Read Oshindonga-Ombiimbeli Ondjapuki 2008 Joshua 2 Bible Online

Joshua 2 - Oshindonga-Ombiimbeli Ondjapuki 2008 bible

Joshua 2

¹Nena Josua okwa tumu oondaadhi mbali okuza kontanda yokuShittim nokwe dhi lombwele, dhi ye dhi ka ndaadhe evi lyaKaanan, unene oshilando Jeriko. Sho dhe ya moshilando, odha ka lala megumbo lyohonda edhina lyayo Rahab.

²Omukwaniilwa gwaJeriko oku uvu kutya Aaisraeli yamwe oye ya uusiku, ya ndaadhe oshilongo.

³Onkee a tumu elaka kuRahab tali ti: “Aalumentu mboka ye ya maandjeni, oye ya okundaadha oshilongo ashihe. Ya piitha mo.”

⁴Rahab okwa yamukula: “Aalumentu yamwe oyi ile shili maandjetu, ihe inandi tseya mpoka ya zi. Yo yene oya yi peningino lyetango, manga omweelo gwoshilando inaagu edhilwa. Kandi shi wo nkoka yu uka, ihe ngele otamu ya landula mbala, otamu vulu oku ya kwata.” (Ihe Rahab okwa adhika a fala oondaadhi ndhoka mbali pombanda yondunda noku dhi holeka kohi yiigwanga yoliina, mbyoka e yi tulile ko.)

⁷Aantu yuuwa oya zi mo moshilando, nomweelo ogwa patwa. Oya ka lengaalenga oondaadhi dhAaisraeli, sigo oponkondo yaJordan.

⁸Oondaadhi manga inaadhi ilongelela, dhi ka lale, Rahab okwa londo pombanda

⁹e ta ti kudho: “Ondi shi shi kutya Omuwa okwa gandja evi ndika miikaha yeni. Kehe omuntu moshilongo shika okwe mu tila.

¹⁰Otu uvu, nkene Omuwa a pwinike Efuta etiligane komeho geni, sho mwa tembuka muEgipiti. Otu uvu, nkene mwa dhipaga Sihon naOg, aakwaniilwa yaali yAayamori kuuzilo waJordan.

¹¹Sho twe shi uvu, otwa tameke okusholola. Otwa kanitha omukumo omolweni. Omuwa Kalunga keni oye Kalunga e li megulu nokombanda yevi wo.

¹²Ngashingeyi ganeni kuye kutya otamu ka ninga nawa egumbo lyandje, ngaashi ngame nde mu ningile nawa, ne mu pe ndje endhindhiliko lyontumba, opo ndi mu inekele.

¹³Uvanekelii ndje kutya otamu ka hupitha tate nameme, aamwameme aakiintu naalumentu, naangandjawo ayehe. Inamu tu etha, tu dhipagwe.”

¹⁴Aalumentu oya ti kuye: “Kalunga ne tu geele, ngele tse itatu ningi, ngaashi tatu ti. Ngele ito lombwele aantu shoka twe endele, otatu ku uvanekele kutya Omuwa ngele a gandja evi ndika miikaha yetu, otatu ke ku ninga nawa.”

¹⁵Rahab okwa li megumbo lya tungilwa mekuma lyoshilando, onkee okwa kulukitha aalumentu mekende ye endjelele kongodhi.

¹⁶Okwa ti kuyo: “Indeni kevi lyokoondundu, opo aambala kaaye mu mone. Holameni nkwiyaka omasiku gatatu, sigo taa galuka. Nena otamu vulu okutsikila ondjila yeni.”

¹⁷Aalumentu oya ti kuye: “Otatu dhiginine omauvaneko ngoka twe ge ku pe.

¹⁸Ninga ano ngeyi. Uuna tatu ponokele evi lyeni, tula ongodhi ndjika ontiligane mekende moka we tu piithile. Kaleka aakuluntu yoye naamwanyoko maandjeni.

¹⁹Ngele ope na ngoka ta zi mo megumbo, nena ombedhi oye mwene ngele ta si; tse katu na ndjo mpoka. Ihe ngele opu na gumwe megumbo ta mono oshiponga shasha, nena ombedhi oyetu.

²⁰Ihe ngele oto lombwele ngandi sho twa ningi, nena itatu dhiginine we euvaneko lyetu ndyoka tu uvathana nangoye.”

²¹Rahab okwa zimine e te ya etha, ya ye. Sho ya yi, okwa mangele ongodhi ontiligane mekende.

²²Oondaadhi odha yi moondundu nodha holama. Aambala oye dhi kongo noshilongo ashihe omasiku gatatu, ihe inaye dhi mona. Onkee oya shuna kuJeriko.

²³Nena oondaadhi ndhoka mbali odha kuluka koondundu nodha taaguluka omulonga e tadhi shuna kuJosua. Odhe mu lombwele ashihe shoka sha ningwa po

²⁴nodha ti: “Otu shi shi nawalela kutya Omuwa okwe tu pa oshilongo shika ashihe. Aantu ayehe yaahoka oye tu tila.”