Read Oshindonga-Ombiimbeli Ondjapuki 2008 1 John 2 Bible Online

1 John 2 - Oshindonga-Ombiimbeli Ondjapuki 2008 bible

1 John 2

¹Aamwandje, otandi mu nyolele oohapu ndhika, opo mwaa yone. Ihe ngele ku na ngoka a yono, nena otu na Omupopili Kristus, omuyuuki ngoka te tu galikanene puTate.

²Oshoka Kristus ye mwene oye eyambo lyokudhima po oondjo dhetu, lyo kali shi ashike lyoondjo dhetu, ihe nolyaandhoka wo dhaantu ayehe.

³Ngele otatu vulika kiipango yaKalunga, nena otu shi shi ihe kutya otu mu shi.

⁴Ngele ope na ngoka ta ti: “Ngame ondi mu shi,” ihe ita vulika kiipango ye, omuntu a tya ngaaka oye omufundja, noshili kayi mo muye.

⁵Ihe ngoka ta vulika koohapu dhe, oye tuu ngoka ohole yokuhola Kalunga yu udha mo muye. Opo mpoka ihe tse tatu vulu okutseya nawa kutya tse otu li muKalunga.

⁶Ngoka ta ti kutya okwa kala muKalunga, oye na kale ngashika Jesus Kristus a li.

⁷Ookuume kandje aaholike, oshipango shika tandi shi mu nyolele, kashi shi oshipe. Osho oshipango sha tseyika shoka mwa kala nasho okuza ketameko. Oshipango shoka osho Ohapu ndjoka mwe yi uvu okuza ketameko.

⁸Onkene tuu oshipango shika tandi shi mu nyolele, osho oshipe, noshili yasho oya monika muKristus nomune wo. Oshoka omilema odhi li pokuhula, nuuyelele washili otau minikile nale nokuli.

⁹Ngoka ta ti kutya oku li muuyelele, ihe oku tonde mukwawo, oye oku li natango momilema.

¹⁰Ngoka e hole mukwawo, oye oku li muuyelele nomuye kamu na nando osha shoka tashi fala mukwawo muulunde.

¹¹Ihe ngoka e tonde mukwawo, oye oku li momilema note ende mudho, ye ita tseya nkoka ta yi, oshoka omilema odha tsikitha omeho ge.

¹²Aamwandje, otandi mu nyolele, oshoka oondjo dheni odha dhimwa po omolwaKristus.

¹³Ngame otandi mu nyolele, ne ootate, oshoka one omu mu shi ngoka a li ko okuza ketameko. Ngame otandi mu nyolele, ne aalumentu aagundjuka, oshoka one omwa sinda Mwiinayi.

¹⁴Ngame otandi mu nyolele, ne aanona, oshoka one mwa tseya Tate. Ngame otandi mu nyolele, ne ootate, oshoka one omu mu shi ngoka a li ko okuza ketameko. Ngame otandi mu nyolele, ne aalumentu aagundjuka, oshoka one aanankondo, oohapu dhaKalunga odhi li mune, one nomwa sinda Mwiinayi ngoka.

¹⁵Inamu kala mu hole uuyuni nenge iinima ayihe yomuuyuni. Ngele omu hole uuyuni, ohole yokuhola Tate kayi mo mune.

¹⁶Iinima ayihe mbyoka yi li muuyuni, inayi za muTate, ihe oyomuuyuni. Iinima mbika oyo uuhalu wopantu okuhola mbyoka aantu taye yi tala notaye yi itangele.

¹⁷Uuyuni niinima ayihe yi li mo mbyoka aantu ye yi hokwa, otayi hulu po. Ihe ngoka ta longo shoka Kalunga a hala, ota kala e na omwenyo aluhe.

¹⁸Aamwandje, ehulilo oli li popepi! One mwa lombwelwa kutya omukondjithi gwaKristus ote ke ya. Ngashingeyi okwa holoka nale aakondjithi oyendji yaKristus, onkee otu shi shi kutya ehulilo oli li popepi.

¹⁹Aantu mbaka oya zile mutse, ihe kaya li oyaakwetu, onkee oye tu thigi po e taa yi. Oshoka ando oya li oyaakwetu, ando oya kala putse. Ihe oyo oya yi opo shi kale sha yela kutya kape na nando ogumwe gwomuyo a li mukwetu.

²⁰Ihe ne amuhe omu na Ombepo Ondjapuki, ndjoka ya tililwa mune kuKristus, onkee ne amuhe omwa tseya oshili.

²¹Ano ngame otandi mu nyolele, hamolwaashoka ando inaamu tseya oshili, aawe, ihe omolwaashoka mu yi shi, nomu shi shi kutya miifundja ihamu zi oshili.

²²Olye ano omufundja? Oye tuu ngoka ta tindi okutya, Jesus oye Kristus. Omuntu a tya ngaaka oye omukondjithi gwaKristus, oye tuu ngoka ti idhimbike ayehe yaali: He nOmwana.

²³Oshoka ngoka ti idhimbike Omwana, oti idhimbike wo He, naangoka ta taamba Omwana, ota taamba wo naHe.

²⁴Kaleni ihe mu na omukumo okupungula moomwenyo dheni elaka ndyoka mwe li uvu okuza ketameko. Oshoka ngele shoka mwe shi uvu okuza ketameko, tashi kala mune, nena otamu kala muukumwe nOmwana nosho wo naHe.

²⁵Shika osho shoka Kristus mwene e tu uvanekele, oku tu pa omwenyo gwaaluhe.

²⁶Ngame onde mu nyolele oshinima shika omolwaamboka ya hala oku mu pukitha.

²⁷Ihe Kristus okwe mu tilile Ombepo ye. Onkee Ombepo ye ngele tayi kala mune, nena one inamu pumbwa nando omuntu te mu longo. Oshoka Ombepo otayi mu longo iinima ayihe, naashoka te mu longo, osho oshoshili, kashi shi shiifundja. Onkee ano vulikeni kelongo lyOmbepo e tamu kala muKristus.

²⁸Aamwandje, tu kaleni muye, opo tu vule okukala tu na omukumo, uuna ndoka ta holoka, tse twaa pumbwe oku mu holama noku mu sa ohoni esiku ndyoka te ke ya.

²⁹Omu shi shi kutya Kristus oye omuyuuki, nomwa tseya wo kutya kehe ngoka ta longo shoka shu uka, oye omuna gwaKalunga.