Read Oshindonga-Ombiimbeli Ondjapuki 2008 2 Corinthians 7 Bible Online

2 Corinthians 7 - Oshindonga-Ombiimbeli Ondjapuki 2008 bible

2 Corinthians 7

¹Ookuume kandje aaholike, ano sho tu na omauvaneko ngaka agehe, natu iyogeni shaa shoka tashi nyateke olutu nenge omwenyo. Tu lalakaneni wo okukala aayapuki, tse tu tile Omuwa.

²Tu taambeni nomwenyo aguhe. Inatu ningila nando omuntu gumwe uuwinayi, inatu pukitha nando omuntu gumwe, tse inatu ningilila mo nando ogumwe.

³Oshinima shika itandi shi popi, ndi mu pangule, oshoka onde mu lombwela nale kutya otu mu hole. Onkee otu na okukala tu na uukumwe aluhe, ongele tu na omwenyo nenge tatu si.

⁴Ngame onde mu inekela lela notandi mu itangele. Momaudhigu getweni agehe ngame ondi na omukumo nondu udha enyanyu.

⁵Ano sho twa thiki muMakedonia, inatu mona nando efudho lyasha, oshoka otwa li tu na omaudhigu koombinga adhihe: oontamanana naantu yalwe nuumbanda moomwenyo dhetu.

⁶Ihe Kalunga ngoka ha tsu omukumo mboka ya tyololoka, okwe shi tu ningile nokuyapo kwaTitus.

⁷Nokuli hakuyapo kwe akuke, ihe okuhokolola kwe wo, nkene mwe mu tsu omukumo. Ye okwe tu hokololele, nkene mwa yuulukwa ndje, nkene mwa yemata nonkene mwi ilongekidha okupopila ndje. Ano ngashingeyi onda nyanyukwa pombanda.

⁸Oshoka nando ontumwafo yandje ye mu nikitha oluhodhi, kandi uvite ando nayi, sho nde yi nyola. Tango onda li ndi na okukala ndu uvite omwenyo omwiinayi, sho nda dhimbulula kutya ontumwafo ya tya ngaaka oye mu nikitha oluhodhi, nonando olwokathimbo ashike.

⁹Ihe ngashingeyi onda nyanyukwa, hamolwaasho nde mu nikitha oluhodhi, ihe omolwaasho oluhodhi lweni lwe mu fala meitedhululo. Oluhodhi lwa tya ngaaka olwa hokiwa kuKalunga, onkee tse inatu mu etela nando oshiponga shasha.

¹⁰Oshoka oluhodhi ndoka lwa hokiwa kuKalunga, otalu fala omuntu meitedhululo, eitedhululo e tali mu fala mehupitho, onkee inalu puka. Ihe oluhodhi lwopayuni otalu eta eso.

¹¹Taleni ano shoka Kalunga a ningi, sho e mu pitikile oluhodhi ndoka. Oluhodhi tuu ndoka lwe mu pe uulaadhi, mu vule okuholola kutya kamu na uusama. Oshinima sha tya ngaaka oshe mu geyitha noshe mu londodha, oshe mu yuulukitha noshe mu pe uupenda nehalo okugeela uuwinayi. Omu ulike kutya ne kamu na epuko lyasha moshinima shika.

¹²Onkee ano nando nda nyola ontumwafo ndjoka, inandi shi ninga molwaangoka a ningi nayi nenge molwaangoka a ningwa nayi. Onda nyola, opo ndi mu hololele uupenda weni molwetu koshipala shaKalunga.

¹³Onkee tse otwa tsuwa omukumo. Tse otwa tsuwa omukumo notwa nyanyukwa unene, sho twa mono Titus e na enyanyu, oshoka ne amuhe omwa kambadhala oku mu nyanyudha.

¹⁴Ngame onde mu itangele koshipala shaTitus, ne inamu sitha ndje ohoni. Aluhe otwe mu lombwele oohapu dhoshili. Osho wo eitango lyandje koshipala shaTitus olya holoka kutya oli li mondjila.

¹⁵Onkee ano ohole ye yoku mu hola otayi koko notayi kolo, sho aluhe ta dhimbulukwa, nkene mwa li mwi ilongekidha okuvulika nonkene mwe mu taamba nokutila nokukakama.

¹⁶Onda nyanyukwa unene, sho tandi vulu oku mu inekela miinima ayihe.