Read Oshindonga-Ombiimbeli Ondjapuki 2008 1 John 5 Bible Online

1 John 5 - Oshindonga-Ombiimbeli Ondjapuki 2008 bible

1 John 5

¹Kehe ngoka i itaala kutya Jesus oye Kristus, oye omuna gwaKalunga. Kehe ngoka e hole He, oku hole wo Omwana.

²Opo tuu mpoka tse tatu dhimbulula kutya tse otu hole aana yaKalunga, ngele tu hole Kalunga notatu vulika kiipango ye.

³Oshoka ohole yokuhola Kalunga oyo okuvulika kiipango ye. Iipango ye kayi shi iidhigu kutse,

⁴oshoka kehe omuna gwaKalunga ota vulu okusinda uuyuni. Esindano ndyoka tatu sindi nalyo uuyuni, olyo eitaalo lyetu.

⁵Olye ta vulu okusinda uuyuni? Oye awike ngoka i itaala kutya Jesus oye Omuna gwaKalunga.

⁶Jesus Kristus ngoka e ya kutse, okwe ya nomeya geshasho lye nombinzi yeso lye. Ine ya ashike nomeya, ihe okwe ya naayihe iyali; omeya nombinzi. Ombepo yoyene otayi hokolola kutya shika oshoshili, oshoka Ombepo oyo oshili.

⁷Ano ope na oonzapo ndatu:

⁸Ombepo, omeya nombinzi; naadhihe ndatu odha tsa kumwe.

⁹Tse otwi itaala ehokololo lyoonzapo ndatu, ihe ehokololo lyaKalunga oli vule ndyoka. Ehokololo ndika olyo tuu ndyoka Kalunga e li hokolola kombinga yOmwana.

¹⁰Onkee ano shaa ngoka i itaala Omuna gwaKalunga, oye oku na ehokololo ndika meni lye. Ihe ngoka ini itaala Kalunga, oye ota ningi Kalunga omufundja, oshoka oye ini itaala shoka Kalunga e shi hokolola kombinga yOmwana.

¹¹Ano ehokololo olyo ndika: Kalunga okwe tu pe omwenyo gwaaluhe, nomwenyo nguka otu gu na mOmwana.

¹²Shaa ngoka e na Omwana, oye oku na omwenyo nguka; ihe shaa ngoka kee na Omuna gwaKalunga, oye kee na omwenyo.

¹³Ontumwafo ndjika otandi yi mu nyolele, opo mu kale mu shi shi kutya omu na omwenyo gwaaluhe, ne mboka mwi itaala edhina lyOmuna gwaKalunga.

¹⁴Ano osho ngeyi otatu vulu okuhedha kuKalunga tu na omukumo, oshoka ngele tatu mu indile shaa shoka she mu opalela, oye ote tu uvu ethimbo kehe ndyoka tatu mu indile.

¹⁵Onkee ano sho tu shi shi kutya shika oshoshili, nena otu shi shi wo kutya oye ote tu pe shoka tatu mu indile.

¹⁶Ngele ope na omuntu ta mono mukwawo ta yono eyono ndyoka itaali mu fala meso, oye ne mu galikanene koshipala shaKalunga, oye note mu tula omwenyo. Shika oshi na sha noondjo ndhoka itaadhi fala meso. Ihe oku na oondjo ndhoka tadhi fala meso, naantu ya tya ngaaka hayo tandi popi kutya naa galikanenwe.

¹⁷Eyono kehe olyo ondjo, ihe oku na oondjo ndhoka itaadhi fala meso.

¹⁸Tse otu shi shi kutya kape na omuntu gwaKalunga ta kala muulunde, shoka Omuna gwaKalunga ote mu gamene kaa yone, nomuhindadhi kaa vule oku mu pukitha.

¹⁹Tse otu shi shi kutya tse aantu yaKalunga, ihe uuyuni auhe ou li mepangelo lyomuhindadhi.

²⁰Tse otu shi shi kutya Omuna gwaKalunga okwe ya nokwe tu longo okutseya Kalunga kashili. Okukala kwetu oku li muKalunga kashili nomOmwana Jesus Kristus. Nguka oye Kalunga kashili nomwenyo gwaaluhe.

²¹Aamwandje, yandeni iikalunga.