Read Oshindonga-Ombiimbeli Ondjapuki 2008 Philippians 2 Bible Online

Philippians 2 - Oshindonga-Ombiimbeli Ondjapuki 2008 bible

Philippians 2

¹Okukala kweni muKristus otaku mu koleke tuu? Ohole otayi mu hekeleke tuu? Omu na tuu ehangano lyOmbepo? Omu holathane nomu na tuu olukeno mokukalathana kweni?

²Ngame otandi mu indile, nyanyudhii ndje nenyanyu lya tsakana. Kaleni mwa tsa ompango yimwe. Holathaneni, ne mu kale mu na ombepo yimwe nedhiladhilo limwe.

³Inamu longa nando osha mombepo yokwiihola nenge yokukonga esimano lyowala, ihe ifupipikeni kiipala yayakweni, ne mwaa dhiladhile kutya one aawanawa mu ya vule.

⁴Lalakaneneni uuwanawa wooyakweni wo, haamboka ashike weni yene.

⁵Okukala kweni naku kale kwa fa kwaJesus Kristus.

⁶Oye okwa li e na uukwatya waKalunga, ye ina dhiladhila nando olumwe, a kambadhale nokuhakana okukala a fa Kalunga.

⁷Ihe okwi ihula uukalunga, e ta zala olupe lwomupika. Oye okwa ningi a fa omuntu nokwa holoka molupe lwomuntu.

⁸Oye okwi ifupipike nokwe ende ondjila yevuliko sigo omeso lye lyokomushigakano.

⁹Onkee ano Kalunga okwe mu yele pombandambanda nokwe mu luku edhina enene li vule omadhina agehe,

¹⁰opo kehe shimwe megulu nokombanda yevi nomohi yevi, shi tse oongolo medhina lyaJesus.

¹¹Nomokusimanekitha Kalunga He ayihe yi hokolole montaneho kutya Jesus Kristus oye Omuwa.

¹²Aaholike yandje, ngashika mwa kala hamu vulika aluhe kungame, manga nda li pune, vulikeni wo ngashingeyi, sho ndaa po we pune. Kaleni tamu longo nokutila nokukakama molwehupitho lyeni.

¹³Oshoka Kalunga oye mwene ta longo aluhe mune oku mu pa ehalo noonkondo, opo a tsakanithe elalakano lye ewanawa.

¹⁴Longeni iilonga yeni ayihe mwaa na omangungutulo nenge omaludhi.

¹⁵Kaleni aana yaKalunga mwaa na oshipo nomwa yela, mwaa na nando okantongo mokukala kweni muuyuni mbuka u na aantu ya pilaala noya goyoka. One omu na okukala tamu adhima mokati kawo, ngashika oonyothi tadhi adhima pombanda kegulu,

¹⁶sho tamu ya uvithile ohapu yomwenyo. Nena ngame otandi ka vula okwiitanga omolweni mesiku lyaKristus, oshoka oonkambadhala dhandje niilonga yandje ayihe kaya li ashike eihepeko lyowala.

¹⁷Nonando ombinzi yandje yi tilwehi kombanda yomayambo ngoka eitaalo lyeni tali ga yambele Kalunga, ngame onda nyanyukwa notandi ka nyanyukwa pamwe nane amuhe.

¹⁸Nane wo nyanyukweni pamwe nangame.

¹⁹Ngame ondi na einekelo mOmuwa Jesus kutya otandi ka vula okutuma mbala Timoteus kune, opo ndi tsuwe omukumo konkundana ndjoka tayi ka za kune.

²⁰Oshoka Timoteus oye awike he mu dhiladhila ngaashi ngame noku na oshimpwiyu nane.

²¹Oshoka ooyakweni ayehe oyi ipyakidhila ashike niinima yawo yene, haambyoka yaJesus Kristus.

²²Ihe uudhiginini we omu u shi, nkene twa kala tatu longo pamwe naye moshilonga shevaangeli ngashika he nomwana.

²³Ano oye tuu nda dhiladhila okutuma kune, uuna nda mono nkene tandi ningwa.

²⁴Ondi na nokuli einekelo okwiinekela Omuwa kutya ngame mwene wo otandi ke ya mbala kune.

²⁵Onde shi tala wo kutya osha pumbiwa okutuma kune omumwameme nomutumwa gweni, ngoka a kwatha ndje moluhepo lwandje. Oye Epafroditus, omukwiita omukwetu.

²⁶Oye okwe mu yuulukwa nokwa hala nokuhalelela oku mu talela po, oshoka okwa zizilikwa noonkondo molwaasho mwe shi uva kutya okwa li ta alukwa.

²⁷Eeno, oye okwa li ta alukililwa, konyala nokuli a se, ihe Kalunga okwe mu sile ohenda. Nokuli haye awike a silwa ohenda, ihe nangame wo, opo ndaa gwedhelwe oluhodhi olukwawo lu vule nduka.

²⁸Ngame onda hala nokuhalelela oku mu tuma kune, opo mu nyanyukwe, ngele tamu mu mono, noluhodhi lwandje lu ninge oluhwepo.

²⁹Mu taambeni ano nenyanyu, oshoka oye omumwanyoko mOmuwa. Aalumentu ya tya ngaaka ya simanekeni,

³⁰oshoka omolwoshilonga shaKristus okwa hupula omwenyo gwe, konyala nokuli a se, opo a kwathe ndje ekwatho ndyoka ne yene inaamu vula oku li pa ndje.