Read Oshindonga-Ombiimbeli Ondjapuki 2008 Philippians 3 Bible Online

Philippians 3 - Oshindonga-Ombiimbeli Ondjapuki 2008 bible

Philippians 3

¹Hugunina, aamwameme, Omuwa ne mu gwedhele ko natango enyanyu olindji. Ngame inandi shi kunyukwa okweendulula iinima mbyoka nde yi mu nyolele nale, ihe otashi mu koleke.

²Kotokeleni oombwa ndho, aantu mboka haa longo uuwinayi, aalumentu mboka haa itangele efukaleko lyokombanda.

³Oshoka aafukalekwa yashili otse mbaka hatu galikana Kalunga mOmbepo notwa nyanyukilwa okukala kwetu muKristus Jesus. Tse itatu itangele nando oshilonga shimwe shokombanda,

⁴nando ngame otandi vulu okwiinekela wo iinima ya tya ngaaka. Ngele ku na ngoka ta dhiladhila kutya ota vulu okwiinekela iilonga yokombanda, nena ngame ondi mu vule.

⁵Ngame tuu nguka nda fukalekwa konima yoshiwike shimwe okuza kokuvalwa kwandje. Ngame Omuisraeli kevalo, omunezimo lyaBenjamin, Omuhebelilela. Kombinga yokudhiginina ompango yAajuda onda li omufarisayi.

⁶Ngame onda li omulaadhi noonkondo mokutidhagana egongalo. Ngame onda li ndaa na okantongo kasha kombinga yuuyuuki mboka omuntu te u adha molwokuvulika komalombwelo gompango.

⁷Ihe ayihe mbyoka nda li nde yi tala yi na omupondo, ngashingeyi otayi etele ndje oshiponga omolwaKristus.

⁸Eeno shili, iinima ayihe yilwe oyo ekanitho lyowala, ngele tandi yi yeleke nokutseya Jesus Kristus, Omuwa gwandje, shoka osho oshinima shondilo shi vule ayihe. Omolwe onde ekelehi iinima ayihe nonde yi tala oyo iiyagaya yowala, opo ndi likole Kristus,

⁹ngame ndi kale muukumwe naye. Ngame kandi na we uuyuuki wandje mwene, uuyuuki mboka hau adhika mokuvulika kompango. Ihe ngashingeyi ondi na uuyuuki mboka tau gandjwa molweitaalo okwiitaala Jesus Kristus, uuyuuki tau zi kuKalunga nowi ikwatelela keitaalo.

¹⁰Shoka nde shi hala ngashingeyi, osho okutseya Kristus, okumakela oonkondo dheyumuko lye, okukala ndi na oshitopolwa momahepeko ge nondi mu fe mokusa,

¹¹opo nangame wo ndi yumudhwe mo meso, ndi ye momwenyo.

¹²Ngame itandi itanga kutya onda adha nale esindano moshinima shika nenge onda adha nale ethikilo. Aawe, otandi matuka, opo ndi li adhe, oshoka Jesus Kristus okwa likola ndje.

¹³Aamwameme, ngame inandi itala natango kutya onde li adha, aawe, ihe oshinima shimwe tandi ningi, otandi dhimbwa shoka shi li konima notandi ningi ashihe shoka tandi vulu, opo ndi adhe shoka shi li komeho gandje.

¹⁴Onkee otandi matuka ndu ukilila kethikilo, opo ndi ka likole ondjambi yesindano. Ondjambi ndjika oyo omwenyo gwomegulu, ngoka Kalunga e gu ithanena ndje molwaJesus Kristus.

¹⁵Ano tseni atuheni mboka twa koka pambepo, natu kaleni tatu dhiladhila ngeyi. Nongele nani oku na yamwe ye na omadhiladhilo gi ili, nena Kalunga ote ke mu yelithila oshinima shoka.

¹⁶Natu humeni owala komeho nondjila naanaa ndjoka twe ende nayo sigo oompaka.

¹⁷Aamwameme, kaleni nokuholela ndje. Tse otwe mu pe oshiholelwa oshiwanawa, onkee ano landuleni aantu mboka haa landula oshiholelwa shetu.

¹⁸Ngaashi nde mu lombwele nale olwindji, otandi shi endulula natango ndi na omahodhi kutya oku na aantu oyendji mboka ya ningi aatondi yeso lyaKristus lyokomushigakano.

¹⁹Oyo otaa ka ya sigo omoheli, oshoka uuhalu womalutu gawo oye u ningi kalunga kawo. Oyo ohaa isimanekele iinima mbyoka ya li ye na okukala ye yi sa ohoni nohaa dhiladhila ashike iinima mbyoka yomuuyuni mbuka.

²⁰Ihe tse uukwashilongo wetu ou li megulu notwa tegelela nondjuulukwe onene Omuwa gwetu Jesus Kristus, a ze megulu, e ye e tu hupithe.

²¹Oye tuu ngoka ta ka shitulula omalutu getu ngaka omankundi nomasi e te ga ningi, ga kale ngaashi olutu lwe lu na eadhimo. Oye ota longitha oonkondo dhe tadhi vulu okutula iinima ayihe kohi yepangelo lye.