Read Oshindonga-Ombiimbeli Ondjapuki 2008 Joshua 20 Bible Online

Joshua 20 - Oshindonga-Ombiimbeli Ondjapuki 2008 bible

Joshua 20

¹Nena Omuwa okwa lombwele Josua ta ti:

²“Lombwela Aaisraeli u tye: ‘Ihogololeleni iilando yokwiigamena, ngaashi nda popi naMoses, e mu lombwele.

³Omuntu ngoka a dhipaga mukwawo hanowina, ota vulu okuya mo, a holame ngoka a hala oku mu shunina uuwinayi.

⁴Ota vulu okutondokela mushimwe shomiilando mbika e ta yi kehala lyepangulo posheelo shoshilando, a fatululile aawiliki sho a ningi. Nena otaye mu fala moshilando e taye mu pe eha lyokukala mo, opo a kale puyo.

⁵Ngele ota landulwa kungoka a hala oku mu dhipagela eyono lye, kaye na oku mu gandja miikaha ye. Naye mu gamene, oshoka ina dhipaga omuntu owina ye ke mu tonde shito.

⁶Omudhipagi na kale moshilando shoka, sigo a pangulwa montaneho yaayehe nosigo okeso lyomuyambimukuluntu ngoka ta adhika pethimbo ndyoka. Nena omulumentu ota vulu okushuna koshilando shaandjawo, nkoka a zile ontuku.’ ”

⁷Onkee kuuninginino waJordan oya hogolola Kedesh muGalilea, mevi lyokoondundu dhaNaftali, Shekem mevi lyokoondundu dhaEfraim naHebron mevi lyokoondundu dhaJuda.

⁸Kuuzilo waJordan, metumbalalovi lyombuga kuuzilo waJeriko, oya hogolola Bezer moshitopolwa shaRuben, Ramot Gilead moshitopolwa shaGad naGolan muBaasha moshitopolwa shaManasse.

⁹Mbika oyo iilando yokwiigamena ya hogololelwa Aaisraeli ayehe naakwiilongo ayehe ya kala mokati kawo. Kehe ngoka a dhipaga omuntu hanowina, ota vulu okwiimonena egameno muyo komuntu ngoka a hala oku mu dhipagela eyono lye. Ina wapa okudhipagwa, manga inaa pangulwa tango montaneho yaayehe.