Read Oshindonga-Ombiimbeli Ondjapuki 2008 Hebrews 11 Bible Online

Hebrews 11 - Oshindonga-Ombiimbeli Ondjapuki 2008 bible

Hebrews 11

¹Okukala tu na eitaalo otashi ti okukala tu na einekelo lya kola miinima mbyoka twa tegamena naambyoka itaatu vulu oku yi mona ngashingeyi.

²Aantu mbeyaka yonale oya hokiwa kuKalunga omolwokwiitaala kwawo.

³Okeitaalo alike tatu shi uvu ko kutya uuyuni owa shitwa nohapu yaKalunga, naashoka shi wetike osha ningwa mushoka shaa wetike.

⁴Eitaalo olyo olya longitha Abel, a gandje omayambo omawanawa kuKalunga ge vule gaKain. Kalunga okwe mu hokwa omolweitaalo lye nokwe mu tala omuyuuki, sho a taamba omagano ge. Koonkondo dheitaalo Abel ota popi natango, nonando okwa sa.

⁵Eitaalo olyo lya popile Enok, kaa se. Okwa kuthwa po kuKalunga ye ina monika nando okomuntu, oshoka Kalunga okwe mu fala megulu. Enyolo otali ti: Enok manga inaa kuthwa po, okwa li a hokiwa kuKalunga.

⁶Kape na ngoka ta hokiwa kuKalunga, ngele ke na eitaalo. Oshoka ngoka te ya kuKalunga, oku na okukala i itaala kutya Kalunga oko e li nota futu ayehe mboka taye mu kongo.

⁷Eitaalo olyo lya longitha Noa, a uve ko omalondodho gaKalunga taga popi iinima mbyoka tayi ke ya, ye ina vula oku yi mona. Noa okwa vulika kuKalunga e ta tungu onguluwato, moka a hupile pamwe naanegumbo lye. Osho ngeyi okwa pe uuyuni uusama nokwa pewa kuKalunga uuyuuki mboka tau zi mokwiitaala.

⁸Eitaalo olyo lya longitha Abraham, a vulike, uuna ndoka Kalunga e mu ithana, nokwa tembukile koshilongo shoka Kalunga u uvaneke oku mu pa. Okwa tembuka mo moshilongo shaandjawo, ye ina tseya mpoka ta yi.

⁹Koonkondo dheitaalo okwa kala a fa omukwiilongo moshilongo shoka Kalunga e mu uvanekela. Okwa kala momatsali gowala, nosho wo Isak naJakob, mboka Kalunga e ya uvanekela euvaneko tuu ndyoka.

¹⁰Oshoka Abraham okwa li a tegelela oshilando shoka shi na omikanka dha kolelela, sha sindwa nosha tungwa kuKalunga mwene.

¹¹Eitaalo olyo lya ningi Abraham, a vule okuninga he yaIsak, nando okwa li a kulupa, naSara wo okwa li a adha ethimbo ndyoka itaa vulu we okumona okanona. Abraham okwi inekele Kalunga ngoka ha gwanitha shoka e shi uvaneka.

¹²Nonando okwa li a kulupa, muye omwa ka za oluvalo olwindji lwa fa oonyothi dhokegulu nolwa nyengana okuyalula, ongomawe gehekevi lyopooha dhefuta.

¹³Ootatekulu mbaka ayehe oya sile meitaalo. Oyo inaa mona iinima mbyoka Kalunga e yi ya uvanekela, ihe oye yi talele kokule noye yi nyanyukilwa. Oya dhimbulula kutya oyo oondjendi naakwiilongo kombanda yevi.

¹⁴Mboka ya tumbula omatumbulo ga tya ngeyi, oye shi holola sha yela kutya inaya adha oshilongo shaandjawo.

¹⁵Oyo inaa dhiladhila nando okushuna koshilongo hoka ya zile; nonando oya li ye na ompito oku shi ninga.

¹⁶Ihe oya li ya yuulukwa koshilongo shoka oshiwanawa shomegulu. Onkee Kalunga ine ya idhimbika, sho taye mu ithana Kalunga kawo, oshoka okwe ya longekidhila oshilando.

¹⁷Eitaalo olyo lya longitha Abraham, a gandje omwana Isak, a ninge eyambo, sho Kalunga a li e mu yeleke. Abraham oye tuu ngoka Kalunga e mu uvanekela euvaneko, ihe nando ongaaka, okwa li i ilongekidha okuyamba po epona lye.

¹⁸Kalunga okwa li a lombwele Abraham a ti: “Oluvalo lwoye otalu ka za muIsak.”

¹⁹Abraham okwa li u uvite kutya Kalunga ota vulu okuyumudha Isak nokuusi. Onkee otatu vulu okutya, Abraham okwa peululwa Isak a zi mokusa.

²⁰Eitaalo olyo lya longitha Isak, a tumbulile Jakob naEsau omayambeko ngoka tage ke ya.

²¹Eitaalo olyo lya longitha Jakob, a yambeke aana yaJosef aamati, manga inaa sa. Oye okwi ikolelele kolwoondje lwe e ta galikana Kalunga.

²²Eitaalo olyo lya longitha Josef, a popye pokusa kwe etembu lyAaisraeli lyokuza muEgipiti nokwe ya lombwele kutya oye na okuninga ngiini omudhimba gwe.

²³Eitaalo olyo lya longitha aakuluntu yaMoses, ye mu holeke oomwedhi ndatu, sho a valwa. Oya mono kutya okanona okawanawa, yo inaa tila oshipango shomukwaniilwa.

²⁴Eitaalo olyo lya longitha Moses, sho a koko a vule okutinda kutya ke shi omuna gwomukadhona omuna gwaFarao.

²⁵Okwa hogolola po okuhepekwa pamwe naantu yaKalunga, ye ina zimina uutoye wuulunde wokathimbo kowala.

²⁶Oye okwa dhimbulula kutya okuhumbata ondhino omolwOmugwayekwa gwaKalunga oshi vule omauyamba agehe gomuEgipiti, oshoka okwa li e wete ondjambi ndjoka ta ka pewa konakuyiwa.

²⁷Eitaalo olyo lya longitha Moses, a thige po Egipiti inaa tila ondjahi yomukwaniilwa. Moses okwa li e na omukumo ongaangoka a mono Kalunga, nando iha monika.

²⁸Eitaalo olyo lya longitha Moses, opo a dhike Opaasa nokupopya kutya ombinzi oyi na okugwayekwa komiyelo dhomagumbo, opo omuyengeli gweso kaa vule okudhipaga po iisheeli yAaisraeli.

²⁹Eitaalo olyo lya kumike Aaisraeli, ya vule okutaaguluka Efuta etiligane ya fa taa ende puukukutu, Aayegipiti sho ya yelekele oku shi ninga, oya siikilwa komeya e taa si.

³⁰Eitaalo olyo lya teyitha po omakuma goshilando shaJeriko, Aaisraeli sho ye shi dhingoloka omasiku gaheyali.

³¹Eitaalo olyo lya gamene ohonda Rahab, kaa dhipagwe pamwe naanandumbo naKalunga, oshoka okwa hupithitha oondaadhi.

³²Nandi tsikile ko natango? Kandi na ethimbo lya gwana okuhokolola Gideon, Barak, Simson, Jefta, David, Samuel naahunganeki.

³³Omolweitaalo oya kondjitha iilongo e taa yi sindi. Oya longo shoka shu uka noya gwanithilwa omauvaneko gaKalunga. Oya mutike omakana goonime,

³⁴oya dhimi omaziko gomililo dha hanya noya henuka omagongamwele. Oyo oya kala ya fa kaaye na oonkondo, ihe oya ningi oofule molugodhi noya sindi omatanga gaakwiita aakwiilongo.

³⁵Omolweitaalo aakiintu yamwe oya yumudhilwa oonakusa yawo. Yamwe oya si komahepeko, sho ya tindi okutaamba emangululo, oshoka oya li taa tegelele okufalwa momwenyo omupe.

³⁶Yamwe oya shekwa e taa dhengwa noongola, yamwe oya mangwa nomalyenge e taa tulwa mondholongo.

³⁷Yamwe oya dhipagwa nomamanya, yamwe oya tetwa pokati nayamwe oya dhipagwa negongamwele. Oye endagula ya zala iipa yoonzi noyiikombo, oya si oluhepo, oya tidhaganwa e taa monithwa iihuna.

³⁸Uuyuni kawa li nando uuwanawa kuyo. Oyo oya li taa alaala moombuga nomoondundu noya kala momakololo nomoombogo dhevi.

³⁹Aantu ayehe mboka oya pandulwa molweitaalo lyawo, ihe onkee tuu inaa mona egwanitho lyeuvaneko lyaKalunga.

⁴⁰Oshoka Kalunga okwa li e tu nine edhiladhilo lilwe ewanawa. Olyo ndika: oyo otaa ka mona owala egwano pamwe natse.