Read Oshindonga-Ombiimbeli Ondjapuki 2008 1 Corinthians 6 Bible Online

1 Corinthians 6 - Oshindonga-Ombiimbeli Ondjapuki 2008 bible

1 Corinthians 6

¹Ngele mokati keni omu na omuntu e na oontamanana nomukriste mukwawo, otashi vulika ngiini, a ye kaapanguli aapagani? Ndishi aantu yaKalunga oye na okwoopaleka oontamanana dhomokati kawo yene?

²Nenge kamu shi shi kutya aantu yaKalunga otaa ka pangula uuyuni? Ngele ano otamu ka pangula uuyuni, itamu vulu ando okutokola iinima iishona?

³Kamu shi shi kutya otatu ka panguleni aayengeli? Ano okutokola iinima mbika yomokukalamwenyo kwongashingeyi okwe tu nyenge andola?

⁴Ngele ano iinima ya tya ngeyi tayi holoka, otamu ke yi fala, yi ka tokolwe kaantu ya dhinika megongalo?

⁵Omu na okukala mwa sa ohoni! Kape na omalimbililo, mokati keni omu na omulumentu omunandunge ta vulu okutokola oohapu dhayakwawo.

⁶Ihe ne otamu ningi ngaaka kutya omukwanegongalo ota yi kompangu e na oohapu nomukwanegongalo mukwawo notaa pangulwa kaapanguli kaaye shi ooyitaali.

⁷Itashi mu kwatha nando osha, sho mu na oontamanana mokati keni yene. Omolwashike itaamu pitika, mu ningwe nayi? Omolwashike itaamu pitika, mu yugwe?

⁸Ihe ne ohamu ningilathana uuwinayi nohamu yugu naangoka wo omukriste mukweni.

⁹One omu shi shi kutya aakolokoshi itaa ka ya mOshilongo shaKalunga. Inamu ipukitha. Aantu mboka aaholume, aasimaneki yiimenka, aahondeli, omashenge naalali nomashenge,

¹⁰aafuthi, aanalwiho, oonkolwi, aasheki naayugi, kaku na nando ogumwe gwomaantu ya tya ngeyi ta ka ya mOshilongo shaKalunga.

¹¹Yamwe yomune osho mwa li mwa tya ngaaka. Ihe omwa yogwa oondjo, omwa yoololelwa Kalunga, omwa ningwa aayuuki koshipala shaKalunga omolwOmuwa Jesus Kristus okOmbepo Ondjapuki yaKalunga.

¹²Omuntu gumwe ota vulu okutya: “Ngame onda pitikwa okuninga shaa shoka.” Eeno, ou li mondjila, ihe haayihe ye ku opalela. Ngame otandi vulu okutya onda pitikwa okuninga shaa shoka, ihe itandi etha nando osha, shi ninge ndje omupika.

¹³Gulwe ota vulu okutya: “Iikulya oya dhiladhililwa ela, nela olya dhiladhililwa iikulya.” Eeno osho, ihe Kalunga ota ka hulitha po ayihe iyali. Olutu lwomuntu inalu tulilwa po uuholume, aawe, olwo olwOmuwa, nOmuwa oye mwene gwalwo.

¹⁴Kalunga oye a yumudha Omuwa kuusi, onkee ote ke tu yumudha wo noonkondo dhe kuusi.

¹⁵Ne kamu shi shi kutya omalutu geni ogo iilyo yolutu lwaKristus? Otandi vulu tuu okukutha oshilyo sholutu lwaKristus e tandi shi ningi oshilyo sholutu lwohonda? Itashi vulika!

¹⁶Nenge kamu shi shi kutya omulumentu kehe ngoka ta hangana nohonda, ota ningi olutu lumwe nayo? Enyolo otali popi sha yela tali ti: “Ayehe yaali otaa ningi omuntu gumwe.”

¹⁷Onkee ano ngoka ta hangana nOmuwa, ota ningi omuntu gumwe naye pambepo.

¹⁸Yandeni oluhondelo. Uulunde kehe ulwe omuntu te u ningi, itau mu kwata kolutu; ihe omuntu ngoka ta hondele, ota yono kolutu lwe mwene.

¹⁹Kamu shi shi nani, kutya omalutu geni ogo otempeli yOmbepo Ondjapuki? Ombepo ngoka oku li mune nomwe mu pewa kuKalunga. Kamu shi yeni yene, ihe oyaKalunga.

²⁰Kalunga okwe mu kulile niikulila yi na ondilo. Omalutu geni naga simanekithe ano Kalunga.