo shomolutu tuu ndoka.

²⁸Kalunga okwa langeke ayehe megongalo pomahala gawo. Yamwe oya ningi aayapostoli, yamwe aahunganeki, yamwe aalongihapu. Omu na wo mboka haa longo iikumithalonga, taku landula mboka ya pewa oonkondo dhokwaaludha, okuyakula, okuwilika nenge okupopya omalaka gaa shiwike.

²⁹Haayehe aayapostoli nenge aahunganeki nenge aalongihapu. Haayehe ye na oonkondo dhokulonga iikumithalonga,

³⁰nenge ye na omagano gokwaaludha omavu, nenge gokupopya omalaka gaa shiwike nenge goku ga fatulula.

³¹Ihaleleni omagano ngoka ge vule omakwawo. Oshiholelwa oshiwanawa shi vule ayihe, osho shika tashi landula mpaka.