Read Oshindonga-Ombiimbeli Ondjapuki 2008 2 Corinthians 11 Bible Online

2 Corinthians 11 - Oshindonga-Ombiimbeli Ondjapuki 2008 bible

2 Corinthians 11

¹Onda hala, mu idhidhimikile ndje nuuna ndoka wo nda fa nda nika uugoya. Alikana, idhidhimikilii ndje!

²Ngame onde mu sila efupa, ndele naKalunga osho e li. Oshoka ne omwa fa omukadhona omuyelele, ngoka nda kongela omulumentu gumwe awike, oKristus.

³Ngame onda tila kutya pamwe oondunge dheni otadhi yonuka e tamu ke etha po okukala aantu yaKristus, ngaashi Eva a pukithwa koondunge dhomakoto geyoka.

⁴Oshoka ohamu idhidhimikile nenyanyu shaa ngoka te ya kune tu uvitha Jesus gulwe i ili kee shi ngoka twa uvitha. Omwa taamba wo ombepo nevaangeli lilwe, ndyoka inaali fa ombepo nevaangeli ndyoka mwe li taamba kutse.

⁵Ngame itandi dhiladhila ando kutya ondi vulike kaayapostoli yeni mboka aanene.

⁶Otashi vulika ndaa shi enyakwa mokupopya, ihe ondi na ngaa oondunge. Shika otwe shi mu tseyithile aluhe pamikalo odhindji.

⁷Ngame sho nde mu uvithile elaka etoye lya za kuKalunga, inandi mu pula nando osha. Ngame ondi ifupipike, opo ndi mu nenepeke. Nenge onda puka?

⁸Manga nda li tandi longo mokati keni, onda li tandi futwa komagongalo galwe. Nandi tye, onde ga yugu, opo ndi mu kwathe.

⁹Ethimbo ndyoka nda kala pune, inandi mu pula iimaliwa, nonando onda li nde yi pumbwa, oshoka aamwameme mboka ya zi kuMakedonia, oye etele ndje ashihe shoka nda li nda pumbwa. Ngashika sha kala methimbo lya piti, osho wo tashi ka kala nokomeho kutya ngame inandi hala oku mu etela uudhigu nando owasha.

¹⁰Omolwoshili yaKristus, ndjoka yi li mungame? Otandi uvaneke kutya eitango ndika lyandje kali na nando mpoka tali ka mwenekwa mevi alihe lyAagreka.

¹¹Omolwashike tandi popi ngeyi? Omolwaasho ando ndaa mu hole? Kalunga oku shi shi kutya ondi mu hole.

¹²Ngashingeyi otandi tsikile owala naashoka tandi shi longo, opo aayapostoli mboka yalwe yaa vule okumona etompelo lyokwiitanga kutya otaa longo pamukalo ngaangoka tatu longo.

¹³Aalumentu ya tya ngaaka kaye shi aayapostoli yashili, ihe oyo aafundja. Oyo otaa longitha iifundja miilonga yawo notayi iningi ya kale ya fa aayapostoli yaKristus.

¹⁴Eeno, shika itashi kumitha! Oshoka naSatana ota vulu okwiishitukitha, a kale a fa omuyengeli guuyelele.

¹⁵Onkee ano itashi kumitha, ngele aayakuli yaSatana otayi ishitukitha, ya kale ongaayakuli aawanawa. Ihe hugunina otaa ka pewa shoka yi ilongela.

¹⁶Otandi shi endulula natango: Inaku kala nando ogumwe ta tala ndje kutya ngame egoya. Ihe ngele otamu shi ningi, nena taambii ndje ano ongegoya. Osho ngeyi otandi vulu ihe okwiitanga.

¹⁷Eeno, shoka tandi popi ngashingeyi, hasho shoka Omuwa a hala, ndi popye. Moshinima shika shokwiitanga ote popi lela ongegoya.

¹⁸Ihe sho pe na aantu oyendji mboka hayi itanga paantu, nangame wo otandi shi ningi.

¹⁹Ne yene omu li po aanandunge, onkee ohamu idhidhimikile omagoya.

²⁰Ohamu idhidhimikile kehe ngoka te mu ningilile mo nenge te mu yulu moohapu nenge te mu tala nondhino nenge te mu nyekele.

²¹Ngame onda sa ohoni oku shi zimina kutya otwa li twa tila okuninga ngaaka. Otandi popi ongegoya kutya, ngele ope na ngoka ta vulu okwiitangela oshinima shontumba, nena nangame wo ote vulu oku shi ninga.

²²Oyo Aahebeli? Ngame wo Omuhebeli. Oyo Aaisraeli? Ngame wo Omwiisraeli. Oyo oluvalo lwaAbraham? Ngame wo ogwomoluvalo lwaAbraham.

²³Oyo aayakuli yaKristus? Ote popi ongomulumentu egoya kutya ondi ya vule ayehe. Onda longo noonkondo ndi ya vule. Onda kala mondholongo omathimbo ogendji, onda dhengwa olwindji, onda kala olwindji popepi neso.

²⁴Onda dhengwa lutano kAajuda omadhengo omilongo ndatu nomugoyi.

²⁵Onda dhengwa noongola lutatu kAaroma, nalumwe onda dhengwa nomamanya. Onda kala lutatu moshiponga sheteko lyosikepa. Ethimbo limwe onda kala ootundi omilongo mbali nane momeya.

²⁶Momalweendo gandje ogendji onda adhika kiiponga yomafundja noyaayugi, iiponga tayi zile ndje mAajuda ooyakwetu nomaapagani. Opwa kala iiponga miilando, iiponga moombuga, iiponga yomomafuta omanene nomiiponga tayi zi mookuume aafundja.

²⁷Opwa li pwa kala iilonga nuupyakadhi. Olwindji onda lala inee kotha nonda si ondjala nenota. Olwindji onda kala ndaa na iikulya nonda hepekwa unene kuutalala nokonkayi.

²⁸Kakele kiinima mbika, esiku kehe otandi thiminikwa meni lyandje koshimpwiyu shomagongalo agehe.

²⁹Olye ngoka omunkundi, ngame ndaa kale ando omunkundi pamwe naye? Olye ngoka ta pundukile muulunde, ndaa lulumikwe kusho?

³⁰Ngele ondi na okwiitanga, otandi itangele iinima mbyoka tayi ulike, nkene ngame ndi li po omunkundi.

³¹Edhina lyaKalunga, He yOmuwa gwetu Jesus, nali simanekwe, oshoka oku shi shi kutya ite fundju.

³²Manga nda li muDamaskus, elenga lyomukwaniilwa Aretas olya tula aalangeli piiyelo yoshilando, li kwate ndje.

³³Ihe ngame onda kulukithwa ndi li montungwa nonda pitithwa mombululu yi li mekuma e tandi hunuka mo miikaha ye.