Read Oshindonga-Ombiimbeli Ondjapuki 2008 1 Peter 1 Bible Online

1 Peter 1 - Oshindonga-Ombiimbeli Ondjapuki 2008 bible

1 Peter 1

¹Ontumwafo ndjika oya zi kuPetrus, omuyapostoli gwaJesus Kristus. Oya nyolelwa aahogololwa yaKalunga, aapongekwa mboka yi ihanena iitopolwa yomuPontus, Galatia, Kappadokia, Asia naBitinia.

²Okuhogololwa kweni okwa zi nale medhiladhilo lyaKalunga Tate nomwa yapulwa kOmbepo ye, opo mu vulike kuJesus Kristus, ngoka e mu yelitha nombinzi ye. Esilohenda nombili nayi mu indjipalele.

³Kalunga He yOmuwa gwetu Jesus Kristus na hambelelwe! Oshoka molwesilohenda lye enene okwe tu pe omwenyo omupe, sho a yumudha Jesus Kristus kuusi. Shika oshe tu pe etegameno lya kola,

⁴kutya megulu Kalunga okwe tu pungulila eliko enene, ndyoka itaali wapa okwoola, okuyonuuka nokuhula po.

⁵Molwaashoka mwi inekela Kalunga meitaalo, ote mu gamene noonkondo dhe, sigo tamu mono ehupitho ndyoka lya longekidhwa oku ka hololwa pehulilo lyomathimbo.

⁶Onkee ano nyanyukilweni ehupitho ndika, nonando omu na okusa oluhodhi mokathimbo okafupi kowala omolwomamakelo ogendji tage mu adha.

⁷Ogo otaga lalakanene okutala, eitaalo lyeni ngele olya kola. Noshingoli wo, shoka hashi yonuka, ohashi yelekwa momulilo. Osho wo neitaalo lyeni, ndyoka li na ondilo li vule oshingoli, oli na okuyelekwa, opo li vule okukala lya kola. Nena otamu ka pewa epandulo, eadhimo nesimaneko mesiku ndyoka Jesus Kristus ta ka holoka.

⁸Oongoka mu mu hole, nando inamu mu mona; omwe mu itaala, nando kamu mu wete ngashingeyi. Onkee ano ohamu kala mu na enyanyu enene tali adhima notali nyengana okutumbulwa,

⁹oshoka otamu adha elalakano lyeitaalo lyeni, nokutya ehupitho lyoomwenyo dheni.

¹⁰Ehupitho ndika olyo tuu ndyoka lya li lya kongwa nolya konakonwa neitulomo kaahunganeki. Oyo oya hunganeke uuwanawa mbuka Kalunga e u mu pa.

¹¹Oya kambadhala okukonakona ethimbo, uuna nonkene ehupitho ndika tali ka holoka. Oshoka Ombepo yaKristus oya longo muyo noyu ulike kethimbo ndika mokuhunganeka omahepeko ngoka ge na okwaadha Kristus, nesimano mpoka li thike ndyoka tali ka landula.

¹²Kalunga okwa hololele aahunganeki mbaka kutya iilonga yawo kaya li ekwatho lyawo yene, ihe olyeni, sho ya popi iinima mbika. Elaka ndika etoye omwe li etelwa ngashingeyi kaayuvithi mboka ya popi koonkondo dhOmbepo Ondjapuki ya tumwa kuKalunga. Mbika oyo iinima mbyoka naayengeli ya hala oku yi uva ko.

¹³Kaleni mwi ilongekidhila shoka mu na oku shi ninga. Kaleni mwa tonata nomwa tegamena uuwanawa mboka tamu ke u pewa, uuna Jesus Kristus ta holoka.

¹⁴Vulikeni kuKalunga ne inamu etha, okukalamwenyo kweni ku pangelwe kuuhalu mboka mwa li nawo, manga mwa li mwaa na oondunge.

¹⁵Ihe kaleni aayapuki mwaayihe mbyoka tamu yi ningi, ngaashi Kalunga ngoka e mu ithana, omuyapuki.

¹⁶Oshoka enyolo otali ti: “Omu na okukala aayapuki, oshoka ongame omuyapuki.”

¹⁷Kalunga ohamu mu ti Tate, uuna tamu mu galikana. Oye ngoka ha tokolele aantu ayehe shi thike pamwe noha pe omuntu kehe ngaashi e shi ilongela. Onkee ano kaleni hamu simaneke Kalunga methimbo lyeni ndyoka lya hupu ko lyokombanda yevi.

¹⁸Oshoka omwa tseya iikulila mbyoka ye mu kulile mokukala kweni kwonale, hoka mwe ku thigulula kooho, oyo kaya li oshinima hashi hulu po, ngaashi oshisiliveli nenge oshingoli.

¹⁹One omwa kulilwa nombinzi yi na ondilo yaKristus, ngoka a fa onzigona yaa na oshipo nenge onyata.

²⁰Kalunga okwe mu hogolola nale, manga uuyuni inaau shitwa, ihe okwa holoka ngashingeyi pomathimbo gahugunina omolweni.

²¹OmolwaKristus omwi itaala Kalunga, ngoka e mu yumudha kuusi nokwe mu pe eadhimo. Onkee ano eitaalo netegameno lyeni oyi ikwatelela muKalunga.

²²Ngashingeyi sho mwa vulika koshili, omwi iyogo nomu hole ooitaali ooyakweni mwaa na uufudhime. Holathaneni ano lelalela nomwenyo aguhe.

²³Oshoka omolwohapu yaKalunga, ndjoka yi na omwenyo noyaaluhe, one omwa valululwa, mu ninge aana yaangoka ihaa hulu po, hayaangoka ha hulu po.

²⁴Ongaashi enyolo tali ti: “Aantu ayehe oya fa owala omwiidhi gwokelundu, eopalo lyawo alihe olya fa owala lyongala. Omwiidhi ohagu si, nongala yagwo ohayi kukuta.”

²⁵Ihe ohapu yOmuwa otayi kalele sigo aluhe. Ohapu oyo tuu ndjika ye mu etele elaka etoye.