Read Oshindonga-Ombiimbeli Ondjapuki 2008 Galatians 2 Bible Online

Galatians 2 - Oshindonga-Ombiimbeli Ondjapuki 2008 bible

Galatians 2

¹Oomvula omulongo nane sho dha piti po, onda shuna kuJerusalem pamwe naBarnabas. Titus naye wo okwa yi pamwe natse.

²Ngame onda yi, oshoka onda lombwelwa kuKalunga, ndi ye ko. Otwa gongala moshigongi pamwe naawiliki yawo, nonde ya hokololele elaka lyevaangeli ndyoka tandi uvithile aapagani. Ngame inandi hala iilonga mbyoka nda longo nale nenge mbyoka tandi longo ngashingeyi, yi ninge yosima.

³Nokuli nomuthindikili gwandje Titus nando okwa li Omugreka, ina thiminikwa nando okuli okwiifukalekitha.

⁴Ihe aalumentu yamwe mboka yi iningi ya fa aakriste, oyi iyakele mokati ketu, noya li ya hala oku mu fukaleka. Aantu mbaka oyi iyakele mokati ketu, opo ya ndaadhe emanguluko lyetu ndyoka tu na muukumwe wetu naKristus Jesus. Oyo oya li ya hala oku tu tsika ondjoko yuupika.

⁵Tse inatu ya zimina nando okashona, oshili yomevaangeli opo yi kale puuyelele mokati keni.

⁶Ihe mbeyaka oohashikeshalye otandi shi ti, inaa etela ndje nando iimpwiyu iipe. Kungame kashi na mbudhi kutya aantu ya tya ngaaka oyo oolye. Oshoka Kalunga iha pangula pakutala ondjelo yomuntu.

⁷Oyo oya dhimbulula kutya Kalunga okwa pe ndje oshilonga shokuuvitha mokati kaapagani, naanaa ngashika a pe Petrus oshilonga shokuuvitha evaangeli mokati kAajuda.

⁸Oshoka koonkondo dhaKalunga ngame onda ningi omuyapostoli mokati kaapagani, naanaa ngaashi Petrus a ningi omuyapostoli mokati kAajuda.

⁹Nena Jakob, Petrus naJohannes, mboka ya talika kutya oyo aawiliki, oya dhimbulula wo kutya Kalunga oye a pe ndje oshilonga shika. Onkee ano oye tu laleke mombepo yuukumwe tse naBarnabas, tu ka longe mokati kaapagani, manga yo taa longo mokati kAajuda.

¹⁰Shoka ashike ye tu indile, tu ninge, osho okudhimbulukwa oohepele dhomokati kawo, naashika onda kambadhala olwindji oku shi ninga.

¹¹Ihe Petrus sho e ya kuAntiokia, onde mu ganda montaneho yaayehe, oshoka okwa li a pukalela.

¹²Oshoka manga aalumentu yamwe mboka ya li ya tumwa kuJakob, ya adhika inaaye ya, Petrus okwa li ha li naamwameme aalumentu yomaapagani. Ihe aalumentu mboka sho ye ya, Petrus okwi iyoolola mo maamwameme mboka yomaapagani, ye ina hala we okulya pamwe nayo. Oshoka okwa li a tila aalumentu mboka ya kala haa ti kutya aakriste mboka taa zi maapagani, naa fukalekwe.

¹³Aajuda ooyakwawo aakriste nayo wo oye mu holele, sigo naBarnabas a pukithwa kuufudhime wawo.

¹⁴Ano ngame sho nda mono kutya omikalo dhawo itadhi tsu we kumwe noshili yevaangeli, onda lombwele Petrus montaneho yawo ayehe nda ti: “Ngoye Omujuda, ihe ku li ngaashi Omujuda, ou na omikalo dha fa dhaapagani. Oto vulu tuu okuthiminika aapagani, ya kale ngaashi Aajuda?”

¹⁵Eeno oshoshili, otse Aajuda kevalo, katu shi aalunde aapagani.

¹⁶Otu shi shi kutya omuntu ota ningi omuyuuki koshipala shaKalunga keitaalo okwiitaala Jesus Kristus, hamolwokugwanitha shoka tashi pulwa kompango. Onkee ano natse wo otwi itaala Jesus Kristus, opo tu ninge aayuuki omolweitaalo, hamolwokugwanitha shoka tashi pulwa kompango. Oshoka kape na nando omuntu ta ningi omuyuuki koshipala shaKalunga omolwokugwanitha shoka tashi pulwa kompango.

¹⁷Ngele ano tse mboka tatu lalakanene uuyuuki molwaKristus, tatu monika kutya otse aalunde, ngaashi naanaa aapagani ye li, nena shono otashi ti ando kutya Kristus oye omuyakuli guulunde? Itashi vulika!

¹⁸Oshoka ngele otandi tameke okutungulula shoka nda li nda kumuna po nale, nena otandi holola kutya ongame omuyoni gwompango.

¹⁹Mokupopya ompango ngame onda sa, nda dhipagwa kompango, opo ndi kalele Kalunga ndi na omwenyo. Ngame onda si pamwe naKristus komushigakano,

²⁰opo ndaa kale we ndi na omwenyo mungame mwene, ihe Kristus oye a kale e na omwenyo mungame. Ano manga ndi na omwenyo muuyuni mbuka, otandi kala ndi itaala Omuna gwaKalunga, ngoka e hole ndje nokwa gandja omwenyo gwe molwandje.

²¹Onkee ano itandi ekelehi esilohenda lyaKalunga. Oshoka ngele omuntu ota ningwa omuyuuki molwompango, nena okusa kwaKristus inaku kwatha sha.