Read Oshindonga-Ombiimbeli Ondjapuki 2008 Hebrews 4 Bible Online

Hebrews 4 - Oshindonga-Ombiimbeli Ondjapuki 2008 bible

Hebrews 4

¹Ano ngashingeyi Kalunga okwe tu pe euvaneko, tu vule okuya mo, tu ka vululukwe puye. Tu kotokeni ano, opo kwaa kale nando ogumwe gwomutse ta puka ondjila yokuthika mo.

²Oshoka elaka etoye otwe li uvu ngashika oyo. Elaka oye li uvu, ihe inali ya kwatha sha. Oshoka nando ye li uvu, inaye li taamba meitaalo.

³Ihe tse mbaka twi itaala, otatu yi mo, tu ka vululukwe puKalunga. Ngaashi naye wo ta ti: “Ngame onda geya e te gana: ‘Oyo kaye na mpoka naa ke ya mo, ya vululukwe pungame.’ ” Kalunga nando ota popi ngeyi, iilonga ye oya li ya pwa, sho a shiti uuyuni.

⁴Oshoka palwe mOmanyolo otamu popiwa esiku etiheyali taku tiwa: “Kalunga okwa vululukwa esiku etiheyali kiilonga ye ayihe.”

⁵Ihe otaku tiwa wo: “Oyo kaye na mpoka naa ke ya mo, ya vululukwe pungame.”

⁶Mbeyaka yu uvu tango elaka etoye, oyo inaa ya mo, ya ka vululukwe puKalunga, oshoka oya li inaa itaala. Ihe oku na yamwe ya pitikilwa okuya mo, ya vululukwe puKalunga.

⁷Shika otashi hololwa, sho taku tiwa: “Kalunga oku utha esiku lilwe ndyoka hali tiwa: Onena.” Oye okwe li popya moomvula dhonale mokana kaDavid, sho ta ti: “Onena tuu ndjika nge tamu uvu ewi lyaKalunga, inamu ikukutika.”

⁸Oshoka ando Josua okwa li a thikithile oshigwana mevululuko lyaKalunga, ando Kalunga ina ka popya we komeho evululuko ekwawo.

⁹Onkee ano oku na natango evululuko lyaantu yaKalunga, ongaandyoka lyaKalunga, sho a vululukwa esiku etiheyali.

¹⁰Oshoka shaa ngoka a yi mo, a vululukwe puKalunga, ota vululukwa, ngashika Kalunga a li a vululukwa kiilonga ye.

¹¹Onkee ano tu lalakaneni okuya mo, tu ka vululukwe puKalunga. Inapu kala nando ogumwe gwomutse itaa vulika ngashika mbeyaka, ndele inaa thika mo we.

¹²Oshoka oohapu dhaKalunga odhi na omwenyo nodhi na oonkondo dhokulonga sha. Odho odhi na omayego dhi vule egongamwele lyoongenge mbali. Otadhi tete e tadhi adha sigo opuutsakaneno womwenyo nombepo, woongolo nomongo. Otadhi holola puuyelele omahalo nomadhiladhilo gomomitima dhaantu.

¹³Oshoka kaku na nando oshinima shimwe sha holekwa Kalunga. Kehe shimwe shomeshito oshi li puuyelele montaneho yaKalunga, ngoka tu na oku ke mu hokololela ayihe mbyoka twa ninga.

¹⁴Tu dhiginineni ano eitaalo ndyoka tatu li hempulula. Oshoka otu na omuyambi omukuluntu e vule ayehe, ngoka a thiki koshipala shaKalunga. Oye Jesus, Omuna gwaKalunga.

¹⁵Omuyambimukuluntu gwetu ke shi ngoka ku uvitile uunkundi wetu olukeno, ihe oye ngoka a makelwa miinima ayihe ngashika tse, ihe ina yona.

¹⁶Tu yeni koshipangelapundi shesilohenda ano tu na omukumo, hoka tatu ka silwa ohenda nolukeno. Esilohenda ndyoka otali tu kwatha pethimbo lyo opala.