Read Oshindonga-Ombiimbeli Ondjapuki 2008 Hebrews 1 Bible Online

Hebrews 1 - Oshindonga-Ombiimbeli Ondjapuki 2008 bible

Hebrews 1

¹Kalunga okwa lombwele nale ootate olwindji pamikalo odhindji momakana gaahunganeki.

²Ihe pomasiku ngaka gahugunina ote tu popitha mOmwana, ngoka Kalunga e mu shititha uuyuni, niinima ayihe pehulilo otayi ka ninga ye.

³Oye oku na eadhimo lyaKalunga nondjelo yaKalunga mwene. Oye ota humbata eshito alihe noonkondo dhohapu yomokana ke. Sho a yelitha aantu koondjo dhawo, okwa kuutumba kolulyo lwaKalunga, Omunankondoadhihe megulu.

⁴Kalunga okwa lenge Omwana, a ninge omunene e vule aayengeli nokwe mu luku edhina li vule gawo.

⁵Oshoka Kalunga ina tya nando olumwe kugumwe gwomaayengeli: “Ngoye omumwandje; nena ndjika nda ningi ho.” Kalunga ina lombwela wo nando ogumwe gwomaayengeli: “Otandi ka ninga ho, nenge oto ka ninga omumwandje.”

⁶Oshoka Kalunga mokutuma Omwana, omutango gwe, muuyuni okwa ti wo: “Aayengeli yaKalunga ayehe oye na oku mu simaneka.”

⁷Kombinga yaayengeli okwa ti: “Kalunga ota ningi aayengeli ye oombepo, naayakuli ye ote ya ningi omalaka gomulilo.”

⁸Ihe kOmwana Kalunga okwa ti: “Ongoye Kalunga, oshipangelapundi shoye otashi kala aluheluhe. Oshilongo shoye oto shi lele nuuyuuki.

⁹Ongoye ou hole shoka shu uka nou tonde shoka sha puka; onkee Omuwa Kalunga koye okwe ku lenge nokwe ku pe esimano e te ku nyanyudha nenyanyu enene li vule lyayalwe.”

¹⁰Kombinga yOmwana okwa ti wo: “Omuwa, petameko ongoye wa shiti evi, ongoye wa shiti egulu niikaha yoye mwene.

¹¹Agehe otaga hulu po, ihe ngoye oto kala po. Agehe otaga kulupa ngoonguwo.

¹²Ongoye to ke ga gonya ngonguwo, oto ke ga lundulula ngomizalo. Ihe ngoye oto kala ngaashi u li noito kulupa.”

¹³Oshoka Kalunga ina lombwela nando olumwe gumwe gwoomaayengeli ye: “Kuutumba mpaka kolulyo lwandje, sigo tandi tula aatondi yoye kohi yoompadhi dhoye, ya ninge oshilyatelo shoye”

¹⁴Aayengeli oolye ano? Oyo ayehe oombepo ndhoka tadhi yakula Kalunga. Ohaa tumwa kuye okukwatha aantu mboka taa ka hupithwa.