Read Oshindonga-Ombiimbeli Ondjapuki 2008 1 Timothy 3 Bible Online

1 Timothy 3 - Oshindonga-Ombiimbeli Ondjapuki 2008 bible

1 Timothy 3

¹Ohapu oyoshili ndjoka tayi ti: Omulumentu ngoka a hala okuninga omuwiliki gwegongalo lyaKalunga, oye okwa hala oshilonga oshiwanawalela.

²Ihe oye oku na okukala omulumentu kee na oshipo; e na omukiintu gumwe awike, omwiidhiliki, hi ikwata nawa, e na elandulathano noha yakula aayenda megumbo lye. Oku na okukala wo ta vulu okulonga aantu;

³hankolwi nenge omupwidhi, ihe oku na engungumano nombili ye ke na okahalu kiimaliwa.

⁴Oye oku na okukala omulumentu e shi okukala nawa naanegumbo lye noku shi okuputudha oyana, ya kale ye na evuliko nesimaneko.

⁵Oshoka omulumentu ngoka kee shi, nkene e na okukala naanegumbo lye, ota vulu ngiini okulela egongalo lyaKalunga?

⁶Oye ke na okukala omuntu ngoka, opo a ningi omukriste, opo kaa inenepeke e ta geelwa, ngaashi omuhindadhi a ningwa.

⁷Oye oku na okukala omulumentu ha popilwa muuwanawa nokumboka yaa shi aakriste, opo kaa ishekithe ye kaa ye momwigo gwomuhindadhi.

⁸Aayakuli yegongalo oye na okukala ye na omikalo omiwanawa noyaa na iifundja; kaye shi oonkolwi nenge nalwiho mokulikola.

⁹Oyo oye na okudhiginina neiyuvo lya yela oshili ya hololwa meitaalo.

¹⁰Aantu ya tya ngaaka oye na okukonakonwa tango, ngele otaa vulu tuu okuya moshilonga.

¹¹Aakiintu yawo naa kale ye na omikalo omiwanawa noyaa na oluhoko. Naa kale aaidhiliki noye na oshili miinima ayihe.

¹²Omuyakuli gwegongalo oku na okukala e na omukiintu gumwe noku shi okulela nawa oyana naanegumbo lye.

¹³Mboka taa longo iilonga yawo nawa, otaa imonene esimano notaa vulu okukala nuulaadhi mokwiitaala Jesus Kristus.

¹⁴Moku ku nyolela ontumwafo ndjika ondi na etegelelo lyokuya kungoye mbala.

¹⁵Ihe ngele inandi ya mbala, ontumwafo ndjika otayi ku tseyithile, nkene tu na okwiikwata nawa megumbo lyaKalunga. Egumbo ndika olyo egongalo lyaKalunga omunamwenyo. Olyo ongundhi nekankameno okukoleka oshili.

¹⁶Kaku na ngoka ta vulu okuludhika uunene woshiholekwa sheitaalo lyetu: Jesus Kristus okwa holoka molupe lwomuntu, Ombepo oye mu holola omunashili nokwa holokele aayengeli. Oye oku uvithwa mokati kiigwana, okwi itaalwa muuyuni nokwa yeluthilwa megulu.