Read Oshindonga-Ombiimbeli Ondjapuki 2008 Ephesians 4 Bible Online

Ephesians 4 - Oshindonga-Ombiimbeli Ondjapuki 2008 bible

Ephesians 4

¹Ngame ngoka nda kwatwa molwaashoka tandi longele Omuwa, otandi mu kumagidha kutya okweenda kweni naku kale kwo opalathana neithano ndyoka Kalunga e mu ithana nalyo.

²Kaleni aluhe aaifupipiki, aatalanteni naaidhidhimiki. Hololeni ohole yeni mokuyakulathana.

³Ningeni ashihe shoka tamu vulu okukoleka uukumwe weni wOmombepo Ondjapuki omolwombili ndjoka tayi mu mangele kumwe.

⁴Olutu olumwe nOmbepo oyimwe, ngashika naanaa etegameno ndyoka Kalunga e mu ithanena, olimwe.

⁵Omuwa ogumwe, eitaalo olimwe neshasho olimwe.

⁶Kalunga ogumwe, He yaantu ayehe, ngoka Omuwa gwaayehe nota longo mwaayihe noku li mwaayihe.

⁷Kehe gumwe gwomutse Kalunga okwe mu pa omagano gasha opandjele yokugandja kwaKristus.

⁸Ngashika enyolo tali ti: “Sho a londo a yi kombandambanda, okwa faalele oonkwatwa odhindji; oye okwa pe aantu omagano.”

⁹Ihe otashi ti ngiini, oye okwa londo a yi pombanda? Otashi ti, oye okwa kuluka tango, nokutya a kulukile muule womeni lyevi.

¹⁰Ano ngoka a kuluka, oye tuu a londo a yi megulu, opo a udhithe ewangandjo alihe nokukalapo kwe.

¹¹Oye wo ngoka a pe aantu omagano. Oye oku utha, yamwe ya ninge aayapostoli, yamwe aahunganeki, yamwe aayuvithi, yamwe aasita nayamwe aalongihapu.

¹²Oye okwe shi ningi, a longekidhile aantu yaKalunga ayehe oshilonga sheyakulo lyopakriste, okutunga olutu lwaKristus.

¹³Natseni atuheni tatu hangana kumwe muukumwe womeitaalo lyetu nomontseyo yetu okutseya Omuna gwaKalunga. Otatu ka ninga ihe aakuluntu twa koka, twa thika kegwano lyuukuluntu waKristus.

¹⁴Nena otse itatu kala we aanona haa tengatengithwa nohaa alaalithwa kombepo kehe yomalongo gaantu aafundja, mboka taa pukitha yakwawo noku ya tegela oomwigo.

¹⁵Ihe mokupopya oshili tayi pangelwa kohole, otu na okukoka muKristus, ngoka e li omutse.

¹⁶Mewiliko lye iilyo ayihe yolutu yi ili noyi ili otayi kwatathana kumwe nolutu aluhe lwa kwatelwa kumwe koluthipa kehe ndoka lu li molutu. Onkee oshilyo kehe pehala lyasho ngele tashi longo, ngashika shi na okulonga, nena olutu aluhe otalu koko notalu itungu lwo lwene e talu kala talu pangelwa kohole.

¹⁷Medhina lyOmuwa otandi mu lombwele ihe oshinima shika noku mu kumagidha kutya, inamu enda we ngashika aapagani, mboka taa ende muugoya womadhiladhilo gawo.

¹⁸Omadhiladhilo gawo oga sa komilema. Kalunga ite ya pe omwenyo, oshoka kaye na oondunge noyi ikukutika.

¹⁹Oyo ihaa si ohoni. Otaa iyethele yo yene moonyata dhuulunde kaaye na eidhiliko noyaa na nando onge.

²⁰Ihe ne inamu longwa okutseya Kristus pamukalo gwa tya ngaaka.

²¹Ondi inekela, omwe mu uvu, naasho mu li aalanduli ye, omwa longwa oshili ndjoka yi li muJesus.

²²Ano ihuleni omuntu gweni omukulu ngoka mwe mu landula nale, ngoka hi iyono po ye mwene mokwiifundjaleka nuuhalu we.

²³Omitima dheni nomadhiladhilo geni naga shituluke lela, ga ninge omape.

²⁴Zaleni omuntu omupe ngoka a shitwa a fa Kalunga nohi iholola ye mwene mokukalamwenyo ku uka nokwa yapuka.

²⁵Onkee ano etheni iifundja. Ihe kehe gumwe na lombwele mukwawo oshili, oshoka tse atuhe iilyo yolutu lwaKristus.

²⁶Ngele tamu geye, inamu etha ondjahi yeni yi mu fale sigo omokuyona; inamu kala mwa geya esiku alihe.

²⁷Inamu pa omuhindadhi ompito, e mu sinde.

²⁸Omufuthi na ethe po okuyaka kwe, ye a tameke okwiilongela sha pamukalo omwaanawa, ye a vule ihe okukala e na sha okukwatha oohepele.

²⁹Inamu popya oohapu oombwinayi. Popyeni ashike oohapu ndhoka oombwanawa tadhi tungu nodha pumbiwa, opo aapulakeni yeni ye dhi hokwe.

³⁰Ombepo Ondjapuki yaKalunga inamu yi nikitha uuthigwa, oshoka oyo oshihako shaKalunga shoku mu ndhindhilika kutya mwa ningi aantu ye, okapilo koku mu tsa omukumo kutya esiku otali ke ya, uuna ndoka Kalunga te ke mu mangulula.

³¹Etheni ano uululu auhe, ondjahi nonkone, omakudhilo nenge omatukano, uuwinayi kehe nau mu kale kokule.

³²Ihe kalathaneni mu na uukuume nolukeno. Silathaneni ohenda nokudhiminathana po oondjo, ngashika naanaa Kalunga e mu dhimine po oondjo dheni molwaKristus.