Read Oshindonga-Ombiimbeli Ondjapuki 2008 Joshua 17 Bible Online

Joshua 17 - Oshindonga-Ombiimbeli Ondjapuki 2008 bible

Joshua 17

¹Oshitopolwa shimwe shevi kuuninginino osha pewa omagumbo gamwe gomoluvalo lwaManasse, osheeli shaJosef, Makir, he yaGilead, okwa li osheeli shaManasse. Shoka okwa li omukwiita ofule, okwa pewa Gilead naBaasha kuuzilo waJordan.

²Evi lyokuuninginino waJordan olya pewa oshihupe shomomagumbo gaManasse: Abieser, Helek, Asriel, Shekem, Hefer naShemida. Mbaka oya li aalumentu yomoluvalo lwaManasse gaJosef noya li aakuluntu yomagumbo.

³Zelofhad yaHefer yaGilead yaMakir gaManasse okwa li kee na nando omwanamati, aakadhona ayeke. Omadhina gawo ogo Mahla, Noa, Hogla, Milka naTirza.

⁴Oya yi komuyambi Eleasar naJosua yaNun nokaawiliki e taa ti: “Omuwa okwa lombwele Moses, e tu pe ngaashi aalumentu aakwetu oshitopolwa shevi, shi ninge eliko lyetu.” Oyo noya pewa eliko lyawo mokati koohegona aasamane, ngaashi sha tiwa kOmuwa.

⁵Osho ngeyi Manasse okwa pewa iitopolwa omulongo kakele kaGilead naBaasha kuuzilo waJordan,

⁶oshoka noluvalo lwe lwaakiintu olwa pewa evi ngaashi ndoka lwaalumentu. Evi lyaGilead olya pewa oshihupe sholuvalo lwaManasse.

⁷Oshitopolwa shaManasse osha li okuza Aser, sigo oMikmetat kuuzilo waShekem. Ongamba oyu uka kuumbugantu nokweedhilila mo aantu yomuEntappua.

⁸Evi momudhingoloko gwaTappua olya li lyaManasse, ihe oshilando Tappua pongamba osha li sholuvalo lwaEfraim.

⁹Opo ihe ongamba tayi silukile kokalonga Kana. Iilando yokuumbugantu wokalonga oya li yaEfraim, nando oya kala moshitopolwa shaManasse. Ongamba yaManasse otayi ende kombinga yokuumbangalantu wokalonga notayi hulile mEfuta lyopokati.

¹⁰Efraim okwa li kuumbugantu, Manasse okuumbangalantu, nEfuta lyopokati olya li ongamba yawo yokuuninginino. Aser okwa li kuuningininombangalantu nalsaskar okuuzilombangalantu.

¹¹Miitopolwa yaIssaskar noyaAser Manasse okwa pewa mo Betshan naJibleam pamwe nomikunda dhayo, osho wo Dor (shoka shokomunkulo), Endor, Taanak, Megiddo niitayilando yayo.

¹²Ihe Aamanasse inaa wapa okutidha mo aantu miilando mbika, onkee Aakaanana oya tsikile okukala muyo.

¹³Nokuli Aaisraeli nando oya ningi aanankondo, inaa tidha mo Aakaanana, ihe oye ya thiminike oku ya longela.

¹⁴Oluvalo lwaJosef olwa ti kuJosua: “Omolwashike we tu pe ashike oshitopolwa shimwe shevi, shi ninge eliko lyetu? Otu li oyendji, oshoka Omuwa okwe tu yambeka.”

¹⁵Josua okwa yamukula: “Ngele ne oyendji nevi lyokoondundu dhaEfraim eshona nane, nena indeni momakuti, mu ki ikokolele omapya mevi lyAaperisi nolyAarafa,”

¹⁶Oyo ya yamukula: “Evi lyokoondundu inali tu gwanena, ihe Aakaanana ya kala momalushandja, oye na omatembakwiita giiyela, ayehe mboka ye li muBetshan nomikunda dhasho naamboka ye li molusilu lwaJesreel.”

¹⁷Josua okwa ti kezimo lyaEfraim nolyaManasse: “Eeno shili, ne oyendji, ne aanankondo wo unene. Ne otamu pumbwa evi enene li vule oshitopolwa shimwe.

¹⁸Evi lyokoondundu olyeni. Nonando olyo okuti, li kokoleni, li ninge lyeni, sigo okooha dhalyo. Kombinga yAakaanana, ya tidhii po, nando oye na omatembakwiita giiyela yo aanankondo.”