Read Oshindonga-Ombiimbeli Ondjapuki 2008 Philippians 4 Bible Online

Philippians 4 - Oshindonga-Ombiimbeli Ondjapuki 2008 bible

Philippians 4

¹Onkee ano aamwameme, ne mboka ndi mu hole nonde mu yuulukwa, one enyanyu lyandje noshishani shandje. Kaleni aluhe mwa thikama omuthika mwi ikolelela mOmuwa.

²Euodia naSintike, otandi mu kumagidha, mu kambadhale okuuvathana ngashika aakiintu aamwayinathana mOmuwa.

³Nangoye wo, omuyakuli gwandje omwiinekelwa, onda hala, u kwathe aakiintu mboka, oshoka oyo oya longo nuudhiginini okutaandelitha evaangeli pamwe nangame naKlemens nonaalongi ooyakwawo yalwe ayehe mboka nda longo pamwe nayo, oomboka ye na omadhina ga nyolelwa membo lyaKalunga lyaanamwenyo.

⁴Kaleni aluhe mwa nyanyukwa mokukala mOmuwa. Otandi shi tumbula natango: nyanyukweni!

⁵Kaleni mu na olukeno naantu ayehe. Omuwa ote ya mbala.

⁶Inamu kala mu na nando oshimpwiyu shasha, ihe oompumbwe dheni dhi tseyithileni Kalunga momagalikano geni agehe. Ihe indileni aluhe nomwenyo gu udha ehambelelo.

⁷Nombili yaKalunga, ndjoka yi vule uunongo auhe wopantu, otayi gamene oomwenyo dheni nomadhiladhilo geni muKristus Jesus.

⁸Hugunina, aamwameme, kaleni nokudhiladhila iinima mbyoka iiwanawa noya gwana okusimanekwa: iinima mbyoka yoshili yo opala, yu uka, ya yogoka noyi na epopilo ewanawa.

⁹Ningeni iinima mbyoka mwe yi longwa nomwe yi lombwelwa kungame, ongele moohapu dhandje nenge omiilonga yandje. Nena Kalunga, ngoka te tu pe ombili, ota kala ihe pamwe nane.

¹⁰Onda nyanyukwa shili mOmuwa, sho mwa mono ishewe ompito okusila ndje oshimpwiyu konima yethimbo ele. Osho shoka mwa li mwa hala oku shi ninga shito, ihe inamu mona ompito.

¹¹Shika itandi shi popi omolwoluhepo, oshoka ondi igilila okukala naashoka ndi shi na,

¹²nashi kale oshishona nenge nashi kale oshindji. Onda pyokoka miinima ayihe: okukala nda kuta nenge okukala nda sa ondjala, okukala meloolo nenge okukala moluhepo.

¹³Ngame otandi vulu shaa shoka, oshoka Kristus ota koleke ndje.

¹⁴Ihe ne omwa ninga nawa shili, sho mwa kwatha ndje muudhigu wandje,

¹⁵Ne Aafilippi, omu shi shi nawa kutya, sho nda zile muMakedonia pomasiku ngeyaka gopetameko, manga nda li tandi uvitha elaka etoye, egongalo lyeni olyo alike lya li lya kwatha ndje. Eeno, ne amuke omwa li mwa topola pamwe nangame etano neshonopalo lyiiniwe.

¹⁶Ongame sho nda li ndi na oluhepo muTessalonika, one omwa li mwa tumine ndje ekwatho, halumwe aluke, ihe lwaali nokuli.

¹⁷Shika itashi ti, onda hala ashike ando okutaamba omagano, ihe onda hala, mu ilikolele sha ne yene.

¹⁸Ngashingeyi ondi na oshindji shi vule shoka nda pumbwa. Ondi na eloolo, Epafroditus sho e etele ndje omagano geni, taga ningi eyambo lyezimba lya nika nawa, lyo opala nolya hokiwa kuKalunga.

¹⁹Kalunga kandje, ngoka e na uuyamba auhe muKristus Jesus, ote ke mu gwanithila ashihe shoka mwe shi pumbwa.

²⁰Kalunga, Tate yetu, oye na simanekwe aluhe sigo aluhe. Amen.

²¹Kundilii po aantu yaKalunga ayehe noyaJesus Kristus. Aamwameme ayehe mboka ye li mpaka, otaye mu kundile po.

²²Aayapuki ayehe otaye mu kundile po, unene mboka yomuuwa womupangeli Omuroma.

²³Esilohenda lyOmuwa Jesus Kristus nali kale pamwe nane amuhe.