Read Oshindonga-Ombiimbeli Ondjapuki 2008 1 Corinthians 15 Bible Online

1 Corinthians 15 - Oshindonga-Ombiimbeli Ondjapuki 2008 bible

1 Corinthians 15

¹Aamwameme, onda hala, ndi mu dhimbuluthe kombinga yelaka etoye ndyoka nde mu uvithile, ndyoka mwa taamba nokulyo okwi ikwatalela eitaalo lyeni.

²Olyo evaangeli, ohapu ndjoka nde mu uvithile. Olyo otali mu hupitha, ngele tamu li dhiginine, ngele inamu itaala osima yowala.

³Ngame onde mu tseyithile oshinima shi vule ayihe, ngaashi ngame nde shi pewa wo kutya Kristus okwa si omolwoondjo dhetu, ongaashi sha nyolwa mOmanyolo;

⁴Okwa fumvikwa e ta yumudhwa kuusi mesiku etitatu, ngaashi kwa nyolwa mOmanyolo;

⁵okwi ihololele Petrus, nokonima aayapostoli ayehe omulongo nayaali.

⁶Nena okwi ihololele ishewe aalanduli ye ye vule omathele gatano polumwe. Oyendji yomuyo oye na omwenyo natango, nonando yamwe oya sa.

⁷Nena okwi ihololele Jakob nokonima aayapostoli ayehe.

⁸Hugunina okwi ihololele ndje wo, nonando ngame onda fa omuntu ngoka a pononwa.

⁹Oshoka ngame ondi vulike kaayapostoli ayehe noinandi gwana, ndi ithanwe omuyapostoli, oshoka onda tidhaganene egongalo lyaKalunga.

¹⁰Ihe omolwesilohenda lyaKalunga ngame ondi li ngaashi ndi li, nesilohenda lye inali kala lyaa na oshilonga kungame. Ihe onda longo unene ndi vule aayapostoli yalwe ayehe, nonando hakungame mwene nda vulu oku shi ninga, ihe esilohenda lyaKalunga lya longitha ndje.

¹¹Ano kashi na mbudhi kutya olye te shi ningi, ngele ongame nenge oyo, shika osho hatu uvitha, nomwe shi itaala.

¹²Ano sho tatu uvitha kutya Kristus okwa yumudhwa kuusi, ongiini ano, sho ku na yamwe taa ti kutya aasi itaa ka yumudhwa kuusi?

¹³Ngele oshinima sha tya ngawo oshoshili, nena otashi ti, Kristus wo ina yumudhwa;

¹⁴nongele Kristus ina yumudhwa kuusi, nena katu na sha shokuuvitha, nane kamu na sha shokwiitaala.

¹⁵Nena otatu lundile Kalunga, sho tatu ti, okwa yumudha Kristus kuusi, ye ine mu yumudha, ngele aasi itaa yumudhwa.

¹⁶Oshoka ngele aasi itaa yumudhwa kuusi, nena naKristus wo ina yumudhwa.

¹⁷Nongele Kristus ina yumudhwa kuusi, nena eitaalo lyeni kali na oshilonga, nane omwa kanena natango muulunde.

¹⁸Nena ando otashi ti kutya naamboka ya sa nale yo yi itaala Kristus, oya kana.

¹⁹Ngele etegameno lyetu muKristus oshinima shokombanda yevi owala, inaaku tegelelwa we sha shilwe, nena tse aantu aakweyi tu vulike kaantu ayehe.

²⁰Ihe oshili oyo ndjika: Kristus okwa yumudhwa kuusi. Shika otashi koleke kutya mboka ya kotha muusi ngashingeyi, otaa ka yumudhwa wo.

²¹Oshoka ngaashi eso lye ya muuyuni omolwomuntu gumwe, osho neyumuko wo otali ningwa omolwomuntu gumwe.

²²Oshoka ngaashi aantu ayehe ye na okusa omoluukumwe wawo naAdam, osho wo aantu ayehe otaa ka yumudhwa omolwuukumwe wawo naKristus.

²³Ihe kehe gumwe opalufo lwe: Omutango kwaayehe oKristus, notaku landula mboka yaKristus, uuna ndoka te ke ya.

²⁴Nena otaku ya ihe ehulilo; Kristus ota ka sinda ihe aapangeli yomombepo, omapangelo noonkondo nota ka gandja oshilongo kuTate Kalunga.

²⁵Oshoka Kristus oku na okupangela, sigo Kalunga a sindi aatondi ayehe e te ya tula kohi yoompadhi dhaKristus.

²⁶Omutondi gwahugunina e na okusindwa, oye eso.

²⁷Oshoka enyolo otali ti: “Kalunga okwa tula iinima ayihe kohi yoompadhi dhaKristus.” Shika osha yela kutya iitya mbika “iinima ayihe” inayi kwatela mo Kalunga ye mwene, ngoka ta tula iinima ayihe kohi yoompadhi dhaKristus.

²⁸Ihe uuna iinima ayihe ya tulwa mepangelo lyaKristus, nena Omwana oti itula wo ye mwene kohi yepangelo lyaKalunga, ngoka a tula iinima ayihe kohi yepangelo lye; naKalunga ota ka ninga oye awike omupangeli gwaayihe.

²⁹Ihe ongiini kombinga yaantu mboka taa ishashitha medhina lyaasi? Otashi ya kwatha shike? Ngele aasi itaa ka yumudhwa, ngaashi taa ti, omolwashike tayi ishashitha medhina lyaasi?

³⁰Natse wo omolwashike tatu itula miiponga otundi kehe?

³¹Aamwameme, ngame onda taalelwa keso esiku kehe. Otandi vulu okupopya ngeyi, oshoka ondu uvite uuntsa omolweni mokukalamwenyo kwetweni muKristus Jesus, Omuwa gwetu.

³²Ngele muEfeso onda kondjele pantu niilikama, osha kwatha ndje shike? Ngele aasi itaa ka yumudhwa, nena “Tu lyeni tse tu nweni, oshoka ngula otatu si”, ngaashi eyele tali ti.

³³Inamu pukithwa. “We ende nombudhi, nangoye oto ningi ombudhi.”

³⁴Ningeni aanandunge ne mu ethe uulunde. Otandi shi popi oku mu sitha ohoni kutya yamwe yomune inaa tseya Kalunga.

³⁵Aantu yamwe otaa pula taa ti: “Otashi vulika ngiini, aasi ya yumudhwe? Otaa ka kala ye na omalutu ga tya ngiini?”

³⁶Aagoya ne! Uuna to kunu ombuto mevi, ndishi ihayi mene, manga inaayi sila mo?

³⁷Shoka to kunu mevi, osho omuma yowala, ongele oyehangu nenge oyoludhi lulwe, kayi shi oshimeno shoshene shoka sha koka.

³⁸Kalunga ota pe omuma ya tya ngaaka omuno, ngaashi a hala; kehe tuu omuma ote yi pe omuno gwayo.

³⁹Onyama yiinamwenyo ayihe inayi faathana; onyama yaantu oyi ili, yiimuna noyiiyamakuti oyi ili, yoondhila oyi ili noyoohi oyi ili.

⁴⁰Oku na omalutu gomegulu nomalutu gokevi; eadhimo lyomalutu gomegulu oli ili, neadhimo lyomalutu gokevi oli ili,

⁴¹etango oli na eadhimo lyalyo li ili, lyomwedhi oli ili nolyoonyothi oli ili, nomokati koonyothi dhodhene omu na omayooloko.

⁴²Osho naanaa tashi ka kala mokuyumudhwa kwaasi. Mevi otamu pakwa olutu lweyonuuko, mokuyumudhwa tamu zi olutu lwokwaayonuuka.

⁴³Otamu pakwa olutu lwa shunduka, ihe olutu lwa yumudhwa olwa sheneka. Otamu pakwa olutu luunkundi, mo tamu yumudhwa olutu luukolele.

⁴⁴Olutu ndoka talu pakwa, otalu vulu okugumwa, ihe ndoka lwa yumudhwa, otalu ka kala lwopambepo. Ngaashi ku na olutu talu vulu okugumwa, osho wo oku na olutu lwopambepo.

⁴⁵Oshoka enyolo otali ti: “Omuntu gwotango Adam okwa ningi omunamwenyo.” Adam ngoka a hugunine oye Ombepo tayi gandja omwenyo.

⁴⁶Shoka shopambepo hasho shotango, ihe ooshoka tashi vulu okugumwa, opo ihe shoka shopambepo.

⁴⁷Adam gwotango okwa shitwa montsi yevi; Adam omutiyali okwa zi megulu.

⁴⁸Aantu mboka yokevi oya faathana naangoka a shitwa montsi yevi; mboka yomegulu oya faathana naangoka a za megulu.

⁴⁹Ngaashi twa zala uukwatya womuntu ngoka a shitwa montsi yevi, osho wo tatu ka zala uukwatya wOmuntu gwomegulu.

⁵⁰Aamwameme, onda hala okutya: Olutu nduka lwonyama nombinzi italu vulu okuya mOshilongo shaKalunga, naashoka shi na okusa, itashi vulu okukala itaashi ka sa.

⁵¹Pulakeneni oshiholekwa: Itatu ka seni atuheni, ihe otatu ka shitululweni ombaadhilila,

⁵²ongepathimo lyeho, uuna enkuma lyahugunina tali ka hika. Oshoka uuna tali tameke okuhika, aasi otaa ka yumudhwa nomalutu itaaga si we, nena atuheni otatu ka shitululwa.

⁵³Oshoka shoka tashi ka yonuka po, oshi na okwiizaleka shoka itaashi ka yonuka po; naashoka tashi ka sa, oshi na okwiizaleka shoka itaashi si.

⁵⁴Ano uuna shoka tashi ka sa, sha zalekwa shoka itaashi si, nena enyolo otali ka gwanithwa ndyoka tali ti: “Eso lya sindwa, olya yonwa po sheke.”

⁵⁵“So ngoye, esindano lyoye oli li peni? “So ngoye, oonkondo dhoye dhokweehameka odhi li peni?”

⁵⁶Uulunde owo tau pe eso oonkondo dhokweehameka, nuulunde otau pewa oonkondo kompango.

⁵⁷Ihe Kalunga na hambelelwe, ngoka te tu pe esindano molwOmuwa gwetu Jesus Kristus!

⁵⁸Onkee ano aamwameme ne aaholike, kaleni mwi ikolelela, mwaa tenguke. Kaleni mwi ipyakidhila aluhe niilonga yOmuwa, oshoka omu shi shi kutya ashihe shoka tamu ningile Omuwa, otashi tompola sha.