Read Oshindonga-Ombiimbeli Ondjapuki 2008 Galatians 5 Bible Online

Galatians 5 - Oshindonga-Ombiimbeli Ondjapuki 2008 bible

Galatians 5

¹Kristus okwe tu mangulula, opo tu kale twa manguluka. Ikoleleni ano, oshoka omwa manguluka, ne inamu zimina we, mu ninge aapika.

²Pulakeneni! Ongame Paulus tandi mu lombwele kutya one ngele otamu zimine, mu fukalekwe, nena otashi ti Kristus ke na shoka te mu kwatha.

³Onda hala oku shi tumbula natango nomuthindo kutya kehe ngoka ta zimine a fukalekwe, oye oku na okugwanitha ompango ayihe.

⁴Ne mboka mwa hala okuninga aayuuki koshipala shaKalunga omolwokugwanitha ompango, omwi ikutha mo ne yene muKristus. One omwa gwa mo mesilohenda lyaKalunga.

⁵Ihe tse etegameno lyetu olyo ndika kutya Kalunga ote ke tu ninga aayuuki, onkee otatu shi tegelele meitaalo koonkondo dhOmbepo yaKalunga.

⁶Oshoka tse ngele otu li muukumwe naKristus Jesus, nena okukala wa fukalekwa nenge inoo fukalekwa, ayihe mbika itayi kwatha sha. Ihe shoka tashi kwatha, osho eitaalo ndyoka tali holoka mohole.

⁷One omwa li hamu matuka nawa, mu sindane. Olye e mu ethitha okuvulika koshili? Oye okwe mu hongolola nashike?

⁸Ehongololo ndyoka inali za kuKalunga, ngoka te mu ithana.

⁹Okafulika okashona otaka tumbike ondombo ayihe.

¹⁰Ihe omoluukumwe wetu nOmuwa ngame onde mu inekela kutya ne itamu ka taamba edhiladhilo lilwe. Omuntu ngoka te mu piyaganeke, ota ka geelwa kuKalunga, na kale oye lye.

¹¹Ihe ngame, aamwameme, omolwashike ando tandi tidhaganwa natango, ngele tandi uvitha kutya efukaleko olya pumbiwa? Shika ngele oshoshili, nena ando euvitho lyandje kombinga yomushigakano gwaKristus itali eta we uudhigu.

¹²Ando aalumentu mboka taye mu piyaganeke, yi ithonithe nokuli!

¹³Ne aamwameme, omwi ithanwa, mu kale mwa manguluka. Ihe inamu etha, emanguluko ndika lyeni li ninge ompito yuuhalu wopantu, ihe yakulathaneni nohole.

¹⁴Oshoka ompango ayihe oya kwatelelwa moshipango shika shimwe: “Hola mukweni, ngaashi wi ihole ngoye mwene.”

¹⁵Ihe ngele tamu kala ngaashi iilikama, tamu lyaathana ne tamu etelathana iiponga, kotokeni ano, opo mwaa manathane po.

¹⁶Ngame otandi mu lombwele tandi ti: Kaleni tamu endithwa kOmbepo mokukalamwenyo kweni akuhe. Nena itamu ka gwanitha we uuhalu wopantu.

¹⁷Oshoka uuhalu wetu wopantu itau tsu kumwe naashoka Ombepo e shi hala. Naashoka sha halika kOmbepo, itashi tsu kumwe nuuhalu wopantu. Iinima mbika iyali ohayi kala aluhe tayi kondjithathana, onkee itamu vulu okulonga pahalo lyeni yene.

¹⁸Ihe one ngele tamu endithwa kOmbepo, nena itamu pangelwa we kompango.

¹⁹Ihe iilonga yuuhalu wopantu oyi igalala. Aantu oye hole uuholume, iipala nuukeeneidhiliko,

²⁰otaa simaneke iimenka notaa longo muumpulile. Oyo otaa tondathana, otaa tamanana, otaa silathana efupa, otaa geelathana notaa kotokelathana. Oyo otaa topoka moongundu nomiimpaga.

²¹Oye na uukodhi, uunkolwi nuufukedhi niinima iikwawo ya fa mbika. Otandi mu kumagidha natango, ngaashi nda li nde mu kumagidha nale: Aantu mboka taa longo iilonga ya tya ngeyi, itaa ka thigulula Oshilongo shaKalunga.

²²Ihe iiyimati yOmbepo oyo mbika: ohole, enyanyu, ombili, eidhidhimiko, uukuume, uuwanawa, okukala omwiinekelwa,

²³eifupipiko neikwatonawa. Kaku na nando ompango ya tsa ondumbo niinima mbika.

²⁴Naamboka yaJesus Kristus oya dhipaga okukala kwawo kwopantu nuuhalu auhe.

²⁵Ombepo otayi tu pe omwenyo, onkee oyo nayi kale tayi utha wo okukalamwenyo kwetu.

²⁶Inatu kaleni tu na uuntsa, tu hindathaneni nenge tu silathaneni efupa.