Read Oshindonga-Ombiimbeli Ondjapuki 2008 Joshua 13 Bible Online

Joshua 13 - Oshindonga-Ombiimbeli Ondjapuki 2008 bible

Joshua 13

¹Josua okwa li a kulupa nokuli. Omuwa okwa ti kuye: “Ngoye owa kulupa nokuli, ihe oku na natango ombinga onene yevi ndyoka li na okukuthwa ko:

²oshilongo ashihe shAafilisti noshAageshur,

³osho wo shoka shAayavvim kuumbugantu. (Evi okuza kokalonga Shihor pongamba yaEgipiti, sigo okoshitopolwa shaEkron, olya talwa lyAakaanana; aakwaniilwa yAafilisti oya kala muGaza, Ashdod, Ashkelon, Gat naEkron.)

⁴Nkoka oku na natango oshilongo ashihe shAakaanana, naMeara (shoka oshAasidoni), sigo Afek pongamba yAayamori;

⁵evi lyAagebali; Libanon ashihe kuuzilo okuza kuBaal Gad kuumbugantu wondundu Hermon, sigo eelo lyaHamat.

⁶Shika osha kwatelele mo oshilongo ashihe shAasidoni, mboka ya kala mevi lyokoondundu pokati koondundu dhaLibanon naMisrefot Majim. Otandi ka tidha mo iigwana mbika ayihe mokuhuma komeho kwoshigwana shaIsrael. Ou na okutopolela Aaisraeli evi, naanaa ngaashi nde ku lombwela.

⁷Ngashingeyi evi ndika li topolela omazimo omulongo netatazimo lyaManasse, li ninge eliko lyago.”

⁸Ezimo lyaRuben nolyaGad netatazimo lyaManasse oga taamba nale nokuli evi ndyoka Moses, omumati gwOmuwa, e li ga pe; olya li kuuzilo womulonga Jordan.

⁹Oshitopolwa shago osha li sha taandela sigo Aroer (kooha dholusilu lwaArnon) nokoshilando shopondinga yolusilu ndoka nosha kwatelele mo etumbalalovi okuza Medeba, sigo oDibon.

¹⁰Osha adha kongamba yaAmmon notashi kwatelele mo iilando ayihe mbyoka ya li ya pangelwa komukwaniilwa gwAayamori Sihon, ngoka a pangele muHeshbon.

¹¹Osha kwatelele mo Gilead, oshitopolwa shaGeshur noshaMaaka, ondundu Hermon ayihe naBaasha ashihe, sigo oSalka.

¹²Osha kwatelele mo oshilongo shaOg, Omurafa omuhugunini, ngoka a pangele muAshtarot naEdrei. Moses okwa sindile aantu mbaka e te ya tidha po.

¹³Onkene tuu Aaisraeli inaa tidha po Aageshuri nAamaaka; oya kala mAaisraeli sigo onena.

¹⁴Moses ina gandja nando evi kAalevi. Ngaashi Omuwa a lombwelele Moses, oya li ye na okupewa oshitopolwa moondjambo ndhoka dha lungunithilwa Omuwa Kalunga kaIsrael.

¹⁵Moses okwa adhika a gandja oshitopolwa shimwe shevi komaludhi gomezimo lyaRuben.

¹⁶Oshitopolwa shago osha li sha taandela sigo Aroer (kooha dholusilu lwaArnon) nokoshilando shopondinga yolusilu ndoka nosha kwatelele mo etumbalalovi alihe momudhingoloko gwaMedeba.

¹⁷Osha kwatelele mo Heshbon niilando ayihe yoketumbalalovi: Dibon, Bamot Baal, Bet Baal Meron,

¹⁸Jahas, Kedemot, Mefaat,

¹⁹Kirjatajim, Sibma, Zeret Shakar koshikulundundu shomolusilu,

²⁰Betpeor, omasilukila goondundu Pisga naBet Jeshimot.

²¹Osha kwatelele mo iilando ayihe yoketumbalalovi noshilongo ashihe shomukwaniilwa Omuamori Sihon, ngoka a li a pangele kuHeshbon. Moses okwe mu sindi, osho wo aapangeli yaMidian: Evi, Rekem, Sur, Hur naReba. Ayehe mbaka oya li aaniikandjo moshilongo shomukwaniilwa Sihon.

²²Mokati kaamboka ya dhipagwa kAaisraeli, omwa li wo omwaanekeli Bileam yaBeor.

²³Jordan ogwa li ongamba yokuuninginino yezimo lyaRuben. Mbika oyo iilando nomikunda dha pewa omaludhi gomezimo lyaRuben, dhi ninge eliko lyawo.

²⁴Moses okwa li a gandja wo oshitopolwa shimwe shevi komaludhi gomezimo lyaGad.

²⁵Oshitopolwa shago osha kwatelele mo Jaser niilando ayihe yomuGilead, etata lyevi lyaAmmon sigo Aroer, shoka shi li kuuzilo waRabba;

²⁶evi lyago olya li lya taandela okuza Heshbon, sigo oRamat Mispe naBetonim, okuza Mahanaim, sigo ongamba yaDebir.

²⁷Molusilu lwaJordan osha kwatelele mo Bet Haram, Bet Nimra, Sukkot naZafon, oshihupe shoshilongo shomukwaniilwa Sihon gwaHeshbon. Ongamba yasho yokuuninginino oya li omulonga Jordan, sigo Efuta lyaGalilea.

²⁸Mbika oyo iilando nomikunda dha pewa omaludhi gomezimo lyaGad, dhi ninge eliko lyawo.

²⁹Moses okwa li a gandja oshitopolwa shimwe shevi komaludhi gometatazimo lyaManasse.

³⁰Oshitopolwa shago osha li sha taandela sigo oMahanaim nosha kwatelele mo Baasha ashihe — oshilongo ashihe shaOg, omukwaniilwa gwaBaasha, osho wo omikunda adhihe omilongo hamano dhaJair muBaasha.

³¹Osha kwatelele mo etata lyaGilead, osho wo Ashtarot naEdrei, iilandopangelo yoshilongo shaOg muBaasha. Ayihe mbika oya pewa omaludhi ga za muMakir yaManasse.

³²Osho Moses a topola evi lyokuuzilo waJeriko naJordan, sho a li kolushandja lwaMoab.

³³Ihe Moses ina gandja evi lyasha kezimo lyaLevi. Okwe ya lombwele kutya oshitopolwa shawo otashi zi moondjambo tadhi yambelwa Omuwa Kalunga kaIsrael.