Read Oshindonga-Ombiimbeli Ondjapuki 2008 Joshua 1 Bible Online

Joshua 1 - Oshindonga-Ombiimbeli Ondjapuki 2008 bible

Joshua 1

¹Konima yeso lyaMoses, omumati gwOmuwa, Omuwa okwa popitha omukwathi gwaMoses, Josua yaNun.

²Okwa ti kuye: “Omuntu gwandje Moses okwa si. Ngashingeyi ilongekidha, ngoye noshigwana shaIsrael, mu tokole omulonga Jordan, mu ye mevi ndyoka tandi ke li ya pa.

³Ngaashi nda lombwele Moses, onde mu pe noshigwana shandje ashihe evi alihe ndyoka tamu ka lyata.

⁴Oongamba dhalyo otadhi ka tameka okuza kombuga muumbugantu, sigo okoondundu dhaLibanon muumbangalantu; okuza komulonga omunene Eufrat muuzilo otadhi ka taakana oshilongo shAaheti, sigo Efuta lyopokati kuuninginino.

⁵Josua, kape na ngoka te ku itakeke e te ku dhenge ando, manga u na omwenyo. Ote kala pamwe nangoye, ngaashi nda li naMoses. Ote kala nangoye aluhe; itandi ke ku etha nando.

⁶Ikolelela e to kala nomukumo, oshoka oto ka ninga omuwiliki gwoshigwana shika, nge tashi ka lala evi ndika nde li uvanekele oohekulu nokugana.

⁷Onkee ano ikolelela e to kala nomukumo; dhiginina ompango ayihe ndjoka omuntu gwandje Moses e yi ku pe. Ino dhina nando okatumbulo kamwe kayo, opo u kale nawa shaa mpoka to yi.

⁸Kotoka aluhe, embo ndika lyompango li kale aluhe tali leshwa melongelokalunga lyeni. Yi ilonga omutenya nuusiku, u vulike kwaayihe ya nyolelwa mo. Nena oto kala omusindani nomunelago.

⁹Dhimbulukwa kutya onde ku lombwela, u ikolelele nou kale nomukomo. Ino tila ngoye ino tyololoka, oshoka ongame, Omuwa Kalunga koye, ndi li pungoye shaa nkoka to yi.”

¹⁰Nena Josua okwa lombwele aawiliki,

¹¹ye ende nontanda, yo ya lombwele oshigwana ya tye: “Longekidheni iikulya, oshoka konima yomasiku gatatu otamu ka tokola omulonga Jordan, mu ka lale evi ndyoka Omuwa Kalunga keni te li mu pe.”

¹²Josua okwa lombwele ezimo lyaRuben nolyaGad netatazimo lyaManasse ta ti:

¹³“Dhimbulukweni shoka omuntu gwOmuwa Moses e mu lombwele kutya Omuwa Kalunga keni ote ke mu pa evi ndika lyokuuzilo waJordan, li ninge lyeni.

¹⁴Aakiintu yeni, aana yeni niimuna otayi kala mpaka, ihe aakwiita yeni ya homatela olugodhi otaa ka taaguluka, ya tetekele Aaisraeli ooyakweni, opo ye ya kwathe,

¹⁵sigo ya lala evi lyokuuninginino waJordan, ndyoka Omuwa Kalunga keni e li ya pe. Ihe ngele a gandja egundjilo komazimo agehe gaIsrael, nena otamu galuka, mu ye mu kale mevi lyeni muka muuzilo waJordan, ndyoka Moses, omuntu gwaKalunga, e li mu pe.”

¹⁶Oyo ya yamukula Josua ya ti: “Otatu ningi ashihe shoka to tu lombwele notatu yi nkoka to tu tumu.

¹⁷Otatu vulika kungoye, naanaa ngaashi twa li hatu vulika kuMoses. Omuwa Kalunga koye na kale nangoye, ngaashi a li naMoses.

¹⁸Oongoka ta thindanda komalombwelo goye ye ita vulika kugo, na dhipagwe. Ikolelela ngoye u kale u na omukumo.”