Read Oshindonga-Ombiimbeli Ondjapuki 2008 2 Corinthians 6 Bible Online

2 Corinthians 6 - Oshindonga-Ombiimbeli Ondjapuki 2008 bible

2 Corinthians 6

¹Tse sho tu li po aalongi pamwe naKalunga, otatu mu kumagidha, mwaa hepithe esilohenda lyaKalunga ndyoka mwe li taamba.

²Oshoka Kalunga ota ti: “Ethimbo lyo opala onde ku uvu, esiku lyehupitho onde ku kwatha.” Pulakena ano! Ethimbo lyo opala okutaamba esilohenda lyaKalunga olyo ndika. Esiku lyokuhupithwa onena.

³Tse itatu alulitha omuntu nando omoshinima shimwe, oshilonga shetu opo shaa shekwe.

⁴Ihe moshinima kehe shoka tatu ningi, otatu ulike kutya tse aayakuli yaKalunga. Otatu idhidhimikile uudhigu, iiponga noothina neidhidhimiko enene.

⁵Otwa dhengwa, otwe edhililwa mondholongo, otwa kondekwa kaantu. Otwa longithwa iilonga iidhigu nokatu na ompito okukotha nenge okulya.

⁶Otu li muuyogoki, moondunge, meidhidhimiko nomuukuume. Otatu endithwa kOmbepo Ondjapuki notu na ohole yaa na uufudhime.

⁷Otatu uvitha oohapu dhoshili, naKalunga ote tu pe oonkondo. Uuyuuki owo oshikondjitho shetu mokuumpila nomokwiipopila.

⁸Tse otatu simanekwa e tatu dhinwa, ohatu popilwa muuwinayi nomuuwanawa. Otwa talwa aapukithi, nonando otatu popi oshili.

⁹Otwa talwa aakwiilongo, nonando otwa tseyika kwaayehe. Otwa fa twa sa, ihe otu na omwenyo. Tse otwa geelwa, ihe inatu dhipagwa po.

¹⁰Otu li moluhodhi, ihe otwa nyanyukwa aluhe. Tse oohepele, ihe oyendji otatu ya ningi aayamba. Otwa fa twaa na sha, ihe otu na iinima ayihe.

¹¹Ookuume aaholike yomuKorinto, tse otwe mu lombwele oshili notwe mu egululile omitima dhetu.

¹²Tse inatu mu holeka omitima dhetu, ihe ne omwe tu holeke omitima dheni.

¹³Ote popi nane, ngaashi te popi naamwandje: Tu ningileni ngaashi twe mu ningile; tu egululileni omitima dheni.

¹⁴Inamu kambadhala okulongela kumwe naamboka yaa shi ooyitaali, oshoka shika itashi vulika. Shoka shi li mondjila naashoka sha puka, otayi vulu ngiini okukala kumwe? Uuyelele nomilema otayi vulu ngiini okukala mumwe?

¹⁵Kristus nomuhindadhi otaa vulu ngiini okutsa kumwe? Omwiitaali nomukeeneitaalo otaa vulu tuu okukala ye na uukumwe?

¹⁶Otempeli yaKalunga otayi vulu ngiini okulongela kumwe niikalunga? Oshoka tse otempeli yaKalunga omunamwenyo, ngaashi Kalunga mwene ta ti: “Ngame otandi ka tungila egumbo lyandje puyo, e tandi kala mokati kawo. Ngame otandi kala Kalunga kawo, oyo notaa kala aantu yandje.”

¹⁷Onkee Omuwa ota ti: “Zii mo mokati kawo, ne mu iyoolole mo muyo. Inamu kala mu na ekwatathano naashoka sha nyata, ngame notandi ke mu taamba.

¹⁸Ngame otandi kala Ho, ne notamu kala aamwandje aamati naakadhona, Omuwa Omunankondoadhihe osho ta ti.”