Read Oshindonga-Ombiimbeli Ondjapuki 2008 Ephesians 1 Bible Online

Ephesians 1 - Oshindonga-Ombiimbeli Ondjapuki 2008 bible

Ephesians 1

¹Ontumwafo ndjika oya zi kuPaulus, omuyapostoli gwaJesus pahalo lyaKalunga. Oya nyolelwa aantu yaKalunga ye li muEfeso, mboka aainekelwa mekwatathano lyawo naJesus Kristus.

²Silweni ohenda, ne mu kale mu na ombili yaKalunga Tate noyOmuwa Jesus Kristus.

³Kalunga, He yOmuwa gwetu Jesus Kristus, na hambelelwe! Oye tuu ngoka e tu laleke nuuyamba muukumwe naKristus, sho e tu pe omagano agehe gopambepo taga zi megulu.

⁴Kalunga sho e tu hole, okwe tu hogolola nale molwaKristus, manga uuyuni inaau shitwa, tu kale aayapuki twaa na oshipo koshipala she.

⁵Oye okwa kala e shi nuna nale kutya ote ke tu taamba, tu ninge oyana omolwaJesus Kristus. Shika osho enyanyu nelalakano lye.

⁶Onkee Kalunga na hambelelwe omoluuwindji wesilohenda lye nomolwomagano agehe ngoka e ge tu pa mOmwana omuholike.

⁷Oshoka tse otwa mangululwa notwa dhiminwa po oondjo dhetu omolweso lyaKristus. Esilohenda lyaKalunga ekumithi ngiini!

⁸Esilohenda ndika Kalunga okwe li tu pa olindji, li ninge oondunge nuunongo wetu miinima ayihe.

⁹Kalunga okwa ningi shoka a kala nale a hala oku shi longa nokwe tu hololele oshiholekwa shoka a li a hala oku shi tu hololela muKristus.

¹⁰Kalunga oku uvaneke okutsakanitha edhiladhilo lye pethimbo lyo opala. Oye ota ka hanganitha eshito alihe, nokutya ayihe yomegulu noyokombanda yevi otayi ka tulwa kumwe nomutse, Kristus.

¹¹Oshoka ayihe oya ningwa pamadhiladhilo nopatokolo lyaKalunga. Kalunga okwe tu hogolola molwaKristus, tu ninge aantu ye, ongaashi e shi tokola nale okuza petameko.

¹²Onkee ano tu tangeni esimano lyaKalunga, oshoka otse aatango mboka twa kala tu na etegameno muKristus.

¹³Nane wo sho mu uvu ohapu yoshili, elaka etoye ndyoka lye mu etele ehupitho, omwi itaale Kristus. Kalunga nokwe mu tula oshihako shoku mu ndhindhilika kutya mwa ningi aantu ye, sho e mu pe Ombepo Ondjapuki ngoka e mu uvanekela.

¹⁴Ombepo oye okapilo kutya tse otatu ka pewa shoka Kalunga e shi uvanekela aantu ye. Ombepo ote tu tsu omukumo, tu inekele kutya Kalunga ota ka mangulula aantu ye. Tu tangeni ano esimano lye!

¹⁵Onkee ano ngame sho ndu uvu, nkene mwi itaala Omuwa Jesus nohole yeni yokuhola aantu yaKalunga ayehe,

¹⁶inandi etha we okuhambelela Kalunga omolweni. Ngame ohandi mu dhimbulukwa aluhe momagalikano gandje

¹⁷nohandi indile Tate a simana, Kalunga He yOmuwa gwetu Jesus Kristus, e mu pe Ombepo ngoka te mu pe oondunge note mu hololele Kalunga, opo mu kale mu mu shi.

¹⁸Ngame otandi galikana, oondunge dheni dhi wape okumona uuyelele waKalunga, opo mu tseye onkalo yetegameno ndyoka e li mu ithanena, eudhililo lyomayambeko ngoka e ga uvanekela aantu ye,

¹⁹nuuwindji woonkondo ndhoka tadhi longo mutse ooitaali.

²⁰Oonkondo ndhoka Kalunga e dhi longitha, sho a yumudha Jesus Kristus kuusi nokwe mu kuutumbike kolulyo lwe megulu.

²¹Oko nkoka Kristus ta pangele aapangeli ayehe yomegulu, aaleli aanankondo naawa. Oye oku vule aanamadhina ayehe aanankondo yomuuyuni mbuka naambwiyaka tau ya.

²²Onkee Kalunga okwa tula iinima ayihe mepangelo lyaKristus nokwe mu ningi omutse gwegongalo nogwiinima ayihe.

²³Egongalo olyo olutu lwaKristus nolyo egwanopo lyaKristus, ngoka u udhitha iinima ayihe.