Read Oshindonga-Ombiimbeli Ondjapuki 2008 Joshua 11 Bible Online

Joshua 11 - Oshindonga-Ombiimbeli Ondjapuki 2008 bible

Joshua 11

¹Omukwaniilwa Jabin gwaHazor sho u uvu onkundana yomasindano gAaisraeli, okwa tumu elaka komukwaniilwa Jobab gwaMadon, ngoka gwaShimron naangoka gwaAksaf,

²osho wo kaakwaniilwa mboka ya kala mevi lyokoondundu kuumbangalantu, molusilu lwaJordan kuumbugantu wEfuta lyaGalilea, kiikulundundu yoponyonga nopomunkulofuta popepi naDor.

³Okwa tumu wo elaka kAakaanana koombinga adhihe mbali dhaJordan, kAayamori, kAaheti, kAaperesi nokAayebusi mevi lyokoondundu, osho wo kAahevi ya kala ponyonga yondundu Hermon mevi lyaMispa.

⁴Oye ya naakwiita yawo ayehe. Oya li oyendjiyendji ya fa ehekevi pooha dhefuta. Oya li ye na wo uukambe owindji nomatembakwiita ogendji.

⁵Aakwaniilwa mbaka ayehe oya hangenene olugodhi noye ya kumwe e taa yungu ontanda pokalonga kaMerom, ya kondjithe Israel.

⁶Omuwa okwa ti kuJosua: “Ino ya tila. Ngula pethimbo ndika otandi ya gandja ayehe ya sindika miikaha yaIsrael. Otamu ka lemaneka uukambe wawo nokufika po omatemba gawo guukwiita.”

⁷Josua naakwiita ye oye ya homona oshikumithi okalonga kaMerom.

⁸Omuwa okwa pe Aaisraeli esindano; Aaisraeli oye ya ponokele noye ya tidha sigo oMisrefot Majim naSidon kuumbangalantu nokolusilu lwaMispe kuuzilo. Oye ya kondjitha, sigo inaku hupa we nando ogumwe gwawo.

⁹Josua okwe ya ningile, ngaashi Omuwa e mu lombwele. Okwa lemaneke uukambe wawo nokwa fike po omatemba gawo guukwiita.

¹⁰Opo ihe Josua okwa piluka, a kwata po Hazor e ta dhipaga omukwaniilwa gwasho. (Pethimbo ndiyaka Hazor osha li oshilando oshinankondo shi vule ayihe yilwe.)

¹¹Oya dhipaga ayeheyehe; inapu hupa nando ogumwe, noshilando osha fikwa po.

¹²Josua okwa kwata po iilando mbika ayihe naakwaniilwa yayo nokwa dhipagitha ayehe, naanaa ngaashi Moses, omumati gwOmuwa, a li e mu lombwele.

¹³Ihe Aaisraeli inaa fika nando oshimwe shomiilando mbyoka yokiikulundundu kakele kaHazor, shoka Josua a fike po.

¹⁴Miilando mbika Aaisraeli oya hakana iinima ayihe yondilo niimuna noya kala nayo. Ihe oya dhipaga omuntu kehe; inaa hupitha nando ogumwe.

¹⁵Omuwa okwa li a lombwele omumati gwe Moses, osho wo Moses okwa li a lombwele Josua, naJosua okwa li a vulika. Okwa ningi ashihe shoka Omuwa a li a lombwele Moses.

¹⁶Josua okwa lala evi alihe — evi lyokoondundu niikulundundu yoponyonga yadho, kuumbangalantu nokuumbugantu, oshitopolwa ashihe shaGoshen nombinga ihaayi lokwa

¹⁷kuumbugantu washo, osho wo olusilu lwaJordan. Oshitopolwa osha li sha taandela okuza kondundu Halak kuumbugantu popepi naEdom, sigo oBaal Gad kuumbangalantu molusilu lwaLibanon kuumbugantu wondundu Hermon. Ethimbo ele Josua okwa li ta kondjitha aakwaniilwa yoshitopolwa shika, ndele okwe ya sindi ayehe e te ya dhipaga.

¹⁹Oshilando shimwe ashike shoka sha panga ombili nAaisraeli, osha li Gibeon, shoka sha kalwa kAahevi. Iilando ayihe yilwe oya sindika miita.

²⁰Omuwa okwa li e ya uthile okukondjitha Israel, opo ya wape okupangulilwa okuhanagulwapo pwaa na henda. Shika osho shoka Omuwa a lombwele Moses.

²¹Pethimbo ndiyaka Josua okwa yi e ta thekagula po oludhi lwaalefule halu ithanwa Aayanakim. Oya kala mevi lyokoondundu — muHebron, Debir, Anab nomevi alihe lyokoondundu dhaJuda naIsrael. Josua okwe ya hanagula po sheke niilando yawo.

²²Mevi lyAaisraeli inamu thigala nando Omuanakim gumwe; omandaangela oga kala ngaa muGaza, Gat naAshdod.

²³Josua okwa kwata po evi alihe, ngaashi Omuwa a lombwelele Moses. Josua okwe li pe Aaisraeli, li ninge lyawo nokwe li topola miitopolwa, ezimo kehe oshitopolwa shalyo. Osho ngeyi Aaisraeli oya ngungile ihe, iita sho ya kuka.