Read Oshindonga-Ombiimbeli Ondjapuki 2008 2 Corinthians 3 Bible Online

2 Corinthians 3 - Oshindonga-Ombiimbeli Ondjapuki 2008 bible

2 Corinthians 3

¹Otatu tameke ishewe okwiitanga? Pamwe otwa pumbwa, ngashika aantu yamwe, oontumwafo dhomaitumbaleko tadhi zi kutse nenge kune?

²Ne omu li po ontumwafo yetu ya nyolelwa momitima dhetu, yi tseyike noyi leshwe kukehe gumwe.

³Ontumwafo ndjika oya nyolwa kuKristus mwene nokwe yi tu pe, tu yi mu pe. Yo inayi nyolwa nohinga yo inaayi nyolelwa kiipelende yomamanya, ihe oya nyolelwa momitima dhaantu kOmbepo yaKalunga omunamwenyo.

⁴Tse otatu popi oshinima shika, oshoka otwi inekela Kalunga molwaKristus.

⁵Mutse kamu na nando osha shoka tashi vulu oku tu itangitha kutya otwa gwana okulonga oshilonga shika. Okuvula sha kwetu otaku zi kuKalunga.

⁶Oshoka oye e tu ningi aayakuli yehangano epe ndyoka lyaa shi lyomompango ya nyolwa, ihe olyomOmbepo. Oshoka ompango ndjoka ya nyolwa otayi eta eso, ihe Ombepo otayi gandja omwenyo.

⁷Uunyolo wompango owa li wa hokelwa miipelende yomamanya, neadhimo lyaKalunga olya li lya holoka pokugandjwa kwayo. Eadhimo ndika nando olya li tali ka dhimeya, uuyelele womoshipala shaMoses owa li owindji. Onkee Aaisraeli inaa vula okutongolola oshipala she. Ngele eyakulo lyompango, ndyoka lye eta eso, olya holoka li na eadhimo enene li thike mpoka,

⁸nena uuwindji weadhimo ndyoka li li meyakulo tali wilikwa kOmbepo, otau kala u thike peni!

⁹Oshoka ngele eyakulo ndyoka tali pangulile aantu meso, olya li li na eadhimo, ano eadhimo lyomeyakulo ndyoka tali mangulula aantu, otali kala li thike peni!

¹⁰Eadhimo ndika li li po ngashingeyi, olyo enene shili li vule ndiyaka lyonale.

¹¹Oshoka ngele mushoka sha li sha kala owala okathimbo, omwa li mu na eadhimo, nena eadhimo ndyoka li li mushoka tashi kala aluhe, oli thike peni!

¹²Ano sho tu na etegameno ndika, otatu popi nomukumo.

¹³Tse inatu fa Moses, ngoka a li e na okusiikila oshipala she, opo Aaisraeli yaa wape okutala eadhimo nkene tali kana po.

¹⁴Omadhiladhilo gawo oga li ga patwa. Osho ge li sigo onena ndjika, sho taa lesha omambo gomehangano ekulu. Oshisiikilo shika otashi kuthwa po owala, uuna omuntu ta hangana naKristus.

¹⁵Sigo onena ndjika natango oshisiikilo osha siikila omadhiladhilo gawo, ngele taa lesha ompango yaMoses.

¹⁶Ihe oshisiikilo otashi kuthwa po, ngaashi enyolo tali ti: “Oshisiikilo shaMoses ohashi kuthwa po aluhe, ngele ta yi koshipala shOmuwa.”

¹⁷“Omuwa” menyolo ndika oye Ombepo. Mpoka pu na Ombepo yOmuwa, opu na emanguluko.

¹⁸Tse atuhe otwa fa oshiitalelo tashi monikila eadhimo lyOmuwa ngoka e li Ombepo, notatu shitululwa, tu fe ondjelo ye mwene yeadhimo enenenene li vule agehe.