Read Oshindonga-Ombiimbeli Ondjapuki 2008 2 Peter 1 Bible Online

2 Peter 1 - Oshindonga-Ombiimbeli Ondjapuki 2008 bible

2 Peter 1

¹Ontumwafo ndjika oya zi kuSimon Petrus, omumati nomuyapostoli gwaJesus Kristus. Oya nyolelwa mboka ya pewa eitaalo ewanawa ngaashi lyetu omoluuyuuki waKalunga ketu nowOmukulili Jesus Kristus.

²Esilohenda nombili nayi mu indjipalele, mu tseye Kalunga naJesus, Omuwa gwetu.

³Oonkondo dhe dhopakalunga odhe tu pe ashihe sha pumbiwa opo tu kale tu na omwenyo netilokalunga, okoakutseya nguka e tu ithanitha eadhimo lye negwaneneno.

⁴Osho ngeyi okwe tu pe omauvaneko ge na ondilo nomanenenene. Moku ga taamba otatu vulu okuya ontuku eolelo ndyoka li li muuyuni omoluuhalu, nokupewa oshtopolwa shuukwatya wopaKalunga.

⁵Onkee ano kambadhaleni, eitaalo lyeni li ze iilonga iiwanawa; niilonga iiwanawa yi ze oondunge;

⁶oondunge dhi ze eikwatonawa; eikwatonawa li ze eidhidhimiko; eidhidhimiko li ze okusimaneka Kalunga;

⁷okusimaneka Kalunga ku ze ohole yaamwayinathana; ohole yaamwayinathana yi ze ohole yokuhola ayehe.

⁸Mbika oyo iinima mbyoka mwe yi pumbwa, nongele omu yi na ya gwana e tayi indjipala, otayi mu tula miilonga mbyoka tayi eta iiyimati mokutseya kweni Omuwa gwetu Jesus Kristus.

⁹Ihe ngoka kee yi na, oye omuposi ngoka a dhimbwa kutya oondjo dhe dhonale odha dhimwa po.

¹⁰Onkee ano aamwameme, kambadhaleni natango mwa mana mo, okwiithanwa nokuhogololwa kweni kuKalunga ku kale aluhe kwa mena omidhi mune. Oshoka ngele tamu shi ningi, itamu ihata po we.

¹¹Nena otamu ka pewa ihe ompito yokuya mOshilongo shaaluhe shOmuwa gwetu noshOmukulili Jesus Kristus.

¹²Onkee ano otandi kala noku mu dhimbulutha iinima mbika, nonando omu yi shi nale nomwa kolelela moshili ndjoka mwe yi pewa.

¹³Onde shi tala shu uka, ndi mu penduthe noku mu dhimbulutha iinima mbika, manga natango ndi na omwenyo.

¹⁴Oshoka onda tseya kutya otandi ka za mo mbala molutu nduka lweso, ngaashi Omuwa gwetu Jesus Kristus e shi lombwele ndje sha yela.

¹⁵Otandi kambadhala oku mu ulukila ondjila, mu vule okudhimbulukwa aluhe iinima mbika nongele nda mana oondjenda.

¹⁶Oshoka moku mu tseyithila okugaluka okunankondo kwOmuwa gwetu Jesus Kristus inatu ikwatelela koongano dha totwa kaantu. Otse twa mono nomeho getu yene uunenesimano we.

¹⁷Opo twa li, uuna a pewa esimano neadhimo kuHe Kalunga, ewi sho lye mu popitha lya zi meadhimo lyokombandambanda lya ti: “Nguka oye Omumwandje omuholike, ngoka nde mu hokwa.”

¹⁸Otse naanaa tu uvu ewi ndika lya zi megulu, sho twa li pamwe naye kondundu ondjapuki.

¹⁹Omolwaashoka otu na wo einekelo enene melaka lyu uvithwa kaahunganeki. Nane wo otamu ningi nawa, ngele tamu li tala nawa, oshoka olya fa olamba tayi minikile momilema, sigo taku shi nonyothi yokoongulasha tayi minikile momitima dheni.

²⁰Ihe komeho gaayihe omu na okudhimbulukwa kutya kaku na nando omuntu ta vulu okufatulula koonkondo dhe mwene ehunganeko limwe lyomOmanyolo.

²¹Oshoka kaku na nando elaka lyopahunganeko lya za mehalo lyomuntu, ihe aantu mokupopya elaka lya za kuKalunga oya wilikwa kOmbepo Ondjapuki.