Read Oshindonga-Ombiimbeli Ondjapuki 2008 1 Corinthians 9 Bible Online

1 Corinthians 9 - Oshindonga-Ombiimbeli Ondjapuki 2008 bible

1 Corinthians 9

¹Kandi na emanguluko nani? Kandi shi omuyapostoli? Omuwa gwetu Jesus inandi mu mona nani? Ne kamu shi nani iiyimati yoshilonga shandje medhina lyOmuwa?

²Nonando oku kale ku na yalwe itaa tala ndje omuyapostoli, ngame omuyapostoli gweni. Okuninga kweni aakriste okwo taku holola kutya ngame omuyapostoli.

³Eipopilo lyandje kumboka taa nikanika ndje, olyo ndika:

⁴Kandi na epitikilo okupewa iikulya nokunwa sha miilonga yandje?

⁵Kandi na epitikilo okuninga, ngaashi aayapostoli yalwe taa vulu okuninga? Itandi vulu okweenda pamwe nomukiintu omukriste, ngaashi aamwayina yOmuwa aalumentu nosho wo Petrus haa vulu oku shi ninga?

⁶Nenge tse naBarnabas otse atuke tu na okulonga, tu mone iipalutha?

⁷Olye u uva nando olumwe omukwiita ti ifutile ye mwene oompumbwe dhomoshilonga she? Nenge omunepya ita li iiyimati yomepya lye? Nenge omusita ita li omahini ngoka ta kanda miimuna ye?

⁸Haiholelwa mbika ayike tayi popile ndje, oshoka ompango wo otayi popi oshinima tuu shoka.

⁹Otatu lesha mompango yaMoses: “Ino manga okana konani ndjoka tayi yungula nokulyatagulithwa iilya molupale.” Ngashingeyi Kalunga ota holola ando kutya oku na oshimpwiyu noonani?

¹⁰Hatse ta popi nani menyolo ndika? Eeno, shika osha nyolwa omolwetu. Omupululi nomuteyi naa gwanithe iilonga yawo ye na etegameno kutya kehe gumwe ota ka mona oshitopolwa she miilya mbyoka, ngele ya pu okuyelwa.

¹¹Tse otwa kunu ombuto yopambepo mokati keni. Ne itamu vulu ando oku tu pa iikwatha yopalutu?

¹²Ngele yalwe oye na epitikilo lyokutegelela okupewa kune, tse mbela itatu tegelele oshindji tu ya vule? Ihe tse inatu longitha ompito ndjika. Otse otwi idhidhimike moshinima kehe, opo twaa tule eimbo meuvitho lyelaka etoye tali popi Kristus.

¹³Ne omu shi shi kutya aantu mboka haa longo iilonga yomotempeli, oye na okumona iikulya motempeli, naamboka haa yamba omayambo koshiyambelo, oye na okupewa oshitopolwa momayambo ngoka.

¹⁴Osho wo Omuwa oku utha kutya mboka haa uvitha evaangeli, ya pewe kulyo oompumbwe dhawo dhesiku kehe.

¹⁵Ihe ngame inandi longitha nando ompito yimwe yaandhika. Osho wo itandi nyola, opo ndi longithe oompito ndhika kombinga yandje mwene. Okusa okuhwepo kungame. Kaku na ngoka ta vulu okuninga eitango lyandje, li kale lyaa na oshilonga.

¹⁶Kandi na owala epitikilo lyokwiitanga owala, sho handi uvitha evaangeli, ihe ondu uvite ethiminiko, ndi shi ninge. Iihuna yowala, ngele itandi uvitha evaangeli!

¹⁷Oshoka ando okwa li tandi longo pahogololo lyandje mwene, ando ote vulu okutegelela, ndi pewe ondjambi yiilonga yandje. Ihe ngashingeyi itandi longo pahogololo lyandje mwene; oshilonga shika onde shi pewa, shi kale oshinakugwanithwa shandje.

¹⁸Ano ondjambi yandje oyini? Ondjambi yandje oyo uuthemba wokuuvitha elaka etoye itee pewa sha noitandi ulike omapitikilo ngoka ndi na mokuuvitha kwandje.

¹⁹Oshoka nando kandi li muupika waantu, ondi iningi omupika gwakehe gumwe, opo ndi likolele Kristus aantu oyendji.

²⁰Mokulonga mokati kAajuda onda kala ngaashi Omujuda, opo ndi likole Aajuda. Nonando ngame inandi pangelwa kompango yaMoses, ondi li kohi yompango.

²¹Osho tuu wo, sho nda kala mokati kaapagani, onda kala ndaa na ompango yAaJuda, opo ndi ya likolele Kristus. Shika itashi ti, onda dhina ompango yaKalunga, oshoka ngame otandi pangelwa kompango yaKristus.

²²Sho nda kala mokati kaankundi meitaalo, onda kala nda fa omunkundi, opo ndi ya likolele Kristus. Onkee ano onda ningi ashihe shoka tandi shi vulu omolwaayehe, opo ndi hupithe yamwe yomuyo komukalo kehe tagu vulika.

²³Ayihe mbika otandi yi ningi omolwevaangeli, opo nangame wo ndi mone omayambeko ngoka taga zi mulyo.

²⁴Ne omu shi shi kutya aantu mboka taa ningi shanamutango, ayehe otaa matuka, ihe gumwe awike ta mono ondjambi yesindano. Nane wo matukeni ngaangoka, mu yi mone.

²⁵Omuthigathani kehe oha mono edheulo, nkene e na okuvulika koompango dhomethigathano. Oye ote shi ningi, a zalekwe oshishani shoka tashi ka yonuka, ihe tse otatu shi ningi, tu zalekwe oshishani shaaluhe.

²⁶Omolwaasho ngame ndi na okumatuka ndu ukilila ethikilo. Ngame onda fa omulumentu enyakwa ihaa palutha mokudhenga noongonyo.

²⁷Onda kolondeke olutu lwandje noku lu dhenga, ndi lu vulikithe, opo ndaa ninge ngoka handi uvithile yakwetu, ngame mwene e tandi ekelwahi.