Read Oshindonga-Ombiimbeli Ondjapuki 2008 Hebrews 8 Bible Online

Hebrews 8 - Oshindonga-Ombiimbeli Ondjapuki 2008 bible

Hebrews 8

¹Ehuku lyaashoka tatu popi olyo ndika: Tse otu na omuyambi omukuluntu a tya ngaaka, ngoka a kuutumba kolulyo lwoshipangelapundi shOmunankondo megulu.

²Oye ota longo oshilonga shuuyambi muuyapukielela kokutya, motempeli yoyene ndjoka ya tungwa kOmuwa, hakomuntu.

³Omuyambimukuluntu kehe okwa langekwa, a kale ta yambele Kalunga omagano nomayambo giinamwenyo. Onkee ano nomuyambi gwetu omukuluntu Jesus okwa li e na okukala e na sha shoka ta yamba.

⁴Ando okwa li kombanda yevi, ando ke shi nando omuyambi, oshoka aayambi mboka haa yamba omagano pampango yAajuda, oko ye li.

⁵Iilonga yuuyambi mbyoka taa longo oyo efano nomuzizimba gwaashoka shi li megulu. Ngaashi naanaa Moses a li a lombwelwa kuKalunga pokutunga etsali, sho a ti: “Tala nawa, opo u longe ashihe palupe lwefano ndyoka u ulukilwa kondundu.”

⁶Ihe Jesus okwa pewa oshilonga shuuyambi oshinene shi vule shawo, ngaashi wo ehangano ndyoka a longekidha pokati kaKalunga naantu, oli vule ndiyaka, oshoka olyi ikwatelela komauvaneko omawanawalela.

⁷Oshoka ehangano lyotango ando olya li lya gwana, ando inaku pumbiwa we etiyali.

⁸Onkee Kalunga ota gandja uusama kaantu ye, sho ta ti: “Omasiku otage ya, Omuwa osho ta ti, uuna tandi ka dhika ehangano epe pokati ketu nAaisraeli nonezimo lyaJuda.

⁹Ndika itali yelekwa nehangano ndyoka nda ningile noohekulu, sho nda li nde ya hili mokwaako e tandi ya tembudha muEgipiti. Ihe inaa dhiginina ehangano lyetu nayo. Onkee onde ya etha, Omuwa osho ta ti.

¹⁰Ndika olyo ehangano ndyoka tandi ka ninga nAaisraeli konima yomasiku ngoka, Omuwa sho ta ti: Ompango yandje otandi ke yi tula momadhiladhilo gawo, notandi ke yi nyolela momitima dhawo. Otandi ka ninga Kalunga kawo, nayo otaa ka ninga aantu yandje.

¹¹Kape na nando ogumwe ta ka longa omukwashigwana she, po pwaa na ngoka ta ka lombwela omungandjawo ta ti: ‘Tseya Omuwa,’ oshoka ayehe otaa ka tseya ndje okuza komudhinwa sigo okomunenentu.

¹²Otandi ke ya sila ohenda e tandi dhimi po omayono gawo, noitandi ka dhimbulukwa we oondjo dhawo.”

¹³Kalunga mokupopya ehangano epe, lyotango okwe li tala kutya olya kulupa; naashoka sha kulupa nosha mana ko ethimbo lyasho, otashi ka hula po mbala.