Read Oshindonga-Ombiimbeli Ondjapuki 2008 2 Thessalonians 2 Bible Online

2 Thessalonians 2 - Oshindonga-Ombiimbeli Ondjapuki 2008 bible

2 Thessalonians 2

¹Mpaka otandi popi kombinga yokugaluka kwOmuwa gwetu Jesus Kristus nokombinga yoku ka gongelwa kwetu, tu ka kale puye. Aamwameme, otandi mu indile,

²inamu etha, mu piyaganekwe nuupu nenge mu tilithwe koohapu tadhi ti kutya esiku lyOmuwa olye ya nale. Inamu itaala oohapu dha tya ngaaka, nando dhi kale dhi ikwatelela mehunganeko lyontumba nenge moshipopiwa nenge montumwafo ya zi kutse aniwa.

³Inamu etha, mu fundjalekwe nando okulye. Oshoka esiku ndyoka itali ya, manga aantu oyendji inaa tsa ondumbo naKalunga nomanga Mwiinayi mwene, ngoka i ilongela oheli, inaa holoka.

⁴Oye ota ka kondjitha ayihe mbyoka hayi ithanwa naKalunga nenge iiyapuki. Ote ki inenepekela iinima ayihe nota ka kuutumba motempeli yaKalunga e ti iluku Kalunga.

⁵Otamu dhimbulukwa tuu? Ayihe mbika onde yi mu lombwelele, manga nda li pune.

⁶Ihe sigo onena ope na shoka tashi keelele oshinima shika shaa ningwe, nane omwa tseya kutya oshike. Onkee ano Mwiinayi ota ka holoka pethimbo lye mu opalela.

⁷Uukolokoshi we otau longo nokuli meholamo, ihe shoka tashi ka ningwa po, itashi ningwa, manga pu na ngoka e shi keelela.

⁸Nena Mwiinayi ngoka ota ka holoka, ihe Omuwa Jesus, uuna te ya, ote ke mu dhipaga nomuku gwomokana ke e te mu hanagula po neadhimo lyeholoko lye.

⁹Mwiinayi ngoka ote ke ya e na oonkondo dhaSatana nota ka longa iikumithalonga, omandhindhiliko niilongankondo yiifundja yoludhi kehe,

¹⁰nota ka longitha omakoto okupukitha mboka ye li mondjila ndjoka yu uka mekano. Oyo otaa ka kana, oshoka inaa taamba ohole noshili yoku ya hupitha.

¹¹Onkee ano Kalunga ote ke ya tumina epukitho edhigu, opo yi itaale iifundja.

¹²Nena ayehe mboka ya hokwa uulunde noinaa hala okwiitaala oshili, otaa ka pangulwa.

¹³Aamwameme naaholike yOmuwa, tse otu na okuhambelela Kalunga aluhe omolweni. Oshoka Kalunga okwe mu hogolola petameko, mu hupithwe. Oye okwe mu ningi aantu ye aayapuki koonkondo dhOmbepo nokokwiitaala kweni oshili.

¹⁴Kalunga okwe mu ithana nelaka etoye ndyoka twe li mu uvithile. Oye okwe mu ithana, mu kale mu na oshitopolwa meadhimo lyOmuwa gwetu Jesus Kristus.

¹⁵Onkee ano aamwameme, kaleni mwi ikolelela mwa dhiginina omalongo ngoka twe ge mu longo momauvitho nomontumwafo yetu.

¹⁶Omuwa gwetu Jesus Kristus mwene naKalunga Tate yetu, ngoka e tu hole nokwe tu pa kesilohenda lye omukumo gwaaluhe netegameno ewanawa,

¹⁷ne mu tse omukumo ye ne mu koleke, mu longe nomu popye ashike shoka oshiwanawa.