Read Oshindonga-Ombiimbeli Ondjapuki 2008 Joshua 16 Bible Online

Joshua 16 - Oshindonga-Ombiimbeli Ondjapuki 2008 bible

Joshua 16

¹Ongamba yokuuninginino wevi lya pewa oluvalo lwaJosef, otayi tameke muJordan popepi naJeriko, kuuzilo woothithiya dhaJeriko, yu uka kombuga. Okuza kuJeriko oyu uka kevi lyokoondundu, sigo okuBetel.

²Okuza kuBetel oyu uka kuLus notayi tsikile kuAtarot, nkoka Aayarki ya kala.

³Nena oyu uka kuuninginino kehala lyAajaflet, sigo okuBethoron shomolusilu. Okuza nkoka otayi tsikile kuGeser nokuhulila mEfuta lyopokati.

⁴Oluvalo lwaJosef, ezimo lyaEfraim nolyaManasse kuuninginino, olwa pewa evi ndika, li ninge eliko lyalwo.

⁵Oshitopolwa shomaludhi gomezimo lyaEfraim osho shika: Ongamba yasho oyu uka okuza kuAtarot Addar lwokuuzilo kuBethoron shopombanda,

⁶nokuza nkoka sigo Efuta lyopokati. Kuumbangalantu Mikmetat oyo ongamba. Kuuzilo waahoka ongamba otayi goyokele lwokuTaanat Shilo noku shi pitilila kuuzilo yu uka kuJanoa.

⁷Okuza kuJanoa otayi silukile kuAtarot naNaara, tayi adha Jeriko e tayi hulile muJordan.

⁸Okuza kuTappua ongamba oyu uka kuuninginino kokalonga Kana e tayi hulile mEfuta lyopokati. Evi ndika olya pewa omaludhi gomezimo lyaEfraim, li ninge eliko lyago,

⁹pamwe niilando nomikunda dhimwe dhi li meni lyoongamba dhaManasse.

¹⁰Ihe inaa tidha mo Aakaanana mboka ya kala muGeser, onkee Aakaanana oya kala mokati kAaefraim sigo onena, ihe oya thiminikwa okulonga ngaapika.