Read Oshindonga-Ombiimbeli Ondjapuki 2008 1 Thessalonians 5 Bible Online

1 Thessalonians 5 - Oshindonga-Ombiimbeli Ondjapuki 2008 bible

1 Thessalonians 5

¹Aamwameme, kape na ompumbwe yoku mu nyolela kombinga yethimbo notundi, uuna iinima mbika tayi ka ningwa.

²Oshoka omwa tseya nawa kutya esiku lyOmuwa otali ya ongomufuthi te ende uusiku.

³Manga aantu ye li mokutya: “Ope na ombili, naayihe oya gamenwa,” nena ohaluka ehanagulo otali ya adha. Itaa ka vula okuya ontuku, oshoka otashi ka kala ngaashi omusimba ta adhika koshitheta.

⁴Aamwameme, ne kamu shi yomomilema, esiku ndyoka li mu adhe ando ohaluka ngaashi omufuthi.

⁵Ne amuhe aantu yomuuyelele noyomomutenya. Otse katu shi aantu yomuusiku nenge yomomilema.

⁶Onkee ano inatu kaleni twa kotha ngaashi yalwe; tu kaleni twa tonata notu na eidhiliko.

⁷Aakothi ohaa kotha uusiku noonkolwi ohadhi kolwa uusiku.

⁸Ihe otse aantu yomuuyelele, onkee otu na okukala tu na eidhiliko. Tu zaleni eitaalo nohole ongehuuyanza, netegameno lyehupitho lyetu ongegala lyosheela.

⁹Kalunga ine tu hogolola, e tu geele, ihe otu hupithwe omolwOmuwa gwetu Jesus Kristus.

¹⁰Oye a si peha lyetu, opo tu kale pamwe naye, uuna te ya, nokashi na mbudhi kutya otu na omwenyo nenge otwa sa.

¹¹Onkee ano kumagidhathaneni ne mu kwathathane, ngaashi hamu shi ningi nokuli.

¹²Aamwameme, otatu mu indile, mu simaneke mboka taa longo mokati keni. Omuwa Kalunga oye e ya hogolola, ye mu wilike noye mu pukulule.

¹³Ya simanekeni ne mu ya hole omwolwoshilonga shoka taye shi longo. Kaleni mu na ombili mokati keni.

¹⁴Aamwameme, otatu mu kumagidha: gandeni aananyalo, tseni aambanda omukumo, ambidhidheni aankundi ne mu idhidhimikile ayehe.

¹⁵Kotokeni, kwaa kale nando omuntu ta galulile mukwawo uuwinayi, ihe lalakaneneni aluhe okuningilathana uuwanawa noku u ningila wo aantu ayehe.

¹⁶Nyanyukweni aluhe,

¹⁷galikaneni aluhe,

¹⁸panduleni aluhe. Shika osho Kalunga a hala, mu ninge mokukala kweni muKristus Jesus.

¹⁹Inamu keelela Ombepo Ondjapuki,

²⁰inamu dhina omahunganeko.

²¹Konakoneni iinima ayihe; dhiginineni shoka oshiwanawa,

²²ne mu yande uuwinayi kehe.

²³Kalunga kombili na yapule okukala kweni akuhe ye ne mu gamene, opo ombepo, omwenyo nolutu yi kale yaa na nando oshipo sigo okokugaluka kwOmuwa gwetu Jesus Kristus.

²⁴Ngoka he mu ithana, ote ke shi gwanitha, oshoka oye omwiinekelwa.

²⁵Aamwameme, tu galikanenii wo.

²⁶Kundilii po ooitaali ayehe nohole yaamwayinathana.

²⁷Otandi mu kumagidha palombwelo lyOmuwa, ontumwafo ndjika mu yi leshele ooitaali ayehe.

²⁸Esilohenda lyOmuwa gwetu Jesus Kristus nali kale nane.