Read Oshindonga-Ombiimbeli Ondjapuki 2008 Ephesians 2 Bible Online

Ephesians 2 - Oshindonga-Ombiimbeli Ondjapuki 2008 bible

Ephesians 2

¹Nale omwa li mwa sa pambepo omolwokwaavulika kweni kuKalunga nomolwoondjo dheni.

²Pethimbo ndiyaka omwa landula oondjila oombwinayi dhuuyuni mbuka. Omwa vulika komupangeli gwoonkondo dhombepo yomewangandjo, ombepo ndjoka tayi pangele ngashingeyi aantu mboka ihaa vulika kuKalunga.

³Eeno, tseni atuheni osho twa li twe ya fa. Otwa landula uuhalu wuuntu wetu notwa longo shaa shoka sho opalela uuhalu womomalutu getu nowomadhiladhilo getu. Ngashika naanaa aantu yalwe ayehe, natse wo panshitwe yetu otwa li twi ilongela egeelo lyaKalunga.

⁴Ihe Kalunga, nguka u udha esilohenda omolwohole ye onene, sho e tu hole,

⁵okwe tu tula omwenyo pamwe naKristus. Okwe shi tu ningile, manga twa li twa sa pambepo omolwokwaavulika kwetu kuye. Ne omwa hupithwa kesilohenda lyaKalunga.

⁶Muukumwe wetu naKristus Jesus, Kalunga okwe tu yumudha kuusi pamwe naKristus, opo tu wape okupangela pamwe naye megulu.

⁷Oye okwe shi ningi, opo a holole sigo okomathimbo ngoka tage ke ya uuwindji wesilohenda lye nowohole ye ndjoka e yi tu hololele muJesus Kristus.

⁸Oshoka omwa hupithwa kesilohenda lyaKalunga keitaalo. Ehupitho ndika inali za mune yene, aawe, olyo omagano gaKalunga.

⁹Mpaka kape na sha shokwiitangela, oshoka shika inashi za moonkambadhala dheni.

¹⁰Kalunga oye omushiti gwetu, onkee muukumwe naKristus Jesus oye okwe tu shiti, tu kale tu na iilonga iiwanawa mokukalamwenyo kwetu. Iilonga mbyoka Kalunga okwe yi tu uthila nale, tu yi longe.

¹¹One aapagani kevalo. Aajuda ohaa ti kutya inamu fukalekwa, manga yo haa iti, oya fukalekwa nokuulika kefukaleko ndyoka aalumentu yo yene haa li ningi niikaha yawo komalutu gawo. Dhimbulukweni shoka mwa li mwa tya omathimbo ngoka ga piti.

¹²Pethimbo ndiyaka omwa li mwaa na Kristus. One omwa li aakwiilongo nokamwa li yomongundu yaahogololwa yaKalunga. One omwa li mwaa na oshitopolwa mehangano ndyoka lyi ikwatelela komauvaneko ngoka Kalunga e ga uvanekela aantu ye. One omwa li mwa kala muuyuni mbuka mwaa na etegameno nomwaa na Kalunga.

¹³Ihe ngashingeyi muukumwe naKristus Jesus, ne mboka mwa kala shito yokokule, omwe etwa popepi omolweso lyaKristus.

¹⁴Oshoka Kristus oye mwene e tu etele ombili, sho a hanganitha Aajuda naapagani, ya ninge oshigwana shimwe. Nolutu lwe mwene okwa kumuna po ekuma lya li pokati kawo, tashi ti, etondathano.

¹⁵Oye okwa hanagula po ompango yAajuda pamwe niipango yawo, opo a shite momihoko ndhika adhihe mbali oshigwana shimwe oshipe muukumwe naye mwene moku ya paathanitha ombili.

¹⁶Kristus sho a si komushigakano, okwa hanagula po etondathano. Koonkondo dhomushigakano gwe okwa hanganitha omihoko adhihe mbali, dhi ninge olutu lumwe. Osho ngeyi okwe ya galulile kuKalunga.

¹⁷Onkee ano okwe ya noku uvithile aantu ayehe elaka etoye lyombili. Oye okwe li mu uvithile, ne aapagani mboka mwa li mwa kala shito kokule naKalunga nosho wo Aajuda mboka ya li shito popepi naye.

¹⁸OmolwaKristus tseni atuheni, Aajuda naapagani, otu na ompito okuhedha koshipala shaTate Kalunga koonkondo dhOmbepo tuu ngoka gumwe.

¹⁹Onkee ano ne aapagani, kamu shi we oondjendi nenge aakwiilongo, aawe, ngashingeyi omu na uukwashilongo umwe naantu yaKalunga nomwa ningi aanegumbo lye.

²⁰Nane wo omwa tungilwa kekankameno hoka ku na aayapostoli naahunganeki, naahoka Jesus Kristus mwene e li ko emanya lyokolonela.

²¹Oye ta kwatakanitha etungo alihe kumwe note li kokeke, sigo tali ningi otempeli ondjapuki mOmuwa.

²²Muukumwe naKristus nane wo otamu tungilwa mumwe nooyakweni ayehe yalwe, mu ninge egumbo moka Kalunga ta kala mo nOmbepo ye.