Read Oshindonga-Ombiimbeli Ondjapuki 2008 Hebrews 9 Bible Online

Hebrews 9 - Oshindonga-Ombiimbeli Ondjapuki 2008 bible

Hebrews 9

¹Ehangano lyotango olya li wo li na omautho gelongelokalunga notempeli ya tungwa kaantu.

²Etsali olya li lya dhikwa ngeyi; moshinyanga shoka hashi thikilwa nosha li hashi ithanwa uuyapuki, omwa li mu na olamba, oshitaafula niikwiila mbyoka ya yambelwa Kalunga.

³Konima yetopolitho etiyali okwa li ku na oshinyanga shoka hashi ithanwa Uuyapukilela.

⁴Moshinyanga shika oshitiyali omwa li oshiyambelo shoshingoli shokufikila iitsinino, noshiketha shehangano shi na oshisha shoshingoli koombinga adhihe. Moshiketha shehangano omwa li mu na oshuma shoshingoli shi na omanna, nondhimbo yaAron ya li ya tutuma oonyapi oontalala, niipelende iyali yomamanya, moka mwa li mwa nyolelwa oohapu dhompango.

⁵Kombanda yoshiketha okwa li ku na aakerubi ye na eadhimo, taa holola okukalapo kwaKalunga. Omawawa gawo oga li ga siikile ehala mpoka oondjo hadhi dhimwa po. Ihe ethimbo ndika halyo lyokufatulula iinima ayihe nawa.

⁶Iinima mbika ayihe sho ya pwa okulongekidhwa, aayambi oya kala haa yi esiku kehe muuyapuki okulonga iilonga yuuyambi.

⁷Ihe muuyapukielela ohamu yi omuyambi omukuluntu awike lumwe aluke momumvo. Oye oha yi mo nombinzi, e yi yambele Kalunga omolwoondjo dhe mwene nomolwoondjo ndhoka aantu ye dhi ninga mokwaashiwo.

⁸Momalongekidho ngaka agehe Ombepo Ondjapuki otu ulukile lela aantu kutya ompito yokuya muuyapukielela itayi vulu okweeguluka, manga etsali lyotango li li po natango.

⁹Ndika olyo efano tali ulike ethimbo lyongashingeyi. Shika otashi ti, omagano nomayambo giinamwenyo ngoka haga yambelwa Kalunga, itaga vulu okugundjilika omwenyo gwaangoka ta hedha kuKalunga.

¹⁰Oge na sha owala nokulya nokunwa nomayelitho gi ili nogi ili gopalongelokalunga. Ogo agehe omautho gokombanda ge li po ashike okathimbo, sigo ethimbo ndyoka Kalunga ta ka shitulula iinima ayihe.

¹¹Ihe Kristus, omuyambi omukuluntu, okwe ya noku na uuwanawa auhe wiinima mbika tu wete. Etsali moka ta yakula, oli na esimano enene nolya gwana, kali shi oshinima shomeshito ndika.

¹²Ano Kristus sho a pitile metsali, okwa yi lumwe aluke muuyapukielela. Ina ya mo okuyamba nombinzi yiikombo noyoontana, ihe okwa yi mo nombinzi ye mwene nokwe tu longele ekulilo lyaaluhe.

¹³Ombinzi yiikombo noyoontsezi ohayi shashaminwa aantu mboka ya yono, nosho wo omutoko gwoontana ohagu gundwa kombanda yawo, notayi ya yelitha koonyata dhawo.

¹⁴Ano unene ombinzi yaKristus otayi yelitha eiyuvo lyetu kiilonga iiwinayi, opo tu longele Kalunga omunamwenyo. Oshoka Kristus okwi igandja ye mwene kuKalunga koonkondo dhOmbepo yaaluhe, a ninge eyambo lya gwana lya pwa.

¹⁵Osho ngeyi Kristus okwa longekidha ehangano epe, opo mboka yi ithanwa kuKalunga, ya vule okutaamba omayambeko gaaluhe ngoka Kalunga e ga uvaneka. Shika otashi vulika, oshoka eso lye olya mangulula aantu komayono gawo, manga ya li mehangano lyotango.

¹⁶Mpoka pu na euvaneko lyuuthiga, otali kolekwa keso lyomuuvaneki.

¹⁷Oshoka euvaneko lyuuthiga itali kwatha sha, manga omuuvaneki e na omwenyo, ihe otali longo owala ngele a si.

¹⁸Onkee ano nehangano lyotango wo olya kolekwa ashike nokulongitha ombinzi.

¹⁹Tango Moses okwa lombwele aantu iipango ayihe, ngaashi yi li membo lyompango. Opo ihe okwa kutha ombinzi yoontana noyiikombo nomeya e ta shashamine noshisopi nomafufu omatiligane embo lyompango nosho wo aantu ayehe.

²⁰Okwa ti: “Ombinzi ndjika otayi koleke ehangano ndyoka Kalunga e mu lombwele, mu vulike kulyo.”

²¹Pamukalo nguka Moses okwa shashamine wo ombinzi kombanda yetsali nokiinima ayihe mbyoka hayi longithwa melongelokalunga.

²²Eeno, konyala ayihe yi yelithwe pampango kombinzi. Noondjo wo ohadhi dhimwa po owala, uuna pwa tika ombinzi.

²³Iinima mbika yokombanda yevi oyo efano lyaambiyaka yomegulu, onkee oyi na okuyelithwa pamukalo nguka. Ihe iinima yomegulu otayi yelithwa nomayambo ge vule ngaka.

²⁴Oshoka Kristus ina ya muuyapuki wa tungwa kaantu, mboka u li efano lyuuyapuki wo wene. Oye okwa yi megulu lyolyene, moka te tu popile koshipala shaKalunga.

²⁵Omuyambimukuluntu gwopaJuda oha yi omumvo kehe muuyapukielela nombinzi yiinamwenyo. Ihe Kristus ini igandja ye mwene olwindji.

²⁶Oshoka ando osho sha li ngawo, nena ando Kristus okwa li e na okuhepekwa olwindji okuza keshito lyuuyuni. Ihe okwa holoka lumwe aluke, pehulilo lyomathimbo, e ti igandja ye mwene, opo a kuthe po oondjo sigo aluhe.

²⁷Aantu ayehe oye na okusa lumwe aluke, e taku ya ihe epangulo lyaKalunga.

²⁸Pamukalo nguka Kristus okwa gandjwa wo, a ninge eyambo lumwe aluke, opo a kuthe po oondjo dhaantu. Oye ota ka holoka olutiyali, hakukutha po oondjo, ihe okuhupitha mboka ye mu tegelela.