Read Oshindonga-Ombiimbeli Ondjapuki 2008 1 Corinthians 16 Bible Online

1 Corinthians 16 - Oshindonga-Ombiimbeli Ondjapuki 2008 bible

1 Corinthians 16

¹Kombinga yegongelo lyiimaliwa yokukwatha aantu yaKalunga yomuJudea, ne omu na okuninga shoka nda lombwele omagongalo gomuGalatia.

²Mesiku lyotango lyoshiwike kehe, kehe gumwe gwomune na yoolole iimaliwa yasha pakulikola kwe e te yi pungula, opo kwaa ka kale we ompumbwe yokugongela iimaliwa, uuna tandi ke ya.

³Ngele nde ya, otandi ka tuma aalumentu yamwe mboka mwa zimina, ya ye noontumwafo dhomayelithilo, ya fale omagano geni kuJerusalem.

⁴Ngele ondi wete sho opalela ndje okuya, nena nayo wo otaa ka ya pamwe nangame.

⁵Otandi ke ya, ndi mu talele po, ngele nda pitile muMakedonia, oshoka ondi na oku shi ninga.

⁶Ngiika otandi ka menekela pune okufu akuhe nokuli, nena otamu ka vula ihe okuthindikila ndje shaa nkoka tandi ka ya.

⁷Oshoka inandi hala ndi mu talele po nokupita owala pune ngashingeyi. Onda tegamena okumenekela pune ethimbo ele, Omuwa ngele okwe shi hala.

⁸Ihe ondi na edhiladhilo okukala muEfeso sigo okesiku lyaPentekoste.

⁹Oshoka mpaka opu na ompito okulonga oshilonga shika oshinene nosha simana, nonando opu na aakondjithi oyendji.

¹⁰Timoteus ngele te ya, mu taambeni nawa, oshoka ota longele Omuwa ngaashi naanaa ngame.

¹¹Inaku kala nando ogumwe te mu dhini, ihe omu na oku mu kwatha nawa, opo a vule okutsikila olweendo lwe nombili, sigo ta galukile kungame; oshoka onde mu tegelela, e ye pamwe nooyitaali yalwe aalumentu.

¹²Omumwatate Apollos onde mu kumagidha olwindji, e mu talele po pamwe nooyitaali yalwe aalumentu, ihe ke shi wo nawa, ngele ota vulu oku shi ninga ngashingeyi. Ote ke ya, uuna ta ka mona ompito.

¹³Kotokeni, ne mu kale mwa kola meitaalo. Kaleni aanankondo mwaa na uumbanda.

¹⁴Longeni iilonga yeni ayihe nokupangelwa kohole.

¹⁵Stefanas naanegumbo ye omu ya shi; oyo ya ningi tango aakriste muGreka noyi igandjele oshilonga shokuyakula aantu yaKalunga. Aamwameme, otandi mu kumagidha,

¹⁶mu landule oshiholelwa shaantu ya tya ngeyi noshakehe ngoka ta longo nota yakula pamwe nayo.

¹⁷Onda nyanyukilwa etalelopo lyaStefanas, Fortunatus naAkaikus, oshoka oye li pungame pehala lyeni.

¹⁸Oyo oya nyanyudha ndje naanaa, ngaashi ye mu nyanyudha wo. Aalumentu ya tya ngeyi oyi ilongela okusimanekwa.

¹⁹Omagongalo gomoshitopolwa shaAsia otage mu kundile po. Akula naPriskila negongalo ndyoka hali gongala maandjawo, otaye mu kundile po unene medhina lyOmuwa.

²⁰Ooitaali ayehe ooyakweni yaahuka otaye mu kundile po. Kundilathanii po nohole yaamwayinathana.

²¹Otandi nyola noshikaha shandje mwene: Omakundo ga zi kuPaulus.

²²Kehe ngoka kee hole Omuwa, na tulwe omutima. Maranata — Ila, Omuwa gwetu!

²³Esilohenda lyOmuwa Jesus nali kale nane.

²⁴Ondi mu hole amuhe muKristus Jesus.