Read Oshindonga-Ombiimbeli Ondjapuki 2008 2 John 1 Bible Online

2 John 1 - Oshindonga-Ombiimbeli Ondjapuki 2008 bible

2 John 1

¹Ontumwafo ndjika ya zi kOmukuluntu, oya nyolelwa omukulukadhi omuhogololwa noyana, mboka ndi ya hole unene. Nokuli hangame awike ndi mu hole, ihe ayehe mboka ya tseya oshili, oye mu hole.

²Omolwoshili ndjoka ya kala mutse notayi ka kala pamwe natse sigo aluhe.

³Kalunga Tate naJesus Kristus, Omuna gwaTate, naye tu pe esilohenda, olukeno nombili. Nayi kale natse moshili nomohole.

⁴Ngame onda nyanyukwa mokumona kutya aakwanegongalo yamwe ohaa kala moshili, ngashika naanaa Tate e tu lombwele.

⁵Onkee ano, egongalo alihe, otandi mu indile kutya tu kaleni tu holathane. Oshipango shika tandi shi mu nyolele, kashi shi oshipe, aawe, osho tuu shoka twa kala nasho okuza ketameko.

⁶Ohole ndjoka tandi popi, otayi ti kutya tse otu na okukala tatu vulika kiipango yaKalunga. Oshipango osho shika ngaashi mwe shi uvu okuza ketameko: Amuhe kaleni mohole.

⁷Aapukithi oyendji oya ya nuuyuni. Aantu ya tya ngaaka itaa hempulula nande kutya Jesus Kristus okwa ningi omuntu. Aantu mboka oyo aahongololi naakondjithi yaKristus!

⁸Ikotokeleni ano, opo mwaa kanithe shoka mu na oku shi pewa, ihe mu mone ondjambi yeni ya gwana.

⁹Shaa ngoka itaa kala melongo lyaKristus, ihe ota gwaya mo, oye ke na Kalunga. Ihe ngoka ta kala melongo ndika, oye oku na ayehe yaali: He nOmwana.

¹⁰Ngele ku na ngoka te ya kune, ihe ite ya nelongo ndika, inamu mu taamba megumbo lyeni, ne inamu mu popitha nando okuli mu tye: “Ombili nayi kale nangoye.”

¹¹Oshoka shaa ngoka ta popitha omuntu a tya ngaaka, oye ota kwatathana niilonga iiwinayi mbyoka te yi longo.

¹²Ngame ondi na oshindji oku mu lombwela, ihe inandi hala oku shi ninga nokunyola, ndele ondi na edhiladhilo oku mu talela po ngame mwene, opo tu popyeni kokana nokana, enyanyu lyetu opo li kale lya gwanenena pombanda.

¹³Aakwanegongalo ooyakweni aaholike otaye mu kundile po.