Read Oshindonga-Ombiimbeli Ondjapuki 2008 James 1 Bible Online

James 1 - Oshindonga-Ombiimbeli Ondjapuki 2008 bible

James 1

¹Ontumwafo ndjika oya zi kuJakob, omumati gwaKalunga nogwOmuwa Jesus Kristus. Omakundo kaantu yaKalunga ayehe, mboka ya halakana nuuyuni auhe.

²Aamwameme, italeni aanelago, ngele tamu adhika komamakelo gi ili nogi ili,

³oshoka omwa tseya, eitaalo lyeni uuna tali piti momayeleko ga tya ngeyi, nena otamu mono omukumo gwokwiidhidhimika.

⁴Eidhidhimiko nali mu endithe ondjila ayihe pwaa na omapunduko, opo mu kale mwa gwana, mwaa na oshipo ne inamu pumbwa sha.

⁵Ihe ngele oku na gumwe gwomune a pumbwa oondunge, ne dhi indile kuKalunga, oye note dhi mu pe. Oshoka Kalunga ke shi omundalapata, ihe oha pe ayehe nopwaa na omanyenyeto.

⁶Ihe indileni mu na eitaalo ne mwaa na omalimbililo. Oshoka omuntu ngoka ta limbililwa, okwa fa ekuthikuthi lyomefuta tali falafalwa notali telaalithwa kombepo.

⁷Omuntu a tya ngeyi na tseye kutya ita pewa sha kOmuwa,

⁸oshoka oye ota li oompanda mbali nomutengauki miilonga ye ayihe.

⁹Omwiitaali ohepele ni itangele uuvalekele we,

¹⁰ihe omuyamba uuthigona we, oshoka oye ota ka kana a fa ongala yokelundu.

¹¹Etango otali piti nuupyu walyo, e tali fike po oshimeno, oongala otadhi gu ko, eopalo lyadho e tali kana. Osho naanaa omuyamba ta yonwa po manga e li meipyakidhilo.

¹²Omulumentu omunelago oongoka ta sindana mokumakelwa, oshoka shampa a piti mo, Kalunga ote ke mu pa ondjambi, omwenyo gwaaluhe, ngoka e gu uvanekela mboka ye mu hole.

¹³Omuntu ngele a adhika kemakelo lyoku mu yeleka, ina tya: “Emakelo ndika olya zi kuKalunga.” Oshoka Kalunga iha makelwa kuuwinayi noiha makele nando omuntu.

¹⁴Ihe omuntu oha makelwa kuuhalu we mwene, mboka tau mu hekaheka e tau mu yulu.

¹⁵Uuhalu ngele wa ningi uusimba, otau vala uulunde; nuulunde ngele wa koko, otau vala eso.

¹⁶Aamwameme aaholike, inamu fundjalekwa!

¹⁷Oshipewa kehe oshiwanawa nomagano kehe ga gwana ga pwa ohaga zi kuKalunga, Omushiti gwomaminikilo gokegulu. Puye kapu na nando elunduluko nenge epingathano lyuuyelele nomilema.

¹⁸Kehalo lye mwene okwe tu pe omwenyo, opo tu ninge aatango mokati kiishitwa ye ayihe.

¹⁹Shika omu na oku shi tseya, aamwameme aaholike! Kehe gumwe na kale ha pulakene mbala, ihe ohi ikwata mokupopya ye iha geye mbala.

²⁰Oshoka ondjahi yomuntu ihayi longo shoka shu uka koshipala shaKalunga.

²¹Onkee ano zeni moonyata adhihe nomuuwinayi auhe, mu taambe meimweneneno ohapu ndjoka Kalunga e yi kunu momitima dheni, oondjoka yi na oonkondo oku mu hupitha.

²²Mokupulakena kweni oohapu dhaKalunga inamu ifundjaleka, ihe okupulakena kweni naku mu fale miilonga.

²³Oshoka omuntu ngoka ta pulakene oohapu, ndele okupulakena kwe itaku mu fala miilonga, okwa fa omuntu ngoka ti italele moshiitalelo e ti imono naanaa, nkene a tya.

²⁴Oti imono moshiitalelo, ihe sho a zi po pusho, mbalambala ota dhimbwa kutya okwa tya ngiini.

²⁵Ihe ngoka ti italele mompango ya gwana yokumangulula, te yi pulakene noite yi dhimbwa, ihe ote yi gwanitha, oye ota yambekwa moku shi ninga.

²⁶Ngele oku na ngoka ta dhiladhila kutya ota longele Kalunga, ndele ita pangele okupopya kwe, nena elongelokalunga lye itali tompola sha, oti ifundjaleke owala.

²⁷Elongelokalunga lya yela nolya yogoka koshipala shaKalunga Tate olyo okusila oshimpwiyu oothigwa naaselekadhi muudhigu wawo nokwiikotokela waa nyatekwe kuuyuni.