Read Oshindonga-Ombiimbeli Ondjapuki 2008 2 Corinthians 8 Bible Online

2 Corinthians 8 - Oshindonga-Ombiimbeli Ondjapuki 2008 bible

2 Corinthians 8

¹Aamwameme, tse otwa hala, mu tseye shoka sha longwa kesilohenda lyaKalunga momagongalo gomuMakedonia.

²Ooyitaali oya li ya piti momayeleko omadhigu, ihe nando ongawo, enyanyu lyawo olya li enene. Onkee ano oya gandja nomwenyo omwaanawa, nonando oya li ye na oluhepo olunene.

³Ngame onzapo yawo, nkene ya gandja, ngaashi taye shi vulu. Nokuli kehalo lyawo yene oya gandja shi vulithe po.

⁴Oye tu indile noya pula, ya pewe ompito yokukwatha aantu yaKalunga yomuJudea.

⁵Oya gandja shi vulithe pushoka twa li twa tegelela. Tango oyi igandja yo yene kOmuwa noyi igandja ihe kutse pahalo lyaKalunga.

⁶Onkee ano otwa kumagidha Titus, ngoka a tameke oshilonga shika mokati keni, e shi tsikile ye e mu kwathe, mu wape okutsakanitha eyakulo ndika lyohole.

⁷One aayamba miinima ayihe mbyoka mu na; meitaalo, mokupopya nomokutseya, muuladhi weni wokukwatha nomohole yeni yoku tu hola. Osho ano otwa hala, mu kale mwaa na uuluya nomeyakulo ndika lyohole.

⁸Ngame itandi gandja nando oshipango shasha. Ihe moku mu ulukila yakweni yalwe nkene ya ladhipala okukwatha, onda hala okutala ohole yeni ngele oyashili tuu.

⁹Oshoka omwa tseya shoka Omuwa gwetu Jesus Kristus e mu ningile. Nando oye okwa li omuyamba, okwi iningi ohepele molweni, opo mu ninge aayamba molwoluhepo lwe.

¹⁰Ngame otandi dhiladhila moshinima shika kutya otashi kala oshiwanawa kune, ngele tamu tsakanitha ngashingeyi shoka mwe shi tameke omumvo gwa piti. One omwa li yotango, hamiilonga ashike, ihe nomehalo wo lyokulonga.

¹¹Tsikileni ano oshilonga shika, mu shi hulithe. Kaleni mu na uulaadhi oku shi hulitha, ngaashi mwa li mwa hala. Shi ningeni naashoka mu na.

¹²Oshoka ngele omu na ehalo ewanawa lyokugandja, nena Kalunga ota taamba omagano ngoka tamu gandja pamuthika mpoka mu thike, haampoka mwaa thike.

¹³Ngame inandi hala ando okupupalekela yalwe e tandi mu tsike omutenge. Ihe sho mu na oshindji ngashingeyi, onawa ngele tamu kwatha mboka ye li moluhepo.

¹⁴Nena uuna tamu ka adhika koluhepo yo ye na oshindji, otaa ke mu kwatha wo. Pamukalo nguka otamu ningilwa amuhe shi thike pamwe.

¹⁵Ngashika enyolo tali ti: “Oongoka a gongele oshindji, ina kala e na oshindji. Naangoka a gongele oshishona, ina kala a hepa.”

¹⁶Kalunga na hambelelwe, sho a pe Titus uupenda woku mu kwatha ngaashi tse.

¹⁷Nokuli ina taamba owala ekumagidho lyetu, ihe okwa li wo a sa uulaadhi okukwatha. Onkee okwa tokola okuya kune kehalo lye mwene.

¹⁸Otatu tumu wo pamwe naye omumwameme omulumentu, ngoka a simanekwa unene momagongalo agehe omolwoshilonga she shokuuvitha evaangeli.

¹⁹Kakele kaashika, omumwameme nguka okwa hogololwa noku uthwa komagongalo, a kale he ende pamwe natse, uuna tatu ende molweyakulo ndika lyohole okusimanekitha Omuwa nokuulika kutya tse otwa hala okukwatha.

²⁰Tse otwa hala okuyanda, twaa pewe uusama komuntu omolwomukalo ngoka tatu longitha kombinga yiikwatha mbika.

²¹Elalakano lyetu olyo okuninga shoka shu uka, hakoshipala shOmuwa awike, ihe nokoshipala shaantu wo.

²²Pamwe naambaka otatu tumu omumwameme omulumentu gulwe ishewe, ngoka twa mono opendji nomiinima oyindji kutya ye ependa nokwa sa uulaadhi okukwatha. Unene ngashingeyi sho e mu inekela, oku na ehalo okukwatha.

²³Titus oye omuyakuli gwandje ngoka ta longo pamwe nangame oku mu kwatha. Aamwameme ooyakwawo mboka taye ya pamwe naye, oyo aakalelipo yomagongalo notaa simanekitha Kristus.

²⁴Ya ulukileni ohole yeni, opo omagongalo agehe ga dhimbulule noga tseye wo kutya eitango lyetu lyoku mu itangela oli li mondjila.