Read Oshindonga-Ombiimbeli Ondjapuki 2008 1 Thessalonians 3 Bible Online

1 Thessalonians 3 - Oshindonga-Ombiimbeli Ondjapuki 2008 bible

1 Thessalonians 3

¹Lwahugunina otwa nyengwa oku shi idhidhimikila. Otwa tokola okukala atuke muAtena,

²manga tatu tumu omumwatate Timoteus, ngoka a longo pamwe natse oshilonga shaKalunga shokuuvitha elaka etoye tali popi Kristus. Otwe mu tumu, e mu tse omukumo ye a koleke eitaalo lyeni,

³opo kwaa kale nando ogumwe ta shuna monima omolwomatidhagano. One omu shi shi kutya omatidhagano ga tya ngaaka ogo ombinga yimwe yehalo lyaKalunga mokukala kwetu.

⁴Oshoka sho twa li pune, otwe mu londodha kutya onatu ka tidhaganwa, naashika omwe shi mono kutya osho naanaa tashi ningwa ngashingeyi.

⁵Shika osho sha tumitha ndje Timoteus kune. Inandi vula we okwiidhidhimika, onkee onde mu tumu, opo a tale, ngele omu li tuu natango meitaalo. Kwaa ninge, pamwe omuhongololi e mu hongolola, niilonga yetu ayihe e tayi ningi eihepeko lyowala.

⁶Ngashingeyi Timoteus okwa galukile ishewe kutse nokwe etelele elaka lyenyanyu tali popi eitaalo nohole yeni. Okwe tu hokololele wo kutya ohamu tu dhimbulukwa aluhe nomwe tu yuulukwa noonkondo, ngashika naanaa natse wo twe mu yuulukwa.

⁷Aamwameme, otwa tsuwa omukumo omolweni mokuhepekwa nomomaudhigu getu. Eitaalo lyeni olye tu koleke,

⁸oshoka ngashingeyi oomwenyo omo dhi li, ngele ne otamu kala mwa kankama mOmuwa.

⁹Ehambelelo lyetu oli thike peni tu li na koshipala shaKalunga ketu, omolweni!

¹⁰Ohatu galikana Kalunga noomwenyo dhetu adhihe uusiku nomutenya, tu mone ompito yokumona iipala yeni, tse tu gwedhe ko shoka sha kambela keitaalo lyeni.

¹¹Kalunga Tate nOmuwa gwetu Jesus naye tu longekidhile ompito yoku mu talela po.

¹²Omuwa ne mu pe ohole yokuholathana, nohole yeni yokuhola aantu ayehe nayi koke yi thike pohole yetu yoku mu hola.

¹³Osho ngeyi ota koleke omitima dheni, mu kale aayapuki nomwaa na oshipo koshipala shaKalunga Tate, uuna Omuwa gwetu Jesus te ya pamwe naayapuki ye ayehe.